ប្រធានសហព័ន្ធបាល់ទាត់អឺរ៉ុប បានធ្វើការអំពាវនាវឱ្យការប្រកួតបាល់ទាត់ពិភពលោក២០២២ ដែលកាតាជាម្ចាស់ផ្ទះរៀបចំការប្រកួតគួររៀបចំឡើងនៅក្នុងរដូវរងាក្នុងតំបន់អឺរ៉ុប ដើម្បីចៀសផុតពីអាកាសធាតុក្តៅ ប្រសិនបើរៀបចំនៅក្នុងខែមិថុនា ។ ទីភ្នាក់ងារព័ត៌មានអង់គ្លេស បានធ្វើការសម្ភាសន៍លោកម៉ៃឃើល ផ្លាទីនី ប្រធានសហព័ន្ធបាល់ទាត់អឺរ៉ុប (UEFA) ដែលមានផែនការការពន្យាពេលប្រកួតបាល់ទាត់ពិភពលោក ពីក្នុងអំឡុងខែមិថុនា និងកក្កដា ។
លោកផ្លាទីនី បញ្ជាក់ថា បាល់ទាត់ពិភពលោកជាព្រឹត្តិការណ៍ដ៏សំខាន់ រៀបចំឡើងរយៈពេល៤ឆ្នាំម្តង ហើយលោកយល់ថា នឹងគ្មានបញ្ហាប្រសិនបើពន្យាពេលប្រកួតទៅក្នុងខែធ្នូ ។ ទោះបីជាយ៉ាងណាក៏ដោយ មានការរំពឹងទុកថា សំណើរបស់លោកផ្លាទីនី នឹងទទួលរងការជំទាស់ពីក្របខណ្ឌបាល់ទាត់ធំៗនៅតំបន់អឺរ៉ុប ព្រោះអាចប៉ះពាល់ដល់តារាងប្រកួតបាល់ទាត់នៅក្នុងលីករបស់ប្រទេស ។
ក្នុងអំឡុងពេល៣ឆ្នាំមុនពេលឈានចូលដល់ការប្រកួតបាល់ទាត់ពិភពលោក លោកផ្លាទីនី បញ្ជាក់ថា អ្វីដែលគេត្រូវគិតគូរក្នុងជំហានដំបូង គឺការប្រកួតបាល់ទាត់ពិភពលោក និងអ្នកគាំទ្របាល់ទាត់ ។ លោកបានបញ្ជាក់ទៀតថា គ្មានការជំទាស់អ្វីឡើយក្នុងអំឡុងពេលដែលគេជ្រើសរើសយកប្រទេសកាតាជាម្ចាស់ផ្ទះ និងតម្រូវការនៃការផ្លាស់ប្តូរពេលវេលាធ្វើការប្រកួត ៕
ចែករំលែកព័តមាននេះ