ខេត្តកំពង់ស្ពឺ ៖ សាកសពបុរសព្រានព្រៃម្នាក់បានត្រូវប្រជាពលរដ្ឋនៅភូមិតាសាលឃុំតាសាល ស្រុកឱរ៉ាល់ ប្រទះឃើញកាលពីវេលាម៉ោង៦ល្ងាចថ្ងៃទី២៦ មីនា នៅចំណុចអន្លង់ព្រីង លើខ្នងភ្នំទើរ ក្នុងភូមិសាស្ត្រ ទឹកដីឃុំតាសាល ស្រុកឱរ៉ាល់ ។ សាកសពត្រូវបានមន្ត្រីកងរាជអាវុធហត្ថខេត្ត និងមន្ត្រីប៉ូលិសខេត្ត-ស្រុកចុះទៅធ្វើការត្រួតពិនិត្យផងដែរ ។
យោងតាមប្រភពព័ត៌មានពីមន្ត្រីសមត្ថកិច្ចស្រុកឱរ៉ាល់បានឱ្យដឹងថា បុរសដែលស្លាប់នេះឈ្មោះកាន់ សេត អាយុ៣៨ឆ្នាំ មានទីលំនៅភូមិតាសាល ឃុំតាសាល មានប្រពន្ធនិងកូនចំនួន៤នាក់ក្នុងបន្ទុក ។ មន្ត្រីកងរាជអាវុធហត្ថស្រុកបានបំភ្លឺបន្ថែមថា ឈ្មោះកាន់ សេត នេះបានបាត់ខ្លួនពីផ្ទះតាំងពីថ្ងៃទី២៤ មីនា និងទើបប្រទះឃើញសពនៅល្ងាចថ្ងៃទី២៦ មីនា ដោយសពមានភាពហើមស្អុយទៅហើយ ។ ក្រោយពីធ្វើការត្រួតពិនិត្យហើយរួចរាល់ សមត្ថកិច្ចបានប្រគល់សពនេះដល់ក្រុមគ្រួសារសពធ្វើការបូជានៅកន្លែងកើតហេតុតែម្តង ។
លោកវរសេនីយ៍ត្រីយក់ គន្ធា នាយរងការិយាល័យស្រាវជ្រាវបទល្មើសនៃទីបញ្ជាការកងរាជអាវុធហត្ថខេត្តបានឱ្យដឹងថា តាមការសន្និដ្ឋាន និងស្រាវជ្រាវនៅទីនោះ គឺបុរសឈ្មោះកាន់ សេត ជាព្រានបាញ់សត្វព្រៃធ្វើអាជីវកម្ម ។ ការបាត់ខ្លួនរបស់ជនរងគ្រោះគឺពេលចេញពីផ្ទះទៅបរបាញ់សត្វនៅចំណុចខាងលើ និងអាចសន្និដ្ឋានថា កាន់ សេត បាញ់សត្វត្រូវហើយយកកាំភ្លើងវាយបន្ថែម ហើយអាចផ្ទុះត្រូវខ្លួនឯង។
ការបញ្ជាក់នេះ ព្រោះកន្លងទៅព្រាននេះដើរបរបាញ់សត្វតែម្នាក់ឯងទេ ពុំមានអ្នកទៅ ជាមួយឡើយ ។ ម្យ៉ាងទៀតការស្លាប់នេះមានកាំភ្លើងមួយដើមធុនសេកាសេជ្រុះនៅជិតសាកសព និងពិនិត្យឃើញស្នាមត្រូវគ្រាប់សេកាសេមួយគ្រាប់ ចំឆ្អឹងជំនីរស្តាំធ្លាយទៅក្រោយស្មាឆ្វេង ។ កាំភ្លើងត្រូវបានមន្ត្រីប៉ូលិសយកទៅរក្សាទុកនៅអធិការដ្ឋានស្រុក ដើម្បីស្រាវជ្រាវរកប្រភពផ្តល់អាវុធនេះ ៕
ចែករំលែកព័តមាននេះ