ខេត្តកំពង់ចាម ៖ មូលនិធិមនុស្សធម៌របស់សហគមន៍អឺរុប និងមូលនិធិរបស់ប្រទេសអូរស្រ្តាលី តាមរយៈអង្គការសាមគ្គី បាននាំអំណោយចែកចូនដល់ប្រជាពលរដ្ឋក្រីក្រដែលរងគ្រោះ ដោយទឹកជំនន់នាពេលកន្លងមក ជាបន្តបន្ទាប់ជាង៤០០គ្រួសារគិតទាំងលើកនេះ។ ជាក់ស្តែងនៅព្រឹកថ្ងៃទី២០ ធ្នូ ២០១១ អំណោយត្រូវបានចែកជូនដល់ប្រជាពលរដ្ឋចំនួន១៥៥គ្រួសារ ស្ថិតនៅភូមិដីក្រហម ឃុំមៀន ស្រុកព្រៃឈរ ដោយមានការចូលរួមពីកញ្ញា ERIN DALY ជនជាតិអាមេរិកកាំងទទួលបន្ទុកអប់រំផ្នែកសុខភាព និងជាអ្នកស្ម័គ្រចិត្តមកពីអង្គការ Peace Corps ។
លោកហួត វិមាន តំណាងអង្គការ Action Aid បានលើកឡើងថា នាពេលកន្លងមកគ្រោះទឹកជំនន់បានយារយីដល់ប្រជាពលរដ្ឋរស់នៅតាមដងទន្លេមេគង្គ និងនៅជុំវិញដងទន្លេសាប។ តាមតួលេខដែលរូបលោកទទួលបាននោះ គឺប្រជាពលរដ្ឋមានរហូតដល់ទៅចំនួន៩០ពាន់នាក់ នៅទូទាំងប្រទេសដែលរងគ្រោះដោយទឹកជំនន់។ លោកបន្តថា ពេលដែលទឹកទន្លេបានស្រកទៅវិញ នៅតំបន់ខ្លះសិស្សមានការយឺតយាវមិនបានចូលរៀន ដោយសារតែទឹកនៅជន់លិចសាលារៀននៅឡើយ។ ប្រជាពលរដ្ឋមកពីបណ្តាភូមិកេះចំនួន៣៧គ្រួសារ និងភូមិទួលព្រិចចំនួន១១៨គ្រួសារ ទៅទទួលយកអំណោយនាព្រឹកនេះ ក្នុង១គ្រួសារៗបានអង្កចំនួន៥០គីឡូក្រាម ប្រេងឆា១ដប អំបិលអីុយ៉ូត១ថង់ ថ្នាំដាក់ទឹកសម្លាប់មេរោគចំនួន៤បន្ទះ ។
កញ្ញា ERIN DALY បានឲ្យដឹងថា នាងបានមកបម្រើការងារនៅក្នុងឆ្នាំ២០១០ ដល់ឆ្នាំ២០១២ ប្រចាំនៅឃុំត្រពាំងព្រះ ស្រុកព្រៃឈរ ខេត្តកំពង់ចាម ដោយបានចុះអប់រំដល់ស្រ្តីមានផ្ទៃពោះឱ្យយកទុកដាក់បរិភោគអាហារបំប៉ន ដើម្បីជំនួយដល់កូនដែលនៅក្នុងផ្ទៃ ហើយនៅពេលដែលសំរាលកូនត្រូវទៅសម្រាលនៅមន្ទីរពេទ្យ ឬមណ្ឌលសុខភាពដែលជាកន្លែងសុវត្ថិភាព៕ ចាន់ថេត
ចែករំលែកព័តមាននេះ