រាជធានីភ្នំពេញ ៖ ជនសង្ស័យជួញដូរគ្រឿងញៀនចំនួន៣នាក់ ត្រូវកម្លាំងប៉េអឹមខណ្ឌដូនពេញ ដឹកនាំដោយលោកវរសេនីយ៍ត្រីថោង ពិសិដ្ឋ ឃាត់ខ្លួននៅចំណុចកែងផ្លូវលេខ៨៦ និងមហាវិថីព្រះមុនីវង្ស (ខាងជើងសណ្ឋាគារភ្នំពេញ) ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង១១និង៣០នាទីយប់ថ្ងៃទី៨ មីនា បន្ទាប់ពីសមត្ថកិច្ចឆែកឆេររកឃើញថ្នាំញៀនក្រាមពណ៌សថ្លា (ម៉ាទឹកកក) ចំនួន២កញ្ចប់តូច ។
តាមប្រភពពីលោកវរសេនីយ៍ត្រីថោង ពិសិដ្ឋ មេបញ្ជាការប៉េអឹមខណ្ឌដូនពេញ បានឱ្យដឹងថា យោងតាមបទបញ្ជាលោកឧត្តមសេនីយ៍ទោយ៉ា គឹមអ៊ី មេបញ្ជាការរងប៉េអឹមលើផ្ទៃប្រទេស និងជាមេបញ្ជាការប៉េអឹមរាជធានីភ្នំពេញ កម្លាំងប៉េអឹមខណ្ឌដូនពេញ បានចុះបង្ក្រាបជនសង្ស័យជួញដូរគ្រឿងញៀននៅចំណុចកែងផ្លូវលេខ៨៦ និងមហាវិថីព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង១១និង៣០នាទីយប់ ខណៈពេលជនសង្ស័យកំពុងជួញដូរគ្រឿងញៀន ជាក់ស្តែងជាលទ្ធផលឃាត់ខ្លួនបាន៣នាក់ ។
ជនសង្ស័យ១-ឈ្មោះវិត អឿន ភេទប្រុស អាយុ២៩ឆ្នាំ ស្នាក់នៅផ្ទះជួលសង្កាត់ទួលទំពូង២ ខណ្ឌចំការមន ២-ឈ្មោះជាង រ៉េត ភេទប្រុស អាយុ៣០ឆ្នាំ ទីលំនៅសង្កាត់បឹងព្រលឹត ខណ្ឌ៧មករា ៣-ឈ្មោះថា គង់ ភេទប្រុស អាយុ៣០ឆ្នាំ ស្នាក់នៅវត្តសារាវន្ត សង្កាត់ជ័យជំនះ ខណ្ឌដូនពេញ។ ពេលឃាត់ខ្លួនជនសង្ស័យទាំងបីនាក់ខាងលើសមត្ថកិច្ច ដកហូតបានគ្រឿងញៀនក្រាមពណ៌ស (ទឹកកក) ។ មេបញ្ជាការប៉េអឹមខណ្ឌដូនពេញបានបញ្ជាក់ថា រយៈពេលមួយសប្តាហ៍ប៉េអឹមខណ្ឌដូនពេញ បានបង្ក្រាបជនសង្ស័យជួញដូរ និងប្រើប្រាស់គ្រឿងញៀនសរុបចំនួន១១នាក់ ហើយបានកសាងសំណុំរឿងបញ្ជូនទៅបញ្ជាការប៉េអឹមរាជធានីភ្នំពេញ ៕
ចែករំលែកព័តមាននេះ