រាជធានីភ្នំពេញ ៖ ដោយមានការណែនាំពីលោកកែប ជុតិមា អភិបាលរាជធានីភ្នំពេញ ក្នុងកិច្ចប្រជុំកាលពីពេលថ្មីៗកន្លងមកនេះ អង្គភាពលូទឹកនៃមន្ទីរសាធារណការ និងដឹកជញ្ជូនរាជធានីភ្នំពេញ បានដំណើរការដាក់ប្រព័ន្ធលូថ្មីមួយខ្សែមានមុខកាត់ពី៨តឹក ទៅ១ម៉ែត្រ លើកំណាត់មហាវិថីគីម អ៊ីលស៊ុង ដែលតំបន់នេះកន្លងមកមានការដក់ទឹក។ នៅព្រឹកថ្ងៃទី១៩ តុលា ២០១០ លោកនៅ សារឿន ប្រធានអង្គភាពលូទឹករាជធានីភ្នំពេញបានពិនិត្យសកម្មភាពដាក់ប្រព័ន្ធលូថ្មីធ្វើយ៉ាងណាឱ្យត្រឹមត្រូវតាមលក្ខណៈបច្ចេកទេសកុំឱ្យស្ទះទឹក និងឱ្យទឹកហូរបានលឿន ព្រោះនៅទីតាំងនេះត្រូវបានដាក់ប្រព័ន្ធលូមួយកំណាត់ផងដែរ ដោយឯកជន តែមិនមានលក្ខណៈបច្ចេកទេសត្រឹមត្រូវនោះទេ ដែលតំរូវឱ្យមានការរៀបចំជាថ្មីដោយមន្ត្រីជំនាញអង្គភាពលូទឹកក្នុងពេលនេះហើយមួយផ្នែកត្រូវដាក់ថ្មីដែលមានប្រវែង១២០០ម៉ែត្រ ចាប់ពីមហាវិថីសហព័ន្ធរុស្ស៊ីដល់ផ្លូវលេខ៦០៨ជាប់រង្វង់មូលទួលគោក។
លោកនៅ សារឿន ប្រធានអង្គភាពលូទឹក និងបូមទឹកបានឱ្យដឹងថា ការចំណាយទៅលើការស្ថាបនាប្រព័ន្ធលូថ្មីនេះ ជាបន្ទុករបស់ក្រុមហ៊ុនអូស្មាន់ហាសាន់ និងសាលារាជធានីភ្នំពេញ។ កន្លងមកក្រុមហ៊ុនអូស្មាន់ហាសាន់បានស្ថាបនារួចប្រមាណ៥០%ហើយ ហើយនៅសល់៥០% ទៀតស្ថាបនាដោយសាលារាជធានីភ្នំពេញ ដែលអនុវត្តដោយអង្គភាពលូទឹក ព្រោះ១កំណាត់ចុងក្រោយនេះមានផលប៉ះពាល់ខ្លះ និងទាមទារឱ្យមានការអនុវត្តតាមបច្ចេកទេសត្រឹមត្រូវ។
លោកប្រធានអង្គភាពលូទឹកបញ្ជាក់ថា ប្រព័ន្ធលូមេថ្មីនេះនឹងនាំទឹកចាក់ទៅលូកាត់ទទឹងមហាវិថីគីម អ៊ីលស៊ុង និងហូរបន្តចាក់ទៅអាង ស្តុកស្ថានីយបូមទឹកទួលគោកទី១។ ដោយសារការទទួលរងផលប៉ះពាល់ដោយជំនន់ទឹកភ្លៀងធ្វើឱ្យហេដ្ឋារចនាសម្ព័ន្ធផ្លូវថ្នល់ ប្រព័ន្ធលូមួយ ចំនួនក្នុងរាជធានីភ្នំពេញត្រូវខូចខាត។ ជាមួយគ្នានេះសាលារាជធានីភ្នំពេញក៏បានជូនដំណឹងពីការហាមឃាត់រថយន្តធុនធ្ងន់មិនឱ្យឆ្លងកាត់ផ្លូវមួយចំនួនដែលទឹកបានជន់លិចនាពេលថ្មីៗនេះផងដែរ៕
ចែករំលែកព័តមាននេះ