ខេត្តបាត់ដំបង ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា សមិទ្ធផលផ្លូវនេះបម្រើទៅដល់គោលដៅនយោបាយគឺគោលដៅប្រែក្លាយតំបន់អតីតសមរភូមិប្រយុទ្ធឱ្យទៅជាតំបន់អភិវឌ្ឍន៍ និងប្រែក្លាយតំបន់ព្រំប្រទល់ដែនទាំងអស់របស់ព្រះរាជាណាចក្រកម្ពុជាឱ្យទៅជាតំបន់ដែលមានសុខសន្តិភាព កិច្ចសហប្រតិបត្តិការ ការអភិវឌ្ឍសេដ្ឋកិច្ច និងជាទីផ្សារ។
សម្តេចតេជោនាយករដ្ឋមន្ត្រីមានប្រសាសន៍បែបនេះនាព្រឹកថ្ងៃទី២១ ខែមីនា ក្នុងឱកាសអញ្ជើញជាអធិបតីក្នុងពិធីបើកការដ្ឋានស្ថាបនាផ្លូវជាតិលេខ៥៧B មានចម្ងាយ១៧៦,៣៥គីឡូម៉ែត្រ ដោយមានការអញ្ជើញចូលរួមផងដែរពីលោកផាន គ័ងស៊ា ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជា។ ការស្ថាបនាផ្លូវជាតិលេខ៥៧Bនេះធ្វើឡើងក្រោមឥណទានកម្ចីសម្បទានរបស់សាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា ហើយពិធីបើកការដ្ឋានបានប្រារព្ធធ្វើនៅក្នុងបរិវេណអនុវិទ្យាល័យភូមិថ្មី ឃុំបន្សាយត្រែង ស្រុកថ្មគោល ។
សម្តេចតេជោនាយករដ្ឋមន្ត្រីមានប្រសាសន៍ថា សន្តិភាព និងការបង្រួបបង្រួមជាតិដែលយើងរកបានទាំងលំបាក តំបន់ដែលជាអតីតសមរភូមិប្រយុទ្ធក្តៅគគុកបានបញ្ចប់ ហើយត្រូវប្រែក្លាយតំបន់ទាំងនោះឱ្យទៅជាតំបន់អភិវឌ្ឍន៍ទាំងអស់។ ដូច្នេះហើយក្នុងស្មារតីបង្រួបបង្រួមជាតិ ការរក្សាបានសន្តិភាព និងស្ថិរភាពនយោបាយជាលក្ខខណ្ឌមិនអាចខ្វះបានសំរាប់ការអភិវឌ្ឍសេដ្ឋកិច្ច និងសង្គម។ ជាពិសេស ផ្លូវនេះមិនត្រឹមតែជាសក្ខីភាពនៃការរឹតចំណងមិត្តភាព និងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងកម្ពុជា ជាមួយចិនប៉ុណ្ណោះទេ ប៉ុន្តែគឺជាវិភាគទានគន្លឹះ និងប្រកបដោយសក្តានុពលសំរាប់ទ្រទ្រង់ដល់ដំណើរការអភិវឌ្ឍសង្គម-សេដ្ឋកិច្ចក្នុងគោលបំណងកាត់បន្ថយភាពក្រីក្ររបស់ប្រជាពលរដ្ឋកម្ពុជាទៀតផង។
សម្តេចតេជោមានប្រសាសន៍ទៀតថា ផ្លូវនេះគឺជាបណ្តាញផ្លូវដែលមានប្រវត្តិ និងភូមិសាស្ត្រទាក់ទងគ្នាយ៉ាងជិតស្និទ្ធ និងប្រទាក់ក្រឡាបំពេញទៅដោយសក្តានុពលទៅវិញទៅមកជាមួយផ្លូវជាតិលេខ៥៧។ ដូច្នេះផ្លូវជាតិលេខ៥៧B គឺជាការបន្ថែមនូវធាតុចូលថ្មីមួយទៀតសំរាប់ជួយដល់ការកែប្រែជីវភាពរស់នៅរបស់បងប្អូនប្រជាពលរដ្ឋក្នុងតំបន់នេះ។ សមិទ្ធផលនេះគឺជាផ្លែផ្កានៃការអនុវត្តដោយជោគជ័យនូវនយោបាយឈ្នះ=ឈ្នះរបស់រាជរដ្ឋាភិបាលដែលបានបញ្ចប់ជាស្ថាពរនូវអង្គការចាត់តាំងនយោបាយ និងយោធារបស់របបប្រល័យពូជសាសន៍ប៉ុល ពត និងកសាងបាននូវការឯកភាពជាតិទាំងមូល។
សម្តេចតេជោមានប្រសាសន៍បន្តថា សរសៃឈាមសេដ្ឋកិច្ចដែលប្រទាក់ក្រឡាគ្នាទៅវិញទៅមក និងប្រកបដោយសក្តានុពលទាំងនេះពិតជារួមចំណែកប្រែក្លាយតំបន់ដាច់ស្រយាល និងតំបន់ព្រំដែននេះឱ្យទៅជាតំបន់ដែលមានការអភិវឌ្ឍយ៉ាងឆាប់រហ័ស ព្រោះវានឹងជួយឱ្យបងប្អូនប្រជាពលរដ្ឋយើងមានភាពងាយស្រួលក្នុងការប្រកបរបររកចំណូលសំរាប់ផ្គត់ផ្គង់ និងលើកកម្ពស់ជីវភាពរស់នៅដោយការនាំផលិតផលទំនិញទៅផ្លាស់ប្តូរនៅតាមច្រកព្រំដែន។ ការតភ្ជាប់ប្រទាក់ក្រឡាគ្នានៃហេដ្ឋារចនាសម្ព័ន្ធគមនាគមន៍នេះ អាចសម្រេចបានការធ្វើចរាចរណ៍ដឹកជញ្ជូនទៅកាន់ទីរួមខេត្តបាត់ដំបង និងបន្តទៅទីរួមខេត្តប៉ៃលិន បន្តតាមផ្លូវជាតិលេខ៥៧ឆ្ពោះទៅកាន់ព្រំដែនកម្ពុជា-ថៃត្រង់ច្រកផ្សារព្រំ។ ដូច្នេះខេត្តបាត់ដំបងនៅតែជាជង្រុកស្រូវដែល ដីបង្កបង្កើនផលសំរាប់ដាំដុះមានជាង២២ម៉ឺន៥ពាន់ហិកតា និងនៅតែជាមជ្ឈមណ្ឌលកសិកម្ម ហើយទៅខាងមុខអាចក្លាយទៅជាមជ្ឈមណ្ឌលកសិ-ឧស្សាហកម្ម ព្រោះឯកអគ្គរដ្ឋទូតចិនបានសរសើរអង្ករបាត់ដំបង ដំឡូងជាង១លានតោនពោតមានជាងកន្លះលានតោន។
ការងើបឡើងវិញបន្តិចម្តងៗមកដល់ដំណាក់កាលនេះ ពីការខ្វះស្រូវ អង្ករទៅកាន់ប្រទេសមួយក្នុងឋានៈជាអ្នកនាំចេញអង្ករ ទោះបីនាំចេញដោយផ្ទាល់ខ្លួនឯងមិនបានច្រើនក៏ដោយ មូលហេតុដោយមានកង្វះម៉ាសីុនកិនស្រូវ ខ្វះថវិកាប្រមូលទិញ ខ្វះឡសម្ងួត ឃ្លាំងស្តុក ។ ការបាត់បង់ការងារធ្វើរបស់ប្រជាពលរដ្ឋកម្ពុជាដោយសារកង្វះដូចរៀបរាប់ខាងលើ ប្រជាពលរដ្ឋបាត់តម្លៃបន្ថែម បើសិនជាមានកម្ពុជាអាចនៅសល់កន្ទក់ អង្កាម ចុងអង្ករក៏នៅសល់។ ប៉ុន្តែយ៉ាងណាក៏ដោយ សម្តេចតេជោនាយករដ្ឋមន្ត្រីបញ្ជាក់ថា កម្ពុជាប្រែក្លាយពីប្រទេសដែលខ្វះអង្ករទៅជាប្រទេសមួយនាំចេញអង្ករ។
លោកត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងឱ្យដឹងថា ផ្លូវជាតិលេខ៥៧Bនេះមានប្រវែងសរុប១៧៦,៣៥គីឡូម៉ែត្រ ទទឹង១១ម៉ែត្រ ចំណុចចាប់ផ្តើមពីថ្មគោលដែលបែកចេញជាផ្លូវខ្នែងមាន៣កំណាត់ឆ្ពោះទៅព្រំដែនថៃទាំងអស់។ កំណាត់ទី១ពីថ្មគោល-បវេល-សំពៅលូនប្រវែង៩០,២០គីឡូម៉ែត្រ។ កំណាត់ទី២ ពី បវេល-ភូមិសាមសិប-ភ្នំព្រឹក ប្រវែង៦៩,៧៥គីឡូម៉ែត្រ និងកំណាត់ទី៣ ពី ភូមិសាបសិប-កំរៀង-អូរដាមានប្រវែង១៦,៤០គីឡូម៉ែត្រ។
ផ្លូវជាតិលេខ៥៧B នេះសាងសង់ឡើងតាមស្តង់ដាផ្លូវថ្នល់កំរិតទី៣ ជាប្រភេទផ្លូវក្រាលថ្មចាក់កៅស៊ូ២ជាន់ DBST ដែលត្រូវចំណាយថវិកាសរុបប្រមាណ៨៩.៩៨០.០០០ដុល្លារអាមេរិក និងថវិការបស់រាជរដ្ឋាភិបាលដែលការកសាងមានរយៈពេល៤៨ខែ គ្រោងនឹងបញ្ចប់នៅថ្ងៃទី១៥ ខែធ្នូ ឆ្នាំ២០១៤។ ផ្លូវជាតិលេខ៥៧Bនេះ គឺជាផ្លូវយុទ្ធសាស្ត្រសំខាន់តភ្ជាប់ទៅនឹងតំបន់ដែលសំបូរដោយដីមានជីជាតិ និងជាតំបន់សមាហរណកម្មដែលទើបអភិវឌ្ឍថ្មីរបស់ខេត្តបាត់ដំបងដូចជាសំពៅលូន ភ្នំព្រឹក និងសំឡូត។ល។
លោកផាន គ័ងស៊ា ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជា បានថ្លែងថា «ខ្ញុំសង្ឃឹមថា ក្រុមហ៊ុនសាជីវកម្មផ្លូវ និងស្ពានប្រទេសចិនដែលទទួលអនុវត្តស្ថាបនាផ្លូវជាតិលេខ៥៧Bនេះនឹងអនុវត្តការងារដោយផ្ចិតផ្ចង់ធ្វើសហប្រតិបត្តិការយ៉ាងជិតស្និទ្ធជាមួយប្រជាជន និងជាមួយអាជ្ញាធរដែនដីសំរាប់ការងារកសាងនេះប្រកបដោយគុណភាពខ្ពស់ ធ្វើវិភាគទានជួយដល់ការអភិវឌ្ឍសេដ្ឋកិច្ច-សង្គមរបស់ប្រទេសកម្ពុជា។ លោកឯកអគ្គរដ្ឋទូតចិនបញ្ជាក់ថា ខេត្តបាត់ដំបងជាជង្រុកស្រូវរបស់ប្រទេសកម្ពុជា អង្ករក្នុងខេត្តនេះមានទិន្នផលខ្ពស់តែសមត្ថភាពកែច្នៃមានកំរិត ដូច្នេះខ្ញុំយល់ឃើញថា អង្ករបាត់ដំបងអាចលើកកម្ពស់គុណភាព ហើយពង្រីកការនាំចេញដែលអង្ករបាត់ដំបងអាចល្បីទូទាំងពិភពលោក។ ការអភិវឌ្ឍកសិកម្ម គឺជាវិស័យមួយក្នុងយុទ្ធសាស្ត្រចតុកោណរបស់ប្រទេសកម្ពុជា។ រដ្ឋាភិបាលចិន យល់ព្រមបន្តផ្តល់ជំនួយនានាក្នុងវិស័យកសិកម្មរបស់ប្រទេសកម្ពុជា ៕
ចែករំលែកព័តមាននេះ