ដោយហេតុថា ៥៤% នៃបុរសកម្ពុជាដែលមានអាយុលើសពី២០ឆ្នាំ និង៦%នៃស្ត្រី ជក់បារីដូច្នេះបុគ្គលិកសុខាភិបាលច្បាស់ជានឹងជួបជាមួយអ្នកជំងឺដែលជក់បារីជាមិនខាន នៅក្នុងការអនុវត្តការងារប្រចាំថ្ងៃរបស់ខ្លួន ។ អត្ថបទនេះនឹងពិភាក្សាអំពីយុទ្ធសាស្ត្រនានាសំរាប់បុគ្គលិកសុខាភិបាល ជំហានសំខាន់ៗដើម្បីកំណត់អ្នកជក់បារី និងលើកទឹកចិត្តពួកគេឱ្យលះបង់ការជក់បារីដោយជោគជ័យ តាមរយៈការផ្តល់ប្រឹក្សា និងការតាមដានជាបន្តបន្ទាប់ទៀត ។ យោងតាមតារាងខាងលើ ជំហានដំបូងក្នុងការជួយអ្នកជំងឺឱ្យលះបង់ការជក់បារី គឺកំណត់អ្នកជំងឺ ។ ការស្វែងយល់អំពីលក្ខណៈនៃការជក់បារីរបស់អ្នកជំងឺ ជួយឱ្យយើងអាចកំណត់អន្តរាគមន៍សមស្រប ផ្អែកទៅតាមឆន្ទៈរបស់គាត់ក្នុងការលះបង់ការជក់បារី ។ តារាងនេះក៏បានបែងចែកអ្នកជំងឺជាបីប្រភេទផងដែរ៖
-អ្នកជក់បារីបច្ចុប្បន្ន ដែលមានបំណងលះបង់ការជក់បារី
-អ្នកជក់បារីបច្ចុប្បន្ន ដែលគ្មានបំណងលះបង់ការជក់បារី និង
-អតីតអ្នកជក់បារី ដែលទើបបានលះបង់ការជក់បារី
១-អ្នកជក់បារីបច្ចុប្បន្នដែលមានបំណងលះបង់ការជក់បារី
ជាការសំខាន់ បុគ្គលិកសុខាភិបាលត្រូវសួរគ្រប់អ្នកជំងឺថា តើពួកគាត់ជក់បារីឬទេ ត្រូវផ្តល់ដំបូន្មានឱ្យគាត់លះបង់ការជក់បារី និងត្រូវវាយតំលៃឆន្ទៈរបស់គាត់ក្នុងការព្យាយាមលះបង់ការជក់បារីក្នុងពេលនោះ ។ ការសំរេចចិត្តធ្វើការព្យាយាមលះបង់ការជក់បារីនេះ ត្រូវតែធ្វើដោយអ្នកជំអឺផ្ទាល់ខ្លួន ។ ប្រសិនបើអ្នកជំងឺសំរេចចិត្តលះបង់ការជក់បារី ត្រូវជួយគាត់ក្នុងការធ្វើការព្យាយាមលះបង់នេះ និងត្រូវរៀបចំការតាមដានបន្ត ដើម្បីបង្ការការលាប់ឡើងវិញ ។
៥ជំហានក្នុងការជួយអ្នកជក់បារីដែលមានបំណងលះបង់ការជក់បារី
សួរ ៖ អ្នកជំងឺគ្រប់រូប នៅរាល់ពេលពិនិត្យជំងឺ និងកត់ត្រាអំពីលក្ខណៈនៃការជក់បារីរបស់ពួកគាត់ «តើសព្វថ្ងៃអ្នកជក់បារីឬទេ?»
ណែនាំ ៖ អ្នកជក់បារីគ្រប់រូប ឱ្យលះបង់ការជក់បារី
-«ក្នុងនាមជាអ្នកផ្តល់ការថែទាំសុខភាពដល់អ្នក ខ្ញុំសុំឱ្យយោបល់ថា អ្នកត្រូវលះបង់ការជក់បារី» ។
-«ការឈប់ជក់បារី គឺជារឿងសំខាន់បំផុតមួយដែលអ្នកអាចធ្វើបាន ដើម្បីកែលំអសុខភាពរបស់អ្នក ហើយខ្ញុំអាចជួយអ្នកបាន» ។
វាស់ស្ទង់ ៖ ការតាំងចិត្តរបស់អ្នកជំងឺក្នុងការព្យាយាមលះបង់ការជក់បារីក្នុងពេលនេះ
-«តើអ្នករៀបចំខ្លួនហើយឬនៅ ក្នុងការព្យាយាមលះបង់ការជក់បារីក្នុងពេល៣០ថ្ងៃខាងមុខ?»
-បើ «ត្រៀមហើយ» សូមបន្តទៅជំហានបន្ទាប់គឺ ជួយ
-បើ «នៅ» សូមបន្តទៅជំហាន៥យ៉ាងក្នុងការជួយអ្នកជក់បារីដែលមិនទាន់មានការតាំងចិត្តលះបង់ ជួយ អ្នកជំងឺរៀបចំផែនការលះបង់ការជក់បារី
-កំណត់ថ្ងៃខែលះបង់ការជក់បារីក្នុងអំឡុង២សប្តាហ៍ រួចត្រូវលះបង់ឱ្យបានចាប់ពីថ្ងៃនោះទៅ
-រកការគាំទ្រពីគ្រួសារ មិត្តរួមការងារ និងមិត្តភក្តិ
-គិតទុកជាមុននូវការលំបាក និងបញ្ហាផ្សេងៗដែលអាចជួបប្រទះ ជាពិសេសក្នុងប៉ុន្មានសប្តាហ៍ដំបូង
-ចោលចានគោះបារី ព្រមទាំងបារី និងដែកកេះ
-រស់នៅដោយគ្មានផ្សែងបារី រួចចៀសវាងរាល់អ្វីៗដែលជាមូលហេតុធ្វើឱ្យអ្នកជំងឺចង់ជក់បារី ដូចជាការផឹកស្រា និងការនៅជិតអ្នកជក់បារី ។ អ្នកជក់បារីដទៃទៀតនៅក្នុងគ្រួសារ ក៏គួរត្រូវបានលើកទឹកចិត្តឱ្យលះបង់ការជក់បារី ដូចអ្នកជំងឺដែរ ។
-ពិនិត្យឡើងវិញ នូវបទពិសោធន៍នៃការព្យាយាមលះបង់ក្នុងពេលកន្លងមក ដែលរួមមានទាំងការពិនិត្យឡើងវិញនូវអ្វីដែលបានជួយក្នុងពេលព្យាយាមលះបង់លើកមុន និងកត្តាដែលធ្វើឱ្យមានការលាប់ឡើងវិញ ។
រៀបចំ ការតាមដានបន្ត
-ដាក់កាលវិភាគសំរាប់តាមដានបន្ត តាមរយៈទូរស័ព្ទ ឬការចុះទៅដល់ផ្ទះ ជាពិសេសក្នុងសប្តាហ៍ដំបូង ក្រោយថ្ងៃខែលះបង់ ។
-អបអរសាទរជោគជ័យរបស់អ្នកជំងឺ
-បើអ្នកជំងឺបានជក់បារីវិញ ត្រូវពិនិត្យឡើងវិញ និងកំណត់កត្តាទាំងឡាយដែលធ្វើឱ្យមានការលាប់ឡើងវិញនេះ
-ប្រាប់អ្នកជំងឺឱ្យធ្វើការប្តេជ្ញាចិត្តជាថ្មីក្នុងការរស់នៅដោយគ្មានផ្សែងបារីទាំងស្រុង
-ប្រាប់អ្នកជំងឺម្តងទៀតថា អាចប្រើប្រាស់ការលាប់ឡើងវិញជាបទពិសោធន៍ ។
២-អ្នកជក់បារីដែលគ្មានការតាំងចិត្តលះបង់ការជក់បារី
បន្ទាប់ពីពិនិត្យរួចហើយ បើអ្នកជំងឺមិនទាន់មានការតាំងចិត្តព្យាយាមលះបង់ទេ អ្នកគួរប្រើវិធីសាស្ត្រលើកទឹកចិត្ត (ជំហាន៥យ៉ាងក្នុងការជួយអ្នកជក់បារីដែលគ្មានការតាំងចិត្តលះបង់) ដើម្បីជំរុញគាត់ឱ្យលះបង់ ។
ជំហាន៥យ៉ាង ក្នុងការជួយអ្នកជក់បារីដែលគ្មានការតាំងចិត្តលះបង់ការជក់បារី
ការជាប់ទាក់ទង
ជួយអ្នកជក់បារីឱ្យកំណត់នូវមូលហេតុផ្ទាល់ខ្លួនសំរាប់លះបង់ការជក់បារី ។
ការផ្តល់ប្រឹក្សារបស់អ្នកនឹងផ្តល់ផលល្អបំផុតប្រសិនបើការផ្តល់ប្រឹក្សានោះមានទំនាក់ទំនងយ៉ាងច្បាស់ជាមួយស្ថានភាពសុខភាព អាយុ ស្ថានភាពគ្រួសារ ឬសង្គម (ឧ. មានកូននៅផ្ទះ) បទពិសោធន៍លះបង់កន្លងទៅ និងកត្តារារាំងផ្សេងៗទៀតរបស់អ្នកជំងឺ ។
ការប្រឈមគ្រោះថ្នាក់
លើកទឹកចិត្តអ្នកជំងឺឱ្យពិភាក្សាពីផលប៉ះពាល់ដែលអាចកើតមានពីការជក់បារី ទៅលើរូបគាត់
-ការប្រឈមគ្រោះថ្នាក់ភ្លាមៗ ៖ ហត់ ក្អក ការធ្វើឱ្យជំងឺហឺតកាន់តែធ្ងន់ធ្ងរ ការប៉ះពាល់ដល់ផ្ទៃពោះ ការបាត់បង់សមត្ថភាពផ្លូវភេទ
-ការប្រឈមគ្រោះថ្នាក់យូរអង្វែង ៖ គាំងបេះដូង និងជំងឺស្ត្រូក ជំងឺសួត ជំងឺមហារីកផ្សេងៗ ជំងឺរលាកទងសួត និងជំងឺហើមសួតរ៉ាំរៃ
-កត្តាគ្រោះថ្នាក់បរិយាកាសជុំវិញ ៖ មហារីកសួត និងជំងឺបេះដូងចំពោះប្តី ឬប្រពន្ធ ទារក មានទំងន់ទៀបពេលកើត ជំងឺហឺត និងជំងឺផ្លូវដង្ហើមលើកុមាររបស់អ្នកជក់បារី ។ (នៅមានត)
ចែករំលែកព័តមាននេះ