រាជធានីភ្នំពេញ ៖ ស្ដ្រីម្នាក់ត្រូវបានគេស្គាល់ថាជាភរិយាមន្ដ្រីនគរបាលប្រឆាំងគ្រឿងញៀនក្រសួងមហាផ្ទៃ ត្រូវបានតុលាការសាលាដំបូងរាជធានីភ្នំពេញសំរេចឃុំខ្លួន ក្រោមការចោទប្រកាន់ពីបទរំលោភលើសេចក្ដីទុកចិត្ដ កាលពីល្ងាចថ្ងៃទី១៤ កក្កដា ។ ស្ដ្រីរូបនោះឈ្មោះចន ពិសី អាយុ៣០ឆ្នាំ មានទីលំនៅផ្ទះលេខ៧៦A ផ្លូវលេខ៤៥៦ សង្កាត់ទូលទំពូងទី១ ខណ្ឌចំការមន ។ ទាក់ទិននឹងការឃុំខ្លួនស្ដ្រីខាងលើ ប្រភពព័ត៌មានចេញពីសាលាដំបូងរាជធានីភ្នំពេញ ឱ្យដឹងថា ប៉ូលិសការិយាល័យសួរចម្លើយនៃនាយកដ្ឋានព្រហ្មទណ្ឌក្រសួងមហាផ្ទៃ កាលពីថ្ងៃទី១២ កក្កដា បានឃាត់ខ្លួនស្ដ្រីឈ្មោះចន ពិសី តាមពាក្យបណ្ដឹងរបស់ស្ដ្រីឈ្មោះអ៊ុំ សាវី អាយុ៣០ឆ្នាំ ស្នាក់នៅផ្ទះលេខ៤៩CEo ផ្លូវ លេខ២៤២ សង្កាត់ចតុមុខ ខណ្ឌដូនពេញ ។
តាមពាក្យបណ្ដឹងរបស់ជនរងគ្រោះឱ្យដឹងថា ឈ្មោះចន ពិសី បានស្គាល់ខ្លួន (អ៊ុំ សាវី) ជាយូរឆ្នាំមកហើយ ហើយស្ដ្រីជាប់ពិរុទ្ធនេះ មានមុខងារជាប្រធានសមាគមតុងទីននៅផ្សារបឹងត្របែក ។ តាមពាក្យបណ្ដឹងបានបន្ដទៀតថា ដោយសារតែស្គាល់គ្នា ក៏មានការទុកចិត្ដ ទើបខ្លួនឱ្យលុយដាក់សមាគមតុងទីន ដើម្បីសន្សំប្រាក់ ប៉ុន្ដែក្រោយមកឈ្មោះនេះ បានយកប្រាក់របស់ខ្លួនប្រមាណជិត ៦ម៉ឺនដុល្លារ ទៅប្រើប្រាស់ទិញដី និងធ្វើផ្ទះអស់គ្មានប្រាក់សងខ្លួនវិញ ទើបខ្លួនដាក់ពាក្យប្ដឹងឱ្យសមត្ថកិច្ចចាប់ខ្លួនតែម្ដង ។ ក្រោយពីចាប់ខ្លួនសមត្ថកិច្ចបានបញ្ជូនស្ដ្រីជាប់សង្ស័យទៅសាលាដំបូងរាជធានីភ្នំពេញ ហើយតុលាការបានសំរេចឃុំខ្លួនស្ដ្រីនោះ ជាបណ្ដោះអាសន្នរង់ចាំបើកសវនាការនាពេលក្រោយ ៕
ចែករំលែកព័តមាននេះ