ខេត្តព្រៃវែង ៖ កម្ពុជាជាប្រទេសមួយដែលសម្បូរដោយរមណីយដ្ឋានធម្មជាតិ និងប្រាង្គប្រាសាទបុរាណជាច្រើនកន្លែងបានទាក់ទាញភ្ញៀវជាតិ និងអន្តរជាតិស្ទើរគ្រប់ជាតិសាសនមកទស្សនាកម្សាន្ត ។ តាមការកត់សម្គាល់ជារៀងរាល់ថ្ងៃព្រហស្បតិ៍ គេឃើញរថយន្តក្រុងទំនើបៗគ្រប់ប្រភេទដឹកភ្ញៀវទេសចរវៀតណាមមកកម្សាន្តនៅប្រទេសកម្ពុជា ។
លោកស្រីអេង ណាវី ប្រធានមន្ទីរទេសចរណ៍ខេត្តបានឱ្យដឹងថា ភ្ញៀវទាំងនោះភាគច្រើនមកពីប្រទេសវៀតណាម ។ លោកស្រីបញ្ជាក់ថា ជារៀងរាល់ថ្ងៃព្រហស្បតិ៍មានរថយន្តក្រុងពី៥ទៅ៨គ្រឿងដឹកភ្ញៀវទេសចរវៀតណាមចូលតាមច្រកទ្វារអន្តរជាតិបាវិតឆ្លងកាត់ខេត្តស្វាយរៀង ព្រៃវែង កំពង់ចាម កំពង់ធំ ឆ្ពោះទៅកាន់ខេត្តសៀមរាប តាមបណ្តោយផ្លូវជាតិលេខ១ ផ្លូវជាតិលេខ១១ ផ្លូវជាតិលេខ៨ ឆ្ពោះទៅផ្លូវជាតិលេខ៦ ។ថ្មីៗនេះ ចាប់តាំងពីថ្ងៃទី២៣ រហូតដល់ថ្ងៃទី២៦ មករា រថយន្តក្រុងដឹកភ្ញៀវទេសចរវៀតណាមមានការកើនឡើងពី១០ ទៅ១៥គ្រឿង និងឈានរហូតដល់២០គ្រឿងក៏មានដោយឆ្លងចូលខេត្តស្វាយរៀងរួចមកហូបបាយនៅខេត្តព្រៃវែងទើបបន្តដំណើរឆ្ពោះទៅខេត្តសៀមរាប និងខេត្តព្រះវិហារ ។ ក្រុមភ្ញៀវវៀតណាមពេលត្រឡប់ទៅវិញចូលតាមរាជធានីភ្នំពេញធ្វើដំណើរតាមផ្លូវជាតិលេខ១ ឆ្ពោះទៅប្រទេសវៀតណាមតែម្តង ។
លោកស្រីបានមានប្រសាសន៍បន្តថា កំណើនភ្ញៀវទេសចរ គឺដោយសារមានការដឹកនាំប្រកបដោយគតិបណ្ឌិតរបស់ប្រមុខរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន បានធ្វើឱ្យប្រទេសកម្ពុជាក្លាយជាប្រទេសអច្ឆរិយដោយអភិវឌ្ឍប្រទេសចេញពីសង្គ្រាមដ៏រ៉ាំរ៉ៃមកមានសន្តិភាពគ្របដណ្តប់ពេញផ្ទៃប្រទេស និងមានការអភិវឌ្ឍលើគ្រប់វិស័យយ៉ាងឆាប់រហ័ស ពិសេសគឺវិស័យទេសចរណ៍ដែលបច្ចុប្បន្នកំពុងក្លាយជាឧស្សាហកម្មគ្មានផ្សែងដ៏មានសក្តានុពលមួយយ៉ាងសំខាន់ ៕
ចែករំលែកព័តមាននេះ