រាជធានីភ្នំពេញ ៖ ស្ត្រីប្រកបមុខរបរលក់បបរម្នាក់ត្រូវក្រុមចោរកាំភ្លើងអាកា បា.ញ់របួសធ្ងន់ធ្ងរដេកដួលក្នុងថ្លុកឈាម ក្នុងសកម្មភាពប្លន់យកកាបូបប្រាក់ ។ ទោះបីជាបែបនេះក្តី មិនបានប៉ុន្មានម៉ោងផង ចោរមួយក្រុមដែលមានបក្សពួក៤នាក់ត្រូវកម្លាំងប៉ូលិសក្របួច បានទាំងអស់ រួមទាំងដកហូតកាំភ្លើងអាកាច្នៃដែលជាមធ្យោ
រាជធានីភ្នំពេញ ៖ ស្ត្រីប្រកបមុខរបរលក់បបរម្នាក់ត្រូវក្រុមចោរកាំភ្លើងអាកាបាញ់របួសធ្ងន់ធ្ងរដេកដួលក្នុងថ្លុកឈាម ក្នុងសកម្មភាពប្លន់យកកាបូបប្រាក់ ។ ទោះបីជាបែបនេះក្តី មិនបានប៉ុន្មានម៉ោងផង ចោរមួយក្រុមដែលមានបក្សពួក៤នាក់ត្រូវកម្លាំងប៉ូលិសក្របួចបានទាំងអស់ រួមទាំងដកហូតកាំភ្លើងអាកាច្នៃដែលជាមធ្យោបាយធ្វើសកម្មភាពផងដែរ ។
ហេតុការណ៍នេះបានកើតឡើងកាលពីវេលាម៉ោង៥ និង១៥នាទីព្រឹកថ្ងៃទី២៥ ធ្នូ នៅមុខយានដ្ឋានលក់រថយន្តជាប់ផ្សារបុរីកីឡាថ្មី តាមបណ្តោយផ្លូវទេពផន ស្ថិតក្នុងសង្កាត់វាល់វង់ ខណ្ឌ៧មករា ។ ជនសង្ស័យ៤នាក់ដែលត្រូវចាប់ខ្លួនយ៉ាងទាន់ហន់ រួមមាន ១-ឈ្មោះឡឹង សុខលី ហៅតឿ ភេទប្រុស អាយុ៣២ឆ្នាំ ស្នាក់នៅផ្ទះលេខ៥០៥ ផ្លូវជាតិលេខ៥ សង្កាត់ច្រាំងចំរេះទី១ ខណ្ឌប្ញស្សីកែវ ។ ជននេះធ្លាប់ជាប់ពន្ធនាគាររយៈពេល១ឆ្នាំកន្លះ ពីបទចោរកម្មហើយ ទើបតែចេញបាន២ ទៅ៣ខែប៉ុណ្ណោះ ។
២-ឈ្មោះឃុត ភារម្យ ភេទប្រុស អាយុ៣៨ឆ្នាំ ស្នាក់នៅផ្ទះជួលប្លុកតាន់ប៉ា ផ្សារតាប៉ាង សង្កាត់ផ្សារថ្មីទី៣ ខណ្ឌដូនពេញ មុខរបរលក់ពងទាកូន ។
៣-ឈ្មោះប៊ុន ញ៉ិល ហៅស្វិត ភេទប្រុស អាយុ៤១ឆ្នាំ ស្នាក់នៅផ្ទះលេខ៣៣ សង្កាត់ព្រៃវែង ខណ្ឌដង្កោ រាជធានីភ្នំពេញ ។
៤-ឈ្មោះសុខ ផល្លា ហៅយ៉ុង ភេទប្រុស អាយុ៤៣ឆ្នាំ ស្នាក់នៅផ្ទះលេខ២២ ផ្លូវលេខ១៤៨ សង្កាត់ផ្សារកណ្តាលទី១ ខណ្ឌដូនពេញ ។
ក្នុងប្រតិបត្តិការក្រសោបក្រុមជនសង្ស័យទាំង៤នាក់នេះ ក៏មានការឃាត់ខ្លួននារីម្នាក់ឈ្មោះជ្រុយ ស្រី អាយុ២៨ឆ្នាំ ដែលជាប្រពន្ធជនសង្ស័យ តែស្ត្រីរូបនេះទំនងគ្មានពាក់ព័ន្ធជាមួយក្រុមចោរកាំភ្លើងអាកានេះទេ ។
ដោយឡែកជនរងគ្រោះឈ្មោះសួន ម៉ាលីស ភេទស្រី អាយុ៤១ឆ្នាំ ស្នាក់នៅផ្ទះលេខ៩៧C ផ្លូវលេខ២០៤ សង្កាត់ទឹកល្អក់ទី៣ ខណ្ឌទួលគោក ត្រូវចោរបាញ់១គ្រាប់ដោយកាំភ្លើងអាកាកាត់ស្វាយត្រូវចំពោះខាងស្តាំធ្លាយទៅឆ្វេង និងកំពុងសង្គ្រោះបន្ទាន់នៅមន្ទីរពេទ្យកាល់ម៉ែត ។
ទាក់ទិននឹងករណីប្លន់ប្រដាប់ដោយកាំភ្លើងអាកាគួរឱ្យភ្ញាក់ផ្អើលនៅកណ្តាលភ្នំពេញលើស្ត្រីអ្នកលក់បបរត្រូវបានលោកអ៊ុង សំណាង មន្ត្រីនគរបាលប៉ុស្តិ៍រដ្ឋបាលសង្កាត់ផ្សារដេប៉ូទី១ ខណ្ឌទួលគោក រៀបរាប់ឱ្យដឹងថា មុនពេលកើតហេតុ វេលាទៀបភ្លឺលោកបានដើរល្បាតក្នុងមូលដ្ឋានដែលជាតំបន់ជាប់នឹងទឹកដីសង្កាត់វាលវង់ ខណ្ឌ៧មករាដែរ ។ លុះនៅវេលាម៉ោង៥ភ្លឺ លោកបានចូលទៅដល់ស្នាក់ការប៉ុស្តិ៍ពេលនោះមានអ្នករត់ម៉ូតូឌុបម្នាក់បានជិះម៉ូតូទៅប្រាប់លោកថា មានស្ត្រីម្នាក់ដេកដួលក្នុងថ្លុកឈាមក្បែរមន្ទីរសាធារណការ និងដឹកជញ្ជូនរាជធានីភ្នំពេញ តាមផ្លូវលេខ១៨២ ដោយក្រុមចោរបាញ់ តែជនល្មើសបានរត់គេចខ្លួនបាត់អស់ទៅហើយ ។
គ្រាន់តែអ្នកម៉ូតូឌុបប្រាប់ភ្លាម លោកបានទៅដល់កន្លែងកើតហេតុ ឃើញស្ត្រីម្នាក់កំពុងស្រែកទ្រហោយំទាំងក្តីឈឺចាប់ និងមានមុខរបួសនៅលើផ្លូវថ្នល ់ក៏បានទូរស័ព្ទទាក់ទងទៅរថយន្តសាមុយមកដឹកជនរងគ្រោះទៅកាន់មន្ទីរពេទ្យកាល់ម៉ែតជាបន្ទាន់ ។ ឆ្លៀតឱកាសនោះ លោកក៏បានទូរស័ព្ទទាក់ទងទៅនគរបាលប៉ុស្តិ៍វាលវង់ ខណ្ឌ៧មករា ឱ្យបានជ្រាបពីករណីប្លន់នេះ ។ មួយសន្ទុះក្រោយមកនគរបាលប៉ុស្តិ៍វាលវង់ ក៏ទៅដល់ ហើយម្នីម្នារកប៊ិច និងក្រដាសសាកសួរកត់ត្រាធ្វើកំណត់ហេតុ។
សាក្សីមួយចំនួនបានប្រាប់នគរបាលប៉ុស្តិ៍ថា គេបានឃើញជនរងគ្រោះជិះម៉ូតូ C125 ពណ៌ខ្មៅ ស៊េរីឆ្នាំ ២០១១ តែម្នាក់ឯង មានស្ពាយកាបូបប្រាក់ពីចំហៀងខ្លួន១ និងកាបូបធំមួយទៀតដាក់នៅលើតួម៉ូតូ ទំនងដូចមានប្រាក់ច្រើនណាស់។ លុះមកដល់ចំណុចខាងលើ ស្រាប់តែមានជន៤នាក់ជិះម៉ូតូ២គ្រឿងធ្វើសកម្មភាពកៀរម៉ូតូជនរងគ្រោះឱ្យឈប់ ហើយជនម្នាក់បានចុះទៅភ្ជង់ដោយកាំភ្លើងអាកាច្នៃ និងម្នាក់ស្ទុះទៅទាញយកកាបូបដែលជនរងគ្រោះស្ពាយជាប់ខ្លួនដណ្តើមយកកាបូបនោះ និងទារយកសោម៉ូតូទៀត ។ ដោយសារជនរងគ្រោះមិនប្រគល់សោឱ្យ មានការប្រទូស្តរ៉ាយផងនោះក្រុម ចោរក៏បានបាញ់ស្ត្រីរូបនេះ១គ្រាប់បណ្តាលឱ្យដួលទើបយកកាបូបលុយរួចនាំគ្នារត់ឡើងជិះម៉ូតូគេចខ្លួនអស់ទៅ ។ ចំណែកម៉ូតូចោរអត់យកទេ ព្រោះវាប្រញាប់ពេក ។
តែភ្លាមនោះដែរ នៅសល់បក្សពួកម្នាក់ឈ្មោះប៊ុន ញ៉ិល ហៅស្វិត ឡើងម៉ូតូមិនទាន់គេ ក៏រត់កាត់មុខអធិការដ្ឋាននគរបាលខណ្ឌ៧មករាដើម្បីទៅលាក់ខ្លួនក្នុងសំណង់អនាធិបតេយ្យបុរីកីឡា ។ ពេលទទួលបានព័ត៌មាននេះនគរបាលខណ្ឌ និងកងរាជអាវុធហត្ថខណ្ឌខ្នះខ្នែងទៅតាមចាប់បាននាំទៅសាកសួរ ។ ពីដំបូងជននេះមិនទទួលស្គាល់ថា ខ្លួនជាចោរទេ តែអះអាងថា ខ្លួនបានស្គាល់ក្រុមប្លន់នោះ ។ ដូច្នេះហើយទើបសមត្ថកិច្ចបានឱ្យឈ្មោះស្វិតអន្ទងក្រុមគេ ដើម្បីចាប់ខ្លួន ។ ប្រតិបត្តិការតាមប្រមាញ់ចោរប្លន់នេះមានការចូលរួមសហការជាមួយកម្លាំងជំនាញនៃការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញផងដែរ ។
ពេលសមត្ថកិច្ចឱ្យឈ្មោះស្វិត ទាក់ទងទៅបក្សពួក ពេលនោះបានជួបឈ្មោះឡឹង សុខលី ហៅតឿ និងបានណាត់គ្នាឱ្យទៅជួបនៅម្តុំប្លុកតាន់ប៉ា ក្បែរផ្សារតាប៉ាង ដែលឈ្មោះ ឡឹង សុខលី និងឈ្មោះឃុត ភារម្យ កំពុងរៀបចំបង្វេច ដើម្បីគេចខ្លួន ។ នគរបាល និងកងរាជអាវុធហត្ថខណ្ឌ៧មករា បានសហការគ្នាធ្វើកិច្ចការនេះដោយបាននាំខ្លួនជនសង្ស័យឈ្មោះ ប៊ុន ញ៉ិល ហៅស្វិតឱ្យទៅជួបបក្សពួក ដើម្បីចាប់ខ្លួន និងមានការចូលរួមពីកម្លាំងនគរបាលព្រហ្មទណ្ឌកម្រិតធ្ងន់រាជធានីមួយក្រុមដឹកនាំដោយលោកវរសេនីយ៍ត្រីអេង សោភា អនុប្រធានការិយាល័យ និងក្រោមការបញ្ជាផ្ទាល់ពីលោកវរសេនីយ៍ទោ ជូន ណារិន្ទ ថែមទាំងមានការចង្អុលបង្ហាញពីលោកឧត្តមសេនីយ៍ត្រីប៉ុល ភិធេយ្យ ស្នងការរងផងដែរ ទើបឈានដល់កិច្ចសហការគ្នាក្រសោបក្រុមចោរទាំងនេះ ។
ការណាត់ជួបរវាងក្រុមជនល្មើស និងការត្រៀមលក្ខណៈជាស្រេចដែលជាអន្ទាក់របស់សមត្ថកិច្ច នៅផ្លូវមួយខាងកើតប្លុកតាន់ប៉ា ជនសង្ស័យ២នាក់ គឺឈ្មោះឡឹង សុខលី ហៅតឿ និងឈ្មោះឃុត ភារម្យ បានចេញមកជួបឈ្មោះស្វិត មែន ដើម្បីចែកប្រាក់គ្នា។ គ្រាន់តែចេញមកដល់ផ្លូវថ្នល់ កម្លាំងនគរបាលព្រហ្មទណ្ឌកម្រិតធ្ងន់មានរហស្សនាមរាត្រី៨១ និងរាត្រី២១ បានហក់ទៅក្រៀកឈ្មោះតឿ កាច់ផ្តួលទៅក្រោយឱ្យដួលលើផ្លូវដោយជាន់សង្កត់ចាប់ដាក់ខ្នោះដៃ ។ ព្រោះពេលនោះមិនទាន់សន្និដ្ឋានបានថា ពួកជនទាំងនេះមានកាំភ្លើង ឬក៏អត់នោះទេ ។ ពេលកាច់ផ្តួលម្នាក់បានហើយ ស្រាប់តែម្នាក់ទៀតឈ្មោះឃុត ភារម្យ បានរត់បម្រុងយករួចខ្លួន តែរត់បានចម្ងាយប្រហែលជាជិត១០០ម៉ែត្រ ក្បែរភ្លើងស្តុបមុខរោងភាពយន្តលុច្ស ក៏ត្រូវនគរបាលព្រហ្មទណ្ឌដឹកនាំដោយលោកអេង សោភា ដែលសហការជាមួយនគរបាលខណ្ឌ៧មករាឃាត់ខ្លួនបានទៀត ។
ក្នុងខណៈពេលដែលសមត្ថកិច្ចកំពុងបើកកិច្ចប្រតិបត្តិការបង្ក្រាបក្រុមចោរប្លន់នេះមានស្ត្រីម្នាក់បានចេញមុខទៅរារាំង និងអះអាងថា ជាប្រពន្ធជនសង្ស័យ ក៏ត្រូវសមត្ថកិច្ចឃាត់ខ្លួនដែរ ។ ពួកគេត្រូវបាននាំទៅកាន់អធិការដ្ឋាននគរបាលខណ្ឌ៧មករាទាំងអស់ ។ ជាមួយគ្នានោះ កាំភ្លើងអាកា១ដើមដែលជាមធ្យោបាយធ្វើសកម្មភាពត្រូវពួកគេយកទៅបោះចោលនៅខាងក្រោយអគារមួយ ក៏ត្រូវបានប្រជាពលរដ្ឋរើសយកទៅប្រគល់ឱ្យនគរបាលប៉ុស្តិ៍វាលវង់ដែរ ។
បន្ទាប់ពីចាប់បានជនសង្ស័យទាំង៣នាក់នេះហើយ នៅវេលាម៉ោងប្រមាណជិត៩ព្រឹក ក្រោយពីទទួលបានចម្លើយសារភាពរួចមក ទើបសមត្ថកិច្ចឈានទៅចាប់ខ្លួនជនម្នាក់ទៀតឈ្មោះសុខ ផល្លា ហៅយ៉ុង នៅផ្ទះជួលម្តុំផ្សារ៧មករា ខណ្ឌទួលគោក ។ ដូច្នេះក្រុមចោរកាំភ្លើងអាកាបាញ់ប្លន់យកកាបូបពីស្ត្រីអ្នកលក់បបរត្រូវសមត្ថកិច្ចក្រសោបបានទាំងអស់ ។
យោងតាមចម្លើយរបស់ក្រុមជនអស់លក្ខណ៍សារភាពថា កន្លងមកពួកខ្លួនធ្លាប់ប្លន់នៅខណ្ឌទួលគោក ១លើក និងប្លន់នៅខណ្ឌប្ញស្សីកែវ១លើក និងខ្លះធ្លាប់ជាប់គុកទើបនឹងចេញ ។ មានការកត់សម្គាល់ថា ចោរប្រើកាំភ្លើងអាកាមួយក្រុមនេះហាក់ដូចជាព្រហើនណាស់ ហ៊ានបាញ់ប្លន់នៅក្បែរអធិការដ្ឋាននគរបាលខណ្ឌ៧មករា។មិនតែប៉ុណ្ណោះ ពេលរត់ឡើងជិះម៉ូតូទៅជាមួយគ្នាមិនទាន់ ក៏រត់កាត់មុខប៉ូលិសទៀត បើកុំបានប្រជាពលរដ្ឋ និងអ្នករត់ម៉ូតូឌុបរាយការណ៍ ម្ល៉េះសមក្រុមចោរត្រូវរត់រួចទាំងអស់ ។
សូមបញ្ជាក់ថា តាមការអះអាងរបស់សាច់ញាតិជនរងគ្រោះថា កាបូបដែលចោរប្លន់ទៅនោះ មានលុយខ្មែរតែ១ម៉ឺនរៀលប៉ុណ្ណោះ ក្រៅពីនេះ សុទ្ធតែគ្រឿងសំអាង ។ គេមិនទាន់ដឹងថា ស្ត្រីដែលរងរបួសដោយចោរបាញ់នោះមានស្ថានភាពបែបណាទេ ព្រោះកំពុងទទួលការសង្គ្រោះនៅមន្ទីរពេទ្យកាល់ម៉ែតនៅឡើយ៕ ប៊ុនណាក់
ចែករំលែកព័តមាននេះ