រាជធានីភ្នំពេញ ៖ កាលពីវេលាម៉ោង៧យប់ថ្ងៃទី១៤ កុម្ភៈ ឆ្នាំ២០១២ គណៈប្រតិភូទទួលបន្ទុកកិច្ចការព្រំដែនកម្ពុជាដឹកនាំដោយ លោកទេសរដ្ឋមន្ត្រី វ៉ា គឹមហុង ប្រធានគណៈ កម្មាធិការព្រំដែនចម្រុះបានធ្វើមាតុភូមិនិវត្តន៍ពីកិច្ចប្រជុំលើកទី៥ស្តីពីបញ្ហាព្រំដែនកម្ពុជា-ថៃ។ លោកទេសរដ្ឋមន្ត្រីបានបញ្ជាក់ថា កិច្ចប្រជុំលើកនេះមានលទ្ធផលវិជ្ជមានច្រើន ព្រោះភាគីទាំង២បានឈានដល់ការឯកភាពគ្នាលើចំណុចជាច្រើនរួមមានការរុករកបង្គោលព្រំដែនដែលនៅសេសសល់ ការផលិតផែនទីអាកាសរួមគ្នានិងការបើកច្រកស្ទឹងបត់ ។
លោកវ៉ា គឹមហុង បានមានប្រសាសន៍ក្នុងសន្និសីទសារព័ត៌មាននៅឯចំណតយន្តហោះអន្តរជាតិភ្នំពេញថា កិច្ចប្រជុំគណៈកម្មាធិការព្រំដែនចម្រុះទូទៅលើកទី៥នេះមានលទ្ធផលវិជ្ជមានច្រើន ព្រោះភាគីទាំង២បានឯភាពគ្នាលើចំណុចទាំងឡាយដែលកម្ពុជាបានដាក់ចូលក្នុងរបៀបវារៈនៃកិច្ចប្រជុំប្រកបដោយជោគជ័យព្រោះភាគីទាំងពីរបានទទួលយក ហើយបានអនុញ្ញាតឲ្យគណៈកម្មការបច្ចេកទេសអាចចុះទៅអនុវត្តនៅលើដីជាក់ស្តែងដើម្បីរុករកបង្គោលដែលនៅសល់ ។
លោកវ៉ា គឹមហុង បានបញ្ជាក់ថា ការ កំណត់ពេលវេលាណាមួយជាក់ច្បាស់ក្នុងការចុះទៅរកបង្គោលព្រំដែនទាំងនោះនឹងត្រូវកំណត់នាពេលក្រោយ។ ការឯកភាពគ្នានេះមានសារសំខាន់ណាស់ អ្វីដែលរាំងស្ទះកាលពីមុនព្រោះភាគីថៃបានដាក់កំណត់ហេតុទាំងឡាយដូចខាងលើនេះតាមនីតិវិធីរបស់ប្រទេសគេវាលែងមានជាឧបសគ្គទៀតឡើយ ហើយពេលនេះថៃអាចចុះហត្ថលេខាលើឯកសារទាំងឡាយពេលមានការឯកភាពគ្នាដោយមិនចាំបាច់ឆ្លងកាត់រដ្ឋសភាដូចពីមុនទៀតទេ ។
លោកវ៉ា គឹមហុង បានបញ្ជាក់ទៀតថា បញ្ហាដែលមិនបានឆ្លងកាត់រដ្ឋសភាថៃដូចមុនយើងឃើញថា បរិយាកាសពេលនេះវាល្អជាងមុនណាស់ ។ ដូចអ្វីដែលយើងធ្លាប់ធ្វើជាមួយគាត់តាំងតែពីឆ្នាំ១៩៩៩ រហូតដល់ឆ្នាំ២០០៨នេះ ជាចំណុចមួយដែលវិជ្ជមាន ។ ពីមុនដោយសារតែមានបញ្ហាប្រាសាទព្រះវិហារធ្វើឲ្យកិច្ចប្រជុំលើកទី៥នេះមានការអាក់ខាន ។ កិច្ចប្រជុំនេះតែងតែធ្វើជារៀងរាល់ឆ្នាំ ហើយពេលកិច្ចប្រជុំប្រចាំឆ្នាំលើកទី៥នេះធ្វើឡើងនៅទីក្រុងបាងកក ប្រទេសថៃ ។
លោកទេសរដ្ឋមន្ត្រី វ៉ា គឹមហុង បានមានប្រសាសន៍បន្តថា កិច្ចប្រជុំគណៈកម្មាធិការព្រំដែនគោកចម្រុះនេះយើងបានធ្វើឡើងវិញមិនមានឧបសគ្គអ្វីទៀតទេ។ភាគីថៃមិនចាំបាច់ឆ្លងកាត់រដ្ឋសភាគេដូចមុនទៀតទេ ហើយនៅពេលណាកិច្ចប្រជុំបានសម្រេចចុះហត្ថលេខាយល់ព្រមគឺយើងយកទៅអនុវត្តតែម្តង ។ វាជាចំណុចវិជ្ជមានដែលយើងមានការសប្បាយចិត្ត ទាំងភាគីថៃបានបញ្ជាក់ថា អ្វីដែលភាគីទាំង២បានឯកភាពគ្នាពីមុនមកនោះយើងឯកភាពគ្នាអនុវត្តជាក់ស្តែង នេះជាបំណងដែលកម្ពុជាយើងចង់បានតាំងពីមុនមក ។
លោកវ៉ា គឹមហុង បានអះអាងទៀតថា កម្ពុជាក៏បានលើកយកនូវរបៀបវារៈលំអិតរបស់ខ្លួនដាក់ចូលក្នុងកិច្ចប្រជុំនេះដែរនូវចំណុចសំខាន់មួយចំនួនដូចជា យើងបានរុករកបង្គោលពីបង្គោលលេខ១ នៅច្រកជាំស្រងាំ ក្នុងស្រុកអន្លង់វែង ដល់បង្គោលលេខ២៣នៅប្រាសាទតាមាន់ ក្នុងស្រុកបន្ទាយអំពិល ក្នុងខេត្តឧត្តរមានជ័យ ។ ការចុះរុករកបង្គោលគោលព្រំដែននេះ នឹងត្រូវធ្វើឡើងបន្ទាប់ពីគណៈកម្មការជំនាញចុះទៅបើកច្រកថ្មីមួយ«ស្ទឹងបត់»ស្ថិតក្នុងខេត្តបន្ទាយមានជ័យ ដែលកម្ពុជាបានស្នើឡើង ។
លោកវ៉ា គឹមហុង បន្តថា នៅច្រកស្ទឹងបត់នេះភាគីថៃបានយល់ព្រមឲ្យបញ្ជូនក្រុមបច្ចេកទេសនៃប្រទេសទាំង២ចុះទៅត្រួតពិនិត្យនៅថ្ងៃទី៥ មីនា ឆ្នាំ២០១២ខាងមុខនេះ ។ នៅពេលបញ្ចប់ការងារនៅស្ទឹងបត់រួច គណៈកម្មការព្រំដែននេះនឹងបន្តរុករកបង្គោលព្រំដែននៅច្រកជាំស្រងាំរហូតដល់ប្រាសាទតាមាន់តែម្តង ។ ការចុះធ្វើកិច្ចការនៅស្ទឹងបត់នេះមានរយៈពេលពីរខែទើបចប់ ។
លោកវ៉ា គឹមហុង បន្តថា ចំណុចដែលភាគីទាំងពីរបានឯកភាពគ្នានោះគឺការផលិតផែនទីលំហអាកាស ។ ផែនទីនេះជាផែនទីខ្នាតធំ អាចឲ្យយើងដឹងពីភូមិសាស្រ្តនានាតាមបណ្តោយ ព្រំដែន ដែលអនុញ្ញាតឲ្យក្រុមបច្ចេកទេសងាយ ស្រួលក្នុងការរុករកបង្គោលព្រំដែនដែលបានបោះដោយគណៈកម្មការបារាំង-សៀមលើកទី១ក្នុងឆ្នាំ១៩០៨-១៩០៩ និងលើកទី២បោះនៅឆ្នាំ១៩១៩-១៩២០ ។ កាលពីលើកមុន គណៈកម្មាធិការព្រំដែនចម្រុះកម្ពុជា-ថៃ ធ្លាប់បានយល់ព្រមដែរតែមិនបានស៊ីជម្រៅតែពេលនេះយើងបានឯកភាពថា បន្តភារកិច្ចដើម្បីឲ្យអ្នកបច្ចេកទេសក្នុងការធ្វើផែនទីនេះ ហើយភាគីទាំងពីរបានឯកភាពរកក្រុមបច្ចេកទេសពិនិត្យ ពិចារណារកក្រុមហ៊ុនណាមកពីប្រទេសទី៣ដើម្បីធ្វើ បន្ទាប់មកដាក់ផែនទីនេះជូនទៅអនុគណៈកម្មការចម្រុះពិនិត្យនិងសម្រេច ។
លោកវ៉ា គឹមហុង បន្តទៀតថា ពីមុនភាគីទាំងពីរបានរកឃើញបង្គោលចំនួន៤៨ ក្នុងនោះមានបង្គោលចំនួន៣៣បានឯកភាពគ្នារួចហើយ។មានបង្គោល១៥មិនទាន់បានឯកភាពគ្នានិងថែម១៩បង្គោលទៀតរកឃើញហើយ តែមិនទាន់បានធ្វើឯកសារត្រឹមត្រូវ ។ បង្គោលទាំង១៩នេះ បើមិនធ្វើឯកសារមិនដឹងថា បង្គោលនោះនៅកន្លែងណាទេ ហើយភាគីទាំង២នឹងធ្វើឯកសារជាបីភាសា គឺភាសាខ្មែរភាសាសៀម និងអង់គ្លេស ។ ភាភីទាំង២ក៏បានឯកភាពគ្នាធ្វើការជួសជុលបង្គោលដែលបាក់បែកឬដាំបង្គោលបន្ថែម និងធ្វើឯកសារនានាដាក់ជូនគណៈកម្មាធិការចម្រុះដើម្បីពិនិត្យនិងសម្រេច ។
លោកវ៉ា គឹមហុង បន្តថា ភាគីទាំងពីរបានឯកភាពគ្នាក្នុងការវាស់វែងព្រំដែននៃគណៈកម្មាធិការចម្រុះនៃប្រទេសទាំងពីរ ។ ភាគីទាំង២បានខិតខំប្រឹងប្រែងក្នុងការចរចាអំពីបញ្ហាព្រំដែននេះដោយសុខចិត្តបូជាអស់កម្លាំងកាយចិត្ត ហើយចំណុចណាដែលអាចទទួលយកបានយើងយកតែចំណុចណាមិនអាចទទួលយកបានយើងមិនយកទេ ។ ទោះបីជាយ៉ាងណា កិច្ចចរចានេះមានលក្ខណៈល្អប្រសើរជាងមុន ។
លោកវ៉ា គឹមហុង បន្តទៀតថា វាអាចនៅមានបញ្ហាទាក់ទងនឹងបច្ចេកទេស ដែលបញ្ហានេះភាគីទាំង២អាចប្រឈមព្រោះថាបញ្ហាបច្ចេកទេសមិនមែនដូចជាបញ្ហានយោបាយនោះទេ ។ បញ្ហានយោបាយយើងអាចសម្របសម្រួលតែបញ្ហាបច្ចេកទេសមិនអាចសម្រួលបានទេ ។ កាលពីមុនថៃមានឧបសគ្គដោយសារតែមាត្រា១៩០ និងកាលពីឆ្នាំ២០១១ កិច្ចប្រជុំគ្រោងធ្វើនៅប្រទេសឥណ្ឌូណេស៊ីដែលជាអ្នកសម្របសម្រួលតែមិនមានលទ្ធផលនេះជាឧបសគ្គ ។
លោកវ៉ា គឹមហុង បន្តថា កន្លងមកភាគីថៃមានឧបសគ្គ ព្រោះរាល់ឯកសារឬលិខិតស្នាមដែលមុនឬក្រោយពេលចរចាត្រូវដាក់ឆ្លងកាត់ តាមនីតិវិធីប្រទេសនីមួយៗពិនិត្យសិន តែកម្ពុជាមិនស្មុគស្មាញដូចប្រទេសថៃទេ កាលណាសម្តេចតេជោនាយករដ្ឋមន្ត្រីសម្រេចហើយគឺចប់ហើយគ្មានឧបសគ្គទេ ។ នៅក្នុងឆ្នាំ២០០៨ និង២០០៩ ខាងភាគីថៃរាល់ឯកសារដែលដាក់មកចរចានោះគេថា ក្រោយកិច្ចប្រជុំត្រូវដាក់ឯកសារទាំងអស់ទៅសុំការសម្រេចតាមនីតិវិធីប្រទេសនីមួយៗដែលនេះជាឧបសគ្គតែពេលនេះមិនមានទៀតទេ ហើយនៅថ្ងៃទី៣មីនា ឆ្នាំ២០១២ខាងមុននេះ គណៈកម្មាធិការចម្រុះនឹងចាប់ផ្តើមចុះទៅពិនិត្យជាក់ស្តែង ៕
ចែករំលែកព័តមាននេះ