រាជធានីភ្នំពេញ ៖ ជនអន្ធពាលម្នាក់ជាប់គុករយៈពេល១៣ខែពីបទលួចមាន់អ្នកស្រុក ទើបចេញមកវិញបានរយៈពេល១៦ថ្ងៃ ដោយសារមានគំនុំជាមួយមេភូមិ ដោយចោទថា ជាអ្នករាយការណ៍ឱ្យប៉ូលិសចាប់ខ្លួន និងខឹងលោកមេប៉ុស្តិ៍ចាប់ខ្លួនគេដាក់គុកកាលពី១ឆ្នាំមុន បានធ្វើសកម្មភាពលួចយកកាំភ្លើងចេញពីប៉ុស្តិ៍ប៉ូលិសឃុំដំណាក់អំពិល ២ដើមក្នុងគោលបំណងបាញ់សម្លាប់មេភូមិ និងមេប៉ុស្តិ៍ និងធ្វើសកម្មភាពផ្សេងៗទៀត។ តែគំនិតទុរយសនេះអស់លក្ខណ៍ត្រូវប៉ូលិសព្រហ្មទណ្ឌស្រុកអង្គស្នួលចាប់ខ្លួន និងរកឃើញទាំងកាំភ្លើងដែលលួច និងកាំភ្លើង១ដើមផ្សេងទៀតដែលប៉ូលិសសង្ស័យថា គេលាក់ទុកយូរមកហើយ ។
ជននោះត្រូវប៉ូលិសព្រហ្មទណ្ឌស្រុកអង្គស្នួល និងប៉ូលិសប៉ុស្តិ៍ឃុំដំណាក់អំពិលចាប់ខ្លួនបានកាលពីវេលាម៉ោង១០ព្រឹក ថ្ងៃទី១៦ មីនា នៅតាមផ្លូវលំក្នុងភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល ។ ជនអន្ធពាលរូបនោះឈ្មោះស៊ឹម ជីម ហៅមាំង អាយុ២៦ឆ្នាំ ។ មន្ត្រីប៉ូលិសព្រហ្មទណ្ឌស្រុកអង្គស្នួលបានឱ្យដឹងថា ជននោះមានគំនុំជាមួយមេភូមិពងទឹក ដែលកាលពីជាង១ឆ្នាំមុនជននេះបានធ្វើសកម្មភាពលួចមាន់ប្រជាពលរដ្ឋ ហើយត្រូវកម្លាំងប៉ូលិសចាប់ខ្លួនបញ្ជូនទៅតុលាការផ្តន្ទាទោសដាក់គុករយៈពេល១៣ ខែ ហើយជននោះបានចោទប្រកាន់លោកមេភូមិថា ជាអ្នករាយការណ៍ឱ្យសមត្ថកិច្ចចាប់ខ្លួន និងលោកមេប៉ុស្តិ៍ជាអ្នកចាប់រូបគេដាក់គុក និងបាននិយាយគំរាមថា ពេលរូបគេចេញមកវិញនឹងសម្លាប់ចោលហើយ។
ប្រភពដដែលបានបន្តថា បន្ទាប់ពីជាប់គុកអស់ជាង១ឆ្នាំ ជននោះទើបត្រូវបានដោះលែងកាលពី១៦ថ្ងៃមុននេះប៉ុណ្ណោះ ។ លុះដល់វេលាម៉ោង១១និង១០នាទីយប់ ថ្ងៃទី១៥ មីនា ជននោះរួមជាមួយបក្សពួកម្នាក់ទៀតឈ្មោះម៉ន ផាន់ណា អាយុប្រហែលជាង៣០ឆ្នាំ ស្នាក់នៅផ្ទះជួលម្តុំផ្សារថ្មី បានចូលលួចយកកាំភ្លើង AK ប៉ូលិសប៉ុស្តិ៍បានចំនួន២ដើម យកទៅលាក់ទុកក្បែរទ្រុងមាន់ក្រោយផ្ទះរបស់ខ្លួន ។
ប្រភពដដែលបានបន្តថា កាំភ្លើង AK ទាំងពីរដើមនោះ ប៉ូលិសប៉ុស្តិ៍ឃុំដំណាក់អំពិល ទុកក្នុងទូ១ដើម និងទុកនៅលើធ្នើរ១ដើម ហើយជនសង្ស័យបានបើកបង្អួចចូលលួច ខណៈពេលដែលប៉ូលិសចេញល្បាតអស់ ។ ចំណែកឯប៉ូលិសក្រោយពេលល្បាតចប់ចូលមកដល់ប៉ុស្តិ៍វិញឃើញបាត់កាំភ្លើងក៏មានការភ្ញាក់ផ្អើល និងរាយការណ៍ប្រាប់ទៅថ្នាក់លើរបស់ខ្លួន ហើយលោកទិត្យ វង្ស អធិការប៉ូលិសស្រុក និងលោកមាន សំណាង អធិការរងទទួលបន្ទុកផ្នែកព្រហ្មទណ្ឌបានដឹកនាំកម្លាំងចុះទៅសហការជាមួយលោកមេប៉ុស្តិ៍ដំណាក់អំពិល ធ្វើការស៊ើបអង្កេតស្រាវជ្រាវ និងកំណត់មុខសញ្ញាទៅលើជនឈ្មោះស៊ឹម ជីម ហៅមាំងនោះ រួចក៏ធ្វើការតាមដានជាប់រហូត ។
ប្រភពដដែលបានបន្តទៀតថា លុះដល់ព្រឹកឡើងថ្ងៃទី១៦ មីនា ជននោះបានបាញ់សាកកាំភ្លើងដែលលួចបាននោះនៅខាងក្រោយផ្ទះរបស់ខ្លួន បណ្តាលឱ្យផ្ទុះលាន់កក្រើកភូមិបង្កការភ្ញាក់ផ្អើលដល់ប្រជាពលរដ្ឋទៀតផង។ បន្ទាប់ពីបាញ់សាកកាំភ្លើងរួច ជននោះបានយកកាំភ្លើងទុកក្នុងបាវលាក់ក្បែរទ្រុងមាន់ បន្ទាប់មកគេបានជិះម៉ូតូចេញពីផ្ទះប្រុងគេចខ្លួន ក៏ត្រូវកម្លាំងប៉ូលិសចាប់ខ្លួនតែម្តង ។
ប្រភពដដែលបានបន្តទៀតថា ក្រោយពេលចាប់ខ្លួន ប៉ូលិសបាននាំជននោះទៅយកកាំភ្លើងដែលលួចបាន ហើយបានប្រទះឃើញមានកាំភ្លើង១ដើមផ្សេងទៀតម៉ាក AK ដែរ ប៉ុន្តែកាត់កាណុងដែលជននោះលាក់ទុកយូរមកហើយទុកសម្រាប់ធ្វើសកម្មភាពផ្សេងៗ ។
ក្រោយពេលចាប់ខ្លួនជននោះបានសារភាពថា ខ្លួនធ្វើតាមបញ្ជាពូរបស់ខ្លួនឈ្មោះឌីសារ័ត្ន អាយុ៣១ឆ្នាំ ដែលកំពុងជាប់គុកនៅឡើយពីបទប៉ុនប៉ងមនុស្សឃាត ។ កាលពីខ្លួននៅជាប់គុក ពូរបស់ខ្លួនបានប្រាប់ឱ្យខ្លួនលួចកាំភ្លើងប៉ូលិសខាងលើយកទៅលក់ ហើយពេលចេញមកវិញខ្លួន និងបក្សពួកម្នាក់ទៀតក៏ធ្វើសកម្មភាពលួចតែម្តង ដោយឈ្មោះម៉ន ផាន់ណា ជាអ្នកធានាយកទៅលក់ ទោះបីជាបែបណាជននេះមិនបាននិយាយថា ប៉ុនប៉ងសម្លាប់មេភូមិ និងមេប៉ុស្តិ៍នោះឡើយ។
មន្ត្រីប៉ូលិសនិយាយថា ការចាប់ខ្លួនជននេះបានគឺជាសំណាងមួយហើយ ព្រោះជននោះមានគំនុំក្នុងខ្លួនប្រុងបាញ់សម្លាប់មេភូមិ និងមេប៉ុស្តិ៍ឃុំដំណាក់អំពិល ប៉ុន្តែបន្ទាប់ពីការស្រាវជ្រាវពីសំណាក់មេប៉ុស្តិ៍ និងកម្លាំងប៉ូលិសស្រុកអស់ពេញ១យប់ ទើបព្រឹកឡើងឈានដល់ការចាប់ខ្លួនតែម្តង ហើយពេលនេះជនខាងលើជាប់ចោទពីរករណី គឺចោរកម្មលួចកាំភ្លើង និងលាក់កាំភ្លើងទុកខុសច្បាប់ ៕
ចែករំលែកព័តមាននេះ