ខេត្តព្រះវិហារ ៖ ពេលនេះស្ថានការណ៍យោធានៅតាមខ្សែបន្ទាត់ព្រំដែនតំបន់ប្រាសាទព្រះវិហារមានសភាពស្ងប់ស្ងាត់មិនមានអ្វីគួរឱ្យកត់សំគាល់ទេ បន្ទាប់ពីមានការវាយប្រយុទ្ធគ្នាកាលពីដើមខែកុម្ភៈកន្លងទៅនេះ ។ តាមសេចក្តីរាយការណ៍ឱ្យដឹងថា ចាប់ពីចំណុចព្រំប្រទល់មុំបីរហូតដល់ចំណុចប្រាសាទតាមាន់ធំមិនមានបញ្ហាអ្វីទេ ដោយកងទ័ពទាំងពីរភាគីឈរជើងនៅលើចំណុចទីតាំងរៀងៗខ្លួន ។
កាលពីព្រឹកថ្ងៃទី២៥ មីនា កន្លងមកនេះ ស្ថិតនៅជើងភ្នំប្រាសាទព្រះវិហារលោកនាយឧត្ដមសេនីយ៍ផ្កាយមាស៤គន់ គីមអគ្គមេបញ្ជាការរងនៃកងយោធពលខេមរភូមិន្ទ និងជានាយសេនាធិការចំរុះមានប្រសាសន៍ប្រាប់អ្នកយកព័ត៌មានកោះសន្ដិភាពថា ពេលនេះស្ថានការណ៍យោធានៅតាមបណ្ដោយខ្សែបន្ទាត់ព្រំដែនខ្មែរ-សៀម ពិសេសគឺនៅតំបន់ប្រាសាទព្រះវិហារមិនមានអ្វីប្រែប្រួលគួរឱ្យកត់សំគាល់ទេ ប៉ុន្ដែលោកនាយឧត្ដមសេនីយ៍បញ្ជាក់ថា ទោះជាស្ថានការណ៍ស្ថិតក្នុងសភាពស្ងាត់ស្ងៀមក៏ពិតមែន ក្នុងស្មារតីរបស់នាយ និងពលទាហានទាំងអស់ក្នុងកាតព្វកិច្ចជាអ្នកការពារជាតិ និងទឹកដីគឺគ្រប់ពេលវេលាតែងតែមានការប្រុងប្រយ័ត្នជានិច្ចក្នុងការទប់ទល់ជាមួយពួកបច្ចាមិត្ដ ។
លោកនាយឧត្ដមសេនីយ៍គន់ គីម បានឱ្យដឹងអំពីស្ថានភាព រស់នៅរបស់កងទ័ពនៅលើខ្នងភ្នំដងរែកនារដូវនេះថា ពេលថ្ងៃអាកាសធាតុក្ដៅខ្លាំង រីឯពេលយប់មានខ្យល់ និងត្រជាក់ខ្លាំង ។ ទោះជាជួបអាកាសធាតុត្រជាក់ក្តី តែកងទ័ពខ្មែរពុំមានបញ្ហាសុខភាពអ្វីទេដោយសារទទួលការឧបត្ថម្ភអាវរងាពីសម្ដេចអគ្គមហាសេនាបតីតេជោហ៊ុន សែន និងលោកជំទាវបណ្ឌិតប៊ុន រ៉ានី ហ៊ុនសែន ។ ចំណែកគ្រឿងឧបភោគបរិភោគវិញ គឺបានមកពីការផ្គត់ផ្គង់ពីរាជរដ្ឋាភិបាល ព្រមទាំងការជួយឧបត្ថម្ភបន្ថែមពីបណ្ដាសប្បុរសជននានាធ្វើឱ្យផ្នែកជីវភាពមិនមានការខ្វះខាតទេ ៕
ចែករំលែកព័តមាននេះ