ខេត្ដកំពត ៖ ប្រៀបដូចរន្ទះនៅក្នុងបេះដូង ខណៈតែមិនទាន់បានខ្លួននៅឡើយ និងរង់ចាំរាត្រីទឹកឃ្មុំដ៏អន្ទះសា ស្រាប់តែភរិយាថ្មោងថ្មី ប្រគល់ទាំងកាយទាំងចិត្ដឱ្យប្រុសសហាយទៅវិញ ហើយអ្វីដែលហួសចិត្ដបំផុតនោះ ប្រុសសហាយគឺជាសង្ឃថែមទៀត ។ នេះគឺជាការរៀបរាប់របស់បុរសខកចិត្ដម្នាក់ដែល មានវាសនាអភ័ព្វជាងបុរសដទៃ ព្រោះតែរៀបការទៅតាមគន្លងប្រពៃណី សង្ឃឹមស្រស់ស្រីផ្ដល់ក្ដីមេត្ដា ដាក់ទានសម្ពស្សសំរាប់ស្នេហា នែបនិត្យកាយាមិនឱ្យហ្មងសៅ តែផ្ទុយទៅវិញ ៣រាត្រីហើយបានត្រឹមតែដេកយល់សប្ដិ និងមិនតែប៉ុណ្ណោះបែរជាទៅនែបនិត្យជាមួយប្រុសសហាយជាសង្ឃទៅវិញ ។
ចំពោះមុខអ្នករាយការណ៍ព័ត៌មាន ចាន់ ពេជ្រ ជាកម្មករផ្សារដែកនៅរោងចក្រស៊ីម៉ង់ត៍ខេស៊ីមេនកំពត បានរៀបរាប់នូវរឿងរ៉ាវនេះដែលបានកើតមានក្នុងខែឧសភា កន្លងមកថ្មីៗនេះ ។ ពិធីមង្គលការរបស់គេបានរៀបចំតាម គន្លងប្រពៃណីខ្មែរ កាលពីថ្ងៃ ១០កើត ខែ អាសាឍ ត្រូវនឹងថ្ងៃទី២៣ ឧសភា ២០១០។ កូនក្រមុំឈ្មោះម៉ុក ចរិយា អាយុ១៩ឆ្នាំ នៅភូមិច្រកឃ្លៃ ឃុំទូកមាសខាងលិច ស្រុកបន្ទាយមាស ឯកូនកម្លោះគឺរូបគេឈ្មោះចាន់ ពេជ្រ អាយុ២២ឆ្នាំ នៅភូមិថ្មី ឃុំស្ដេចគង់ ខាងត្បូង ស្រុកបន្ទាយមាស ។
ចាន់ ពេជ្រ និយាយថា ការឈានដល់រៀបអាពាហ៍ពិពាហ៍ជាមួយនាងម៉ុក ចរិយា គឺដោយការមាននិស្ស័យស្រឡាញ់ពិតប្រាកដ ខណៈដែលរូបគេបានជួបនាងពេលមកធ្វើជាកម្មករផ្សារដែកនៅរោងចក្រផលិតស៊ីម៉ង់ត៍ (ខេស៊ីមេនកំពត) ដោយជិះម៉ូតូចុះឡើងតាម បណ្ដោយផ្លូវលំទៅកាន់រោងចក្រទើបខ្លួន មានអារម្មណ៍មួយដែលស្រឡាញ់ នាងចរិយា រហូតបាត់មុខមិនបាន ។ បំណាច់តែស្រឡាញ់ ហើយគេក៏បង្ខំចិត្ដម្ដាយដែលពិការភ្នែកនិង ជាស្ដ្រីមេម៉ាយផង ចូលចែចូវស្ដីដណ្ដឹងម្ដាយ ឪពុកនាងចរិយាតាមច្បាប់ប្រពៃណី ដោយមានការបង្គាប់ថ្លៃទឹកដោះពីខាងស្រី១ពាន់ដុល្លារ តែរូបគេបានអង្វរសុំជូនទៅខាងស្រី ត្រឹមតែ៣លានរៀល ខាងស្រីយល់ព្រម ហើយពិធីមង្គលការក៏បានរៀបចំឡើង ដោយមិនមានបញ្ហាអ្វីទាំងអស់ ។
ចាន់ ពេជ្រ បានរៀបរាប់ថា បន្ទាប់ពីរៀបការហើយរយៈពេល៣ថ្ងៃគត់ ខ្លួនមិនបានក្រេបទឹកឃ្មុំក្នុងរាត្រីផ្សំដំណេកនោះទេ ហើយខ្លួនបានសុំរួមរ័កភ្ជាប់និស្ស័យ តែនាងចរិយា មិនឱ្យ បានត្រឹមតែស្ទាបអង្អែលលេង នាយអាយប៉ុណ្ណោះនៅយប់ទី១ ហើយការស៊ីជំរៅជាងនេះនាងមិនឱ្យ ។ យប់ទី២នាងក៏ មិនឱ្យទៀតក៏មានការសង្ស័យ ។ លុះដល់យប់ទី៣ វេលាម៉ោងប្រហែលជា៧និង៣០ នាទីនាងចរិយាជាប្រពន្ធបានសុំខ្លួនជាប្ដីចុះពីលើផ្ទះ ថាទៅបត់ជើង ឯខ្លួននៅដេកចាំ យ៉ាងអន្ទះសាព្រោះបាត់យូរពេក ។ ដោយទ្រាំមិនបានក៏ចុះពីលើផ្ទះតាមរកប្រពន្ធភ្លាម ប៉ុន្ដែនាងបានដាក់គន្លឹះទ្វារខាងក្រៅមិនឱ្យ គេជាប្ដីចុះដីបានឡើយ។
បុរសអភ័ព្វនិយាយទៀតថា ទោះជាមានការខ្ទាស់ទ្វារមិនឱ្យខ្លួនចុះក៏ដោយ ក៏រូបគេព្យាយាមដកគន្លឹះទ្វារទាល់តែបាន ហើយចុះមកក្រោម ដើរសំដៅរោងខាងលិចផ្ទះ ក៏ឃើញប្រពន្ធខ្លួនកំពុងស្លៀកពាក់ ហើយក៏បានឃើញមនុស្សម្នាក់ស្ទុងៗ ដើរកាត់ស្រែ សំដៅទៅវត្ដ ខ្លួនក៏ខំព្យាយាមរត់តាមពីក្រោយរហូតទាន់ ទើបដឹងថា ជាសង្ឃ ទើបខ្លួនត្រឡប់មកវិញ ។ ទិដ្ឋភាពនេះបានធ្វើឱ្យ រូបគេអស់សង្ឃឹមក្នុងការភ្ជាប់និស្ស័យតទៅទៀត ក៏បានប្រាប់ម្ដាយក្មេកពីអ្វីដែលខ្លួនបានឃើញ តែម្ដាយក្មេកបានបដិសេធទៅវិញ ។
ទោះជាម្ដាយក្មេកមិនព្រមទទួលយកការរៀបរាប់ពីអ្វីដែលខ្លួនជាប្ដីបានឃើញក៏ដោយ ក៏រូបគេជឿជាក់ខ្លាំងណាស់ ក៏បានចាកចេញពីផ្ទះនាងចរិយា ទាំងយប់ មិនអាឡោះអាល័យតទៅទៀតទេ ទោះជាស្រលាញ់នាងស្ទើរ លេបក៏ដោយ ។ ចាន់ ពេជ្រ បានគិតថា នាងប្រពន្ធលួចមានសហាយបែបនេះហើយបានជាមិនឱ្យរូបគេជាប្ដីទើបនឹងរៀបការរួមរ័ក ។ លោកជ័យ ពុធ មេភូមិច្រកឃ្លៃ បានមានប្រសាសន៍ថា នាងម៉ុក ចរិយា និងឈ្មោះចាន់ ពេជ្រ បានធ្វើការដោះស្រាយគ្នារួចរាល់ហើយ ដោយសារតែខាងកូនក្រមុំមិនព្រមផ្សំដំណេកជាមួយ ។
លោកមេភូមិបានខំសម្របសម្រួលភាគីទាំង២ឱ្យយកគ្នាជាប្ដី ប្រពន្ធវិញដែរ តែចាន់ ពេជ្រ ជាប្ដីនិយាយថា មិនអាចយកវិញទេ ព្រោះនាងលួចមានសហាយជាមួយសង្ឃ ដែលខ្លួនបានតាមទាន់ទៀត ។ លោកមេភូមិបានសួរនាំទៅនាង ចរិយាថា បើមិនស្រលាញ់ ហេតុអ្វីក៏ព្រម រៀបការ? នាងបានឆ្លើយថា នាងមិនស្រលាញ់ទេ ចេះតែរៀបការបំពេញចិត្ដជីដូន ដែលមានជំងឺ ។ លោកមេភូមិនិយាយថា ខាងនាងចរិយា បានព្រមសងជាប្រាក់ដល់ ខាងប្រុសចំនួន២លានរៀលវិញ ។
ចំពោះសង្ឃដែលគេចោទប្រកាន់ថា លួចមានសហាយស្មន់ជាមួយប្រពន្ធគេនោះ ក៏បានចាកចេញពីវត្ដបាត់ស្រមោលផងដែរ បន្ទាប់ពីមានរឿងអាស្រូវនេះ ។ លោកឃ្លាំង ប៉ោ អាយុ៦៣ឆ្នាំ គ្រូអាចារ្យវត្ដអន្លុងស្ដោ ហៅវត្ដកោះវាំង បាននិយាយឱ្យដឹងថា សង្ឃព្រះនាម តោ រ៉ូ មានព្រះជន្ម១៩ឆ្នាំ គង់នៅវត្ដអន្លុងស្ដោមានរឿងរ៉ាវ២ដងហើយ នៅឆ្នាំ២០១០នេះ ។ លោកមិនបានចាំថ្ងៃខែទេ គឺលើកទី១ មានរឿងជាមួយនឹងនារីចរិយានោះ ដែរដោយសារតែឃើញនៅក្នុងបន្ទប់ជាមួយគ្នា ហើយគ្រូអាចារ្យក៏បានចាប់ផ្សឹកបានចំនួន២ខែ ស្រាប់តែមិនដឹងជាយ៉ាងម៉េចអន្ទឹត តោ រ៉ូ បានសុំចៅអធិការបួសជាសង្ឃទៀត ។
ឧបាសកជើងវត្ដមិនពេញចិត្ដឱ្យជនខិលខូច នោះបួសជាសង្ឃទេ ព្រោះវាមានឈ្មោះ អាស្រូវទៅហើយ ។ ស្រាប់តែនៅលើកទី២នេះ ក៏នៅតែទៅលួចលលេងនាងចរិយា បន្ដទៀត ទោះជានាងរៀបការ ហើយក៏ដោយ ។ តាអាចារ្យនិយាយថា សង្ឃកំហូចរូបនេះបានចាកចេញពីវត្ដបាត់ស្រមោល ព្រោះតែភ័យខ្លាចមានរឿង។ ម្យ៉ាងទៀត ប្ដីនាងរៀបការពេញច្បាប់បានតាមទាន់ទៀតផង ទើបធ្វើឱ្យសង្ឃនោះភ័យខ្លាចរត់បាត់ទៅ ៕
ចែករំលែកព័តមាននេះ