រាជធានីភ្នំពេញ ៖ ស្នូរផ្ទុះអាវុធ១គ្រាប់បានលាន់កក្រើកនៅចំណុចមុខភូមិគ្រឹះលោកឧកញ៉ាម្នាក់ ដែលមានទីតាំងនៅតាមបណ្តោយផ្លូវលេខ២៧៨ សង្កាត់បឹងកេងកងទី១ ខណ្ឌចំការមន កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២២ មីនា ២០១១ បណ្តាលឱ្យមនុស្សម្នាក់រងរបួស ត្រូវបញ្ជូនទៅព្យាបាលនៅឯមន្ទីរពេទ្យឯកជនមួយកន្លែង។
តាមប្រភពព័ត៌មានមួយបានទម្លាយឱ្យដឹងថា ហេតុការណ៍ផ្ទុះអាវុធខាងលើនេះផ្តើមឡើងពី មនុស្ស២នាក់ ដែលជាអង្គរក្សលោកឧកញ៉ាម្នាក់សុំមិនបញ្ចេញឈ្មោះ បាននាំគ្នាផឹកស៊ីស្រវឹង ហើយសម្តែងឫកពាថា អាណាខ្លាំងជាងអញ ។ ពេលនោះភាគីម្ខាងទៀតដែលជាអង្គរក្សដូចគ្នាបានបាញ់១គ្រាប់បណ្តាលឱ្យត្រូវមេជើងម្ខាងទៅលើអង្គរក្សនោះរបួសធ្ងន់ ហើយត្រូវបញ្ជូនទៅមន្ទីរពេទ្យឯកជនព្យាបាលរបួសស្ងាត់ៗដោយពុំមានការភ្ញាក់ផ្អើលខ្ចរខ្ចាយឡើយ ។ តាមប្រភពព័ត៌មានបានឱ្យដឹងថា នៅយប់កើតហេតុនោះ លោកឧកញ៉ាដែលជាថៅកែអង្គរក្សទាំង២នាក់ខាងលើមិននៅក្នុងស្រុកទេ គឺចេញទៅប្រទេសក្រៅ ។ ឆ្លៀតឱកាសដែលថៅកែអត់នៅអង្គរក្សក៏នាំគ្នាផឹកស៊ីស្រវឹង ហើយបង្អួតកាំភ្លើងដាក់គ្នារហូតដល់មានស្នូរផ្ទុះអាវុធរងរបួសម្នាក់អញ្ចឹងទៅ។ ជុំវិញហេតុការណ៍ផ្ទុះអាវុធខាងលើនេះទៀតសោត សមត្ថកិច្ចមូលដ្ឋានបានព្យាយាមលាក់លៀមព័ត៌មាននេះយ៉ាងខ្លាំង ព្រោះខ្លាចបុណ្យស័ក្តិលោកឧកញ៉ាល្បីឈ្មោះរូបនោះ ។
បន្ទាប់ពីឮស្នូរអាវុធ ប្រជាពលរដ្ឋក៏ដូចជាសមត្ថកិច្ចជំនាញមួយចំនួនបានរិះគន់ទៅលើសមត្ថកិច្ចមូលដ្ឋានដែលពុំចាត់ការបុគ្គលបង្កភាពអនាធិបតេយ្យបាញ់បោះសេរីខុសច្បាប់ បង្កការភ័យខ្លាចទៅលើប្រជាពលរដ្ឋស្លូតត្រង់ ។ ជនល្មើសមិនត្រូវបានចាត់ការតាមច្បាប់បែបនេះ មានន័យថា ច្បាប់អនុវត្តបានតែកូនចៅប្រជាពលរដ្ឋតូចតាចប៉ុណ្ណោះ តែប៉ះចំលើក្រុមឧកញ៉ាខ្លាំងៗគឺបុគ្គលដែលបានប្រព្រឹត្តអំពើបាញ់បោះនោះបែរជារួចខ្លួនទៅវិញ ។ ចាំមើលទៅថ្ងៃក្រោយប្រាកដជាអំពើបាញ់បោះសេរីបង្កការភ័យខ្លាចនោះកើតឡើងជាញឹកញាប់ និងបណ្តាលឱ្យមនុស្សរងគ្រោះធ្ងន់ធ្ងរជាងនេះថែមទៀត៕
ចែករំលែកព័តមាននេះ