ក្រុងប៉ោយប៉ែត ៖ នាព្រឹកថ្ងៃទី២៩ មករា ២០១២នេះ មន្ត្រីជំនាញគយ និងរដ្ឋាករទីស្នាក់ការច្រកទ្វារអន្តរជាតិប៉ោយប៉ែតនៅតែបន្តសកម្មភាពចាប់រថយន្តដឹកហ្គាសគេចពន្ធមកពីប្រទេសថៃចូលតាមច្រកប៉ោយប៉ែតដូចភ្លៀងរលឹម ។
តាមការបំភ្លឺពីមន្ត្រីគយចល័តផ្សារកណ្តាលឈរជើងនៅលើក្បាលស្ពានមិត្តភាពកម្ពុជា-ថៃមាត់ច្រកទ្វារអន្តរជាតិប៉ោយប៉ែតនោះ បានឱ្យដឹងថា ក្រុមមន្ត្រីជំនាញរបស់លោកបានចុះបង្ក្រាបបទល្មើសក្រុមឈ្មួញរកស៊ីដឹកហ្គាសគេចពន្ធមកពីប្រទេសថៃ ហើយមិនអនុញ្ញាតឱ្យពួកឈ្មួញខិលខូចទាំងអស់នោះប្រព្រឹត្តនូវបទល្មើសបែបនេះតទៅទៀតបានឡើយ។ មន្ត្រីជំនាញបន្តថា នាពេលកន្លងមកក្រុមឈ្មួញបានយករថយន្តម៉ាកកាមរី ឡង់គ្រីស្ស័រ ឡិចសីុសសេ៊រីទំនើបៗជាច្រើនគ្រឿងកែច្នៃដាក់ធុងហ្គាសធុនធំពីទៅបីបញ្ចូលគ្នាតែមួយនៅក្នុងរថយន្តនោះហើយចេញចូលទៅក្នុងប្រទេសថៃ ក្នុង១ថ្ងៃប្រមាណជិត១០ជើងដោយទិញហ្គាសគេចពន្ធនាំចូលមកក្នុងប្រទេសកម្ពុជា តាមច្រកទ្វារប៉ោយប៉ែត និងបន្តលក់ចែកចាយឱ្យដេប៉ូលក់ហ្គាសឈ្មោះតាថុល នៅជាប់ផ្លូវជាតិលេខ៥ យ៉ាងគគ្រឹកគគ្រេងរបៀបអនាធិតេយ្យដោយពុំមានខ្លាចក្រែង និងញញើតច្បាប់ឡើយ ។
លោកខ័ណ រ៉ាអេលីត ប្រធានក្រុមមន្ត្រីគយចល័តផ្សារកណ្តាលបានឱ្យដឹងថា ការចុះប្រតិបត្តិការបង្ក្រាបនូវបទល្មើសគេចពន្ធនេះដោយយោងទៅតាមបទបញ្ជារបស់ថ្នាក់លើបានដាក់បទបញ្ជាឱ្យមន្ត្រីជំនាញយកចិត្តទុកដាក់ឱ្យដូចជាភ្លៀងរលឹមយ៉ាងអីុចឹង គឺធ្វើយ៉ាងណាទាល់តែក្រុមឈ្មួញខិលខូចទាំងអស់នោះរាងចាលតែម្តង។ លោកប្រធានក្រុមបានបញ្ជាក់ឱ្យដឹងថា ចាប់ពីថ្ងៃទី២៧ ដល់ព្រឹកថ្ងៃទី២៩ មករា ២០១២ នេះមន្ត្រីជំនាញរបស់លោកចាប់បានរថយន្តដឹកហ្គាសគេចពន្ធសរុបចំនួន៥គ្រឿងផងដែរ ហើយបានយកទៅរក្សាទុកនៅក្នុងទីស្នាក់ការគយនិងរដ្ឋាករច្រកប៉ោយប៉ែតដើម្បីកសាងសំណុំរឿងនិងពិន័យឱ្យបង់ពន្ធឱ្យបានត្រឹមត្រូវតាមច្បាប់ ។
លោកប្រធានបានបន្តថា ចំពោះរថយន្តរបស់ក្រុមឈ្មួញដែលនៅសល់ចាប់មិនទាន់បានហើយពួកគេនៅតែហ៊ានប្រព្រឹត្តល្មើសខុសច្បាប់តទៅទៀតនោះបើមន្ត្រីជំនាញរបស់លោកចាប់បាន និងកសាងសំណុំរឿងបញ្ជូនទៅតុលាការចាត់ការតាមច្បាប់តែម្តង៕
ចែករំលែកព័តមាននេះ