ខេត្តឧត្តរមានជ័យ ៖ កាលពីរសៀលថ្ងៃទី៦ ធ្នូ កន្លងមកនេះ អាជ្ញាធរស្រុកអន្លង់វែង មន្ត្រីការិយាល័យកសិកម្មស្រុក រួមនឹងអាជ្ញាធរមូលដ្ឋាន និងប្រជាពលរដ្ឋ បានប្រារព្ធពិធីបុណ្យដារលាន និងបួងសួងសុំសេចក្តីសុខសប្បាយផងដែរទៅតាមទំនៀមទំលាប់ដែលបានធ្វើកន្លងមក ។ លោកម៉ក់ ដេត ប្រធានការិយាល័យកសិកម្មស្រុក បានឱ្យដឹងថា ប្រជាកសិករក្រោយពីបង្កបង្កើនផលនារដូវវស្សាឆ្នាំ២០០៩ កន្លងទៅ និងរដូវវស្សាឆ្នាំនេះ បានទទួលផលកើនឡើង ទើបក្រោយពីប្រមូលផលស្រូវរួចរាល់ហើយ ទាំងប្រជាពលរដ្ឋ រួមនឹងមន្ត្រីរាជការ បានស្រុះស្រួលមូលមតិគ្នារៀបចំពិធីបុណ្យដារលាន ដើម្បីបួងសួងសុំសេចក្តីសុខសប្បាយ ។ ពិធីបុណ្យនេះ បានប្រារព្ធធ្វើនៅចង្កេះភ្នំដងរែក កន្លែងរូបចម្លាក់ថ្មតាម៉ុក ក្នុងភូមិជើងភ្នំ ឃុំត្រពាំងប្រីយ៍ ដើម្បីបួងសួងសែនព្រែន ដល់ព្រះភូមិដែលជាម្ចាស់ទឹកម្ចាស់ដី និងដល់វត្ថុស័ក្តិសិទ្ធិនានាឱ្យជួយពួកគេបានសេចក្តីសុខ និងជួយឱ្យការបង្កបង្កើនផលនៅឆ្នាំក្រោយៗទៀត បានភោគផលបរិបូរណ៍ជាប់ជានិច្ច ។
បុណ្យដារលានតែងត្រូវបានប្រជាកសិករទូទាំងប្រទេសប្រារព្ធធ្វើនៅតាមមូលដ្ឋានរបស់ខ្លួន និងដោយមានការគាំទ្រពីក្រសួងកសិកម្ម រុក្ខាប្រមាញ់ និងនេសាទផងដែរ ក្នុងគោលបំណងរក្សានូវអត្តសញ្ញាណជាតិខ្មែរ ឱ្យបានគង់វង្ស ក៏ដូចជាការបង្កឱកាសដល់កសិករឱ្យមានការជួបជុំញាតិមិត្តជិតឆ្ងាយ ដើម្បីចូលរួមធ្វើការផ្លាស់ប្តូរយោបល់គ្នាលើការងារបង្កបង្កើនផល ។ ជាពិសេស ដើម្បីចូលរួមកំសាន្តសប្បាយបន្ទាប់ពីការចំណាយកំលាំងកាយក្រោមកំដៅព្រះអាទិត្យ និងក្រោមភ្លៀងផ្គរអស់រយៈពេលមួយរដូវ នៃការងារបង្កបង្កើនផលរបស់ពួកគាត់កន្លងមក ។
ទោះជាយ៉ាងណា ចំពោះបុណ្យដារលាននេះអ្នកស្រុកតែងតែហៅខុសៗគ្នាអាស្រ័យទៅតាមតំបន់នីមួយៗ ដែលតំបន់ខ្លះប្រជាពលរដ្ឋខ្មែរយើងហៅថា បុណ្យបោសលាន ខ្លះហៅបុណ្យសាមគ្គី បុណ្យកណ្តាលភូមិ និងបុណ្យដារបាតលានជាដើម ។ ថ្វីបើបុណ្យនេះមានការហៅខុសៗគ្នាច្រើនក៏ពិតមែន តែគោលបំណងសំខាន់នៃពិធីបុណ្យមានទិសដៅតែម្យ៉ាងគត់ គឺដើម្បីរំលឹកគុណម្ចាស់ទឹក ម្ចាស់ដី ដែលបានផ្តល់មកនូវភោគផលផ្លែផ្កាសំរាប់កូនចៅចិញ្ចឹមជីវិត ។ តាមការពិតទៅ ខ្មែរយើងជាអ្នកគោរពធម្មជាតិ ទឹក និងដី ព្រោះទឹក និងដីមានសារប្រយោជន៍ដល់ការប្រកបរបរកសិកម្ម គឺការផ្តល់នូវភោគផលស្រូវអង្ករ និងភោគផលកសិកម្មគ្រប់មុខ ដែលបានចិញ្ចឹមពួកគាត់ឱ្យមានជីវិតរស់នៅ និងជាដង្ហើមសេដ្ឋកិច្ចរបស់ប្រទេសជាតិ ៕
ចែករំលែកព័តមាននេះ