យោងតាមព័ត៌មានមួយចេញផ្សាយដោយគេហទំព័រមួយរបស់ប្រទេសអូស្ត្រាលីនៅថ្ងៃទី១០ មីនា ឱ្យដឹងថា រដ្ឋាភិបាលអូស្ត្រាលីកាលពីថ្ងៃទី១០ មីនា បានប្រគល់វត្ថុបុរាណដែលជាគ្រឿងតុបតែងលំអផលិតនៅយុគសម័យលោហៈ (Iron Age) ហើយត្រូវបានជនអគតិលួចពីផ្នូរបុរាណមកឱ្យប្រទេសកម្ពុជាវិញ ។ វត្ថុបុរាណទាំងនោះត្រូវបានគេអះអាងថា លួចពីផ្នូរបុរាណនៅក្នុងប្រទេសមួយនៅតំបន់អាស៊ីគឺប្រទេសកម្ពុជា ។ ពិធីប្រគល់វត្ថុបុរាណដ៏មានតម្លៃទាំងនោះដែលត្រូវបានធ្វើឡើងនៅស្ថានទូតកម្ពុជា ប្រចាំប្រទេសអូស្ត្រាលីស្ថិតក្នុងទីក្រុងកង់បេរ៉ា រដ្ឋធានីរបស់ប្រទេសនេះ មានការអញ្ជើញចូលរួមដោយឯកអគ្គរាជទូតកម្ពុជាប្រចាំប្រទេសអូស្ត្រាលីផងដែរ ។
ក្នុងឱកាសនោះដែរ លោក Dougald O’Reilly នាយកក្រុមឃ្លាំមើលកេរមរតក និងវត្ថុបុរាណរបស់ប្រទេសអូស្ត្រាលីមានប្រសាសន៍ថា រូបលោកមានក្តីរីករាយណាស់ដែលនៅថ្ងៃនេះទី១០ មីនា ជាឱកាសដ៏ពិសេស ហើយមានសារសំខាន់មួយ ដើម្បីធ្វើជាសាក្សីក្នុងពិធីប្រគល់វត្ថុបុរាណដែលត្រូវរត់ពន្ធដោយខុសច្បាប់ទៅឱ្យប្រទេសកម្ពុជាវិញ ហើយរដ្ឋាភិបាលអូស្ត្រាលីមានភាពត្រេកអរយ៉ាងខ្លាំងដែលពិធីនេះមានការអញ្ជើញចូលរួមដោយឯកអគ្គរាជទូតកម្ពុជាប្រចាំប្រទេសអូស្ត្រាលី ។ លោក Dougald មានប្រសាសន៍ថា វត្ថុបុរាណដែលផលិតពីសំរឹទ្ធិនៅចំពោះមុខយើងទាំងនេះជារបស់ដែលត្រូវបាននាំចេញដើម្បីដាក់លក់នៅតាមហាងលក់វត្ថុបុរាណនៅអាស៊ីនិងនៅលើពិភពលោក ។ វត្ថុបុរាណទាំងនេះសុទ្ធតែជារបស់មានតម្លៃបំផុត ។
វត្ថុបុរាណទាំងនេះមានតាំងពីយុគសម័យលោហៈរបស់កម្ពុជា ។ លោក Dougald O’ Reilly បានមានប្រសាសន៍ទៀតថា «វាជាកិត្តិយសមួយសម្រាប់ប្រទេសអូស្ត្រាលីក៏ដូចជារដ្ឋាភិបាលអូស្ត្រាលីក្នុងការធ្វើពិធីប្រគល់វត្ថុបុរាណវប្បធម៌ទាំងនេះ ទៅឱ្យពលរដ្ឋកម្ពុជាវិញ ហើយឆ្លៀតក្នុងឱកាសនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលដែលខិតខំប្រឹងប្រែងធ្វើឱ្យវត្ថុបុរាណទាំងនេះរួចផុតពីកណ្តាប់ដៃឈ្មួញទុច្ចរិតហើយខ្ញុំមានក្តីរីករាយណាស់ ដែលក្រុមឃ្លាំមើលកេរមរតក និងវត្ថុបុរាណចូលរួមក្នុងបញ្ហានេះ ខណៈពេលយើងបាននិងកំពុងធ្វើការអស់រយៈពេលជិត១ទសវត្សមកហើយ ដើម្បីកាត់បន្ថយការធ្វើពាណិជ្ជកម្មវត្ថុបុរាណ។
រដ្ឋមន្ត្រីក្រសួងវប្បធម៌ និងវិចិត្រសិល្បៈ អូស្ត្រាលីលោកស៊ីម៉ុន គ្រីន (Simon Crean) ថ្លែងថា វត្ថុបុរាណទាំងនេះនឹងត្រូវប្រគល់ទៅឱ្យក្រសួងវប្បធម៌ និងវិចិត្រសិល្បៈកម្ពុជាដើម្បីរក្សាទុកប្រកបសុវត្ថិភាព ។ លោកស៊ីម៉ុន គ្រីន ថ្លែងទៀតថា វត្ថុបុរាណដែលត្រូវប្រគល់ឱ្យកម្ពុជានេះមានដូចជាក្រវិល កងដៃ និងកងជើងច្នៃពីសំរឹទ្ធិជាច្រើនទៀត មានមកតាំងពីយុគសម័យលោហៈ ហើយត្រូវបានជនទុច្ចរិតនាំ យកមកប្រទេសអូស្ត្រាលីដើម្បីដាក់លក់តាមអ៊ីនធើរណេត ។
តាមការស្រាវជ្រាវរបស់ក្រុមឃ្លាំមើលកេរមរតក និងវត្ថុបុរាណអូស្ត្រាលីបានរកឃើញថា វត្ថុបុរាណទាំងនេះត្រូវបានលួចពីផ្នូរបុរាណនៅក្នុងប្រទេសកម្ពុជា ដែលជាការរំលោភបំពានច្បាប់កេរមរតកវប្បធម៌របស់ប្រទេសកម្ពុជា ។ លោករដ្ឋមន្ត្រីស៊ីម៉ុន គ្រីន ថ្លែងថា រដ្ឋាភិបាលអូស្ត្រាលីមានវិធានការយ៉ាងតឹងរ៉ឹងដើម្បីការពារប្រឆាំងការរត់ពន្ធ និងជួញដូរវត្ថុបុរាណ និងសម្បត្តិវប្បធម៌ដោយខុសច្បាប់ ។
ពិធីប្រគល់វត្ថុបុរាណនោះត្រូវបានធ្វើឡើងរួមគ្នាដោយស្ថានទូតព្រះរាជាណាចក្រកម្ពុជា ប្រចាំអូស្ត្រាលី និងខុទ្ទកាល័យវិចិត្រសិល្បៈរបស់នាយករដ្ឋមន្ត្រី និងគណៈរដ្ឋមន្ត្រីអូស្ត្រាលី ។ ក្នុងឱកាសនោះ លោកជុំ ស៊ុនរី ឯកអគ្គរាជទូតកម្ពុជាប្រចាំប្រទេសអូស្ត្រាលីបានថ្លែងអំណរគុណយ៉ាងជ្រាលជ្រៅចំពោះការិយាល័យវិចិត្រសិល្បៈ និងក្រុមឃ្លាំមើលកេរមរតក និងវត្ថុបុរាណអូស្ត្រាលី ដែលបានធ្វើការងារយ៉ាងលំបាក ដើម្បីជួយសង្គ្រោះវត្ថុបុរាណរបស់កម្ពុជា។
លោកជុំ ស៊ុនរី មានប្រសាសន៍ថា «ជំនួសមុខឱ្យរដ្ឋាភិបាលកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលអូស្ត្រាលី សម្រាប់វត្ថុបុរាណទាំងនេះ ។ ការប្រគល់វត្ថុបុរាណទាំងនេះរបស់អូស្ត្រាលីមកឱ្យកម្ពុជាវិញ បង្ហាញយ៉ាងច្បាស់ពីកិច្ចសហប្រតិបត្តិការ និងការយោគយល់គ្នារវាងកម្ពុជា និង អូស្ត្រាលី ក្នុងការការពារកេរមរតកវប្បធម៌ និងប្រយុទ្ធប្រឆាំងការធ្វើពាណិជ្ជកម្មសម្បត្តិវប្បធម៌ដោយខុសច្បាប់» ៕
ចែករំលែកព័តមាននេះ