រាជធានីភ្នំពេញ ៖ លោកវរសេនីយ៍ទោ ហ៊ុន សុធី មេបលិសខណ្ឌដូនពេញ និងជាមេប៉ូលិសប៉ុស្តិ៍ទាំង១១ បានជួបសំណះសំណាលជាមួយបងប្អូនរត់ម៉ូតូកង់បី កាលពីរសៀលថ្ងៃទី១៦ កុម្ភៈ ឆ្នាំ២០១២ នៅខាងជើងសួនច្បារវត្តបទុមវតី ស្ថិតក្នុងសង្កាត់ចតុមុខ ខណ្ឌដូនពេញ ដើម្បីការពារសន្តិសុខសណ្តាប់សាធារណៈក្នុងរាជធានី ។
លោកវរសេនីយ៍ទោ ហ៊ុន សុធី អធិការប៉ូលិសខណ្ឌដូនពេញបាននិយាយថា យោងតាមបទបញ្ជាអគ្គស្នងការដ្ឋាននគរបាលជាតិ តាមការណែនាំពីលោកស្នងការនគរបាល និងតាមអនុសាសន៍លោកអភិបាលរាជធានីភ្នំពេញ ដាក់ចេញនូវវិធានការអនុវត្តគោលនយោបាយភូមិ-សង្កាត់មានសុវត្ថិភាព និងដើម្បីពង្រឹងការងារសន្តិសុខសណ្តាប់ធ្នាប់សាធារណៈក្នុងភូមិសាស្ត្រខណ្ឌដូនពេញ ដែលជាខណ្ឌមួយប្រមូលផ្តុំទៅដោយភ្ញៀវបរទេសមកស្នាក់នៅតាមសណ្ឋាគារ និងផ្ទះសំណាក់ ជាពិសេសភ្ញៀវទាំងនោះដើរទស្សនាកម្សាន្តតាមរមណីយដ្ឋាននានា ។ ដើម្បីសុវត្ថិភាពទើបលោកបានអញ្ជើញបងប្អូនអ្នករត់ម៉ូតូកង់បីមកជួបជុំគ្នា និងសហការគ្នាលុបបំបាត់បទល្មើសផ្សេងៗ ហើយត្រូវណែនាំដល់ភ្ញៀវដែលឡើងជិះម៉ូតូរបស់ខ្លួនឲ្យចេះប្រុងប្រយ័ត្ននូវសម្ភារដែលមានជាប់ខ្លួនខ្លាចមានជនខិលខូចធ្វើសកម្មភាពលួច ឬឆក់ ។ សុំឲ្យបងប្អូនទាំងនោះជួយតាមដានមុខសញ្ញាអ្នកជួញដូរគ្រឿងញៀន បើស្គាល់ពីមុខសញ្ញាហើយត្រូវប្រញាប់រាយការណ៍មកនគរបាលប៉ុស្តិ៍ ក៏ដូចជាអធិការដ្ឋាននគរបាលខណ្ឌដូនពេញ ដើម្បីទប់ស្កាត់ឱ្យបានទាន់ពេលវេលា និងមានផ្តល់រង្វាន់លើកទឹកចិត្តផងដែរ ។
ជាមួយគ្នានេះដែរលោកអធិការ បានសំណូមពរឱ្យអ្នករត់ម៉ូតូកង់បីត្រូវតែក្តាប់មុខសញ្ញាប្លន់ និងឆក់បើឃើញធ្វើសកម្មភាពជាក់ស្តែងត្រូវដេញតាមប្រមាញ់ហើយក្របួចបាននោះនឹងទទួលរង្វាន់ដែរ ។ បើសិនក្នុងការដេញចាប់ជនល្មើសមានការខូចខាតយានជំនិះ នគរបាលនឹងជួយចេញសំណងតាមការជាក់ស្តែង ។
លោកអធិការប៉ូលិសខណ្ឌដូនពេញ បានបញ្ជាក់ថា រាល់ការដែលបងប្អូនអ្នករត់ម៉ូតូកង់បីបង្ហាញមុខសញ្ញាជួញដូរថ្នាំញៀន លួច ឆក់ប្លន់ដល់សមត្ថកិច្ចនោះ គឺសមត្ថកិច្ចលាក់ការខ្ពស់បំផុតដើម្បីសុវត្ថិភាពដល់អ្នករាយការណ៍លោកសង្ឃឹមថា នឹងមានការសហការល្អពីបងប្អូនអ្នករត់ម៉ូតូកង់បីមិនខានឡើយ ។ នៅក្នុងឱកាសនោះដែរ លោកអធិការបានផ្តល់ប្រាក់ដល់អ្នករត់មូ៉តូកង់បីក្នុងម្នាក់ៗ១ម៉ឺនរៀល និងអាវយឺតមួយ ៕
ចែករំលែកព័តមាននេះ