ខេត្តបាត់ដំបង ៖ ក្រុមប្រជាកសិករប្រហែលជាង៥០នាក់ បានផ្លោះរបងដែកសម្រុកចូលក្នុងបរិវេណតុលាការខេត្តកាលពីវេលាម៉ោង៦ល្ងាចថ្ងៃទី១៩ ធ្នូ ដើម្បីរំដោះតំណាងពួកគេពីរនាក់ចេញពីក្នុងរថយន្ត សមត្ថកិច្ច ខណៈបំរុងនាំខ្លួនទៅឃុំខ្លួនក្នុងពន្ធនាគារ ក្រោយពីបញ្ចប់ការសួរនាំរបស់លោកចៅក្រមស៊ើបសួរដែលពាក់ព័ន្ធក្នុងសំណុំរឿងដីធ្លីមួយ
កន្លែងនៅក្នុងឃុំត្រែង ស្រុករតនមណ្ឌលជាមួយមន្រ្តីយោធាថ្នាក់ឧត្តមសេនីយ៍ម្នាក់។
ក្រុមប្រជាពលរដ្ឋបានប៉ះទង្កិចជាមួយកម្លាំងសមត្ថកិច្ចនៅពេលព្យាយាមរំដោះតំណាងពួកគេចេញពីក្នុងរថយន្តដែលនាំឱ្យមានមនុស្សមួយចំនួនរងរបួសរាប់ទាំងសមត្ថកិច្ចផង ។ មន្រ្តីនគរបាលនិយាយថា តំណាងប្រជាពលរដ្ឋចំនួនពីរនាក់ត្រូវបានចៅក្រមស៊ើបសួរលោកយាប់ មេត្តា សម្រេចចេញដីកាឱ្យសមត្ថកិច្ចនាំទៅឃុំខ្លួនជាបណ្ដោះអាសន្នក្នុងពន្ធនាគារក្រោយពីបញ្ចប់ការសួរនាំដែលពាក់ព័ន្ធក្នុងសំណុំរឿងដីធ្លី ខណៈដែលក្រុមអ្នកស្រុកជាង៥០នាក់កំពុងរង់ចាំតំណាងពួកគេយ៉ាងអន្ទះសានៅខាងមុខតុលាការ។
សមត្ថកិច្ចបញ្ជាក់ថា នៅពេលកម្លាំងសមត្ថកិច្ចនាំតំណាងពួកគេទាំងពីរនាក់ចូលក្នុងរថយន្ត ស្រាប់តែក្រុមប្រជាពលរដ្ឋទាំងប្រុសទាំងស្រីនាំគ្នាផ្លោះរបងសម្រុកចូលក្នុងបរិវេណតុលាការបើកទ្វាររថយន្តទាញតំណាងពួកគេចេញពីក្នុងរថយន្តដែលជាហេតុនាំឱ្យមានការប្រទាញប្រទង់គ្នាយ៉ាងតឹងតែងយកឈ្នះចាញ់ជាមួយសមត្ថកិច្ច ។ ក្រុមអ្នកតវ៉ាបានអូសដៃតំណាងពួកគេចេញពីក្នុងរថយន្តដោយអូសទៅជាមួយនូវជនសង្ស័យបង្ករបួសស្នាមដាច់ដោយឡែកមួយករណីទៀតដែលដាក់ខ្នោះដៃជាប់គ្នានៅក្នុងរថយន្ត ហើយរត់រួចបាត់ទាំងខ្នោះជាប់ដៃ។
សាក្សីដែលឃើញផ្ទាល់ភ្នែកបាននិយាយថា ក្នុងគ្រាសមត្ថកិច្ចកំពុងប្រវាយប្រតប់គ្នាជាមួយប្រជាពលរដ្ឋដណ្ដើមអ្នកទោសដីធ្លីនៅក្នុងបរិវេណតុលាការ ។ នៅខាងក្រៅរបងខាងមុខតុលាការឯណោះវិញ ក្រុមសមត្ថកិច្ចរាប់សិបនាក់ ក៏កំពុងប្រយុទ្ធគ្នាយ៉ាងស្វិតស្វាញផងដែរ ដែលមើលទៅស្ថិតក្នុងស្ថានភាពដ៏អាក្រក់មើលបំផុត ។ ភាគីប្រជាពលរដ្ឋមួយចំនួនបានរងរបួស ឯភាគីសមត្ថកិច្ចវិញក៏រងរបួសខ្លះដែរ ប៉ុន្តែក្រោយពីក្រុមបាតុករវាយដណ្ដើមបានតំណាងពួកគេទាំងពីរនាក់នោះរួចមក ក្រុមសមត្ថកិច្ចក៏បានចាប់ខ្លួនប្រជាពលរដ្ឋបានម្នាក់វិញ ក្នុងគ្រាប៉ះទង្គិចគ្នាដែលសមត្ថកិច្ចបានចោទថា បុរសនោះបានប្រើកណ្ដាប់ដៃវាយគ្មានប្រណីទៅលើកពួកខ្លួន ។
ការប្រទូស្តរ៉ាយគ្នារវាងសមត្ថកិច្ច និងក្រុមប្រជាពលរដ្ឋនេះ ត្រូវគេនិយាយថា មានរយៈពេលជិតមួយម៉ោង ទើបស្ងប់បន្តិចដោយសារតែមានការសម្របសម្រួលពីលោកនួន សាន តំណាងអយ្យការអមសាលាដំបូងខេត្ត និងលោកនៅ យ៉ារ័ត្ន ប្រធានតុលាការខេត្ត។ លោកនួន សាន និងលោកនៅ យ៉ារ័ត្ន បានស្នើឱ្យប្រជាពលរដ្ឋវិលត្រឡប់ទៅលំនៅឋានសិនហើយលោកក៏ប្រាប់ដល់ក្រុមអ្នកភូមិដែរថា នឹងដោះស្រាយគ្នានៅថ្ងៃទី២០ ធ្នូ ទៀត ប៉ុន្តែតម្រូវឱ្យក្រុមប្រជាពលរដ្ឋដាក់ពាក្យធានាតាមផ្លូវច្បាប់ ដើម្បីសុំធានាពលរដ្ឋម្នាក់ដែលសមត្ថកិច្ចចាប់ខ្លួននោះឱ្យមានសេរីភាពវិញ។
តំណាងប្រជាពលរដ្ឋចំនួន៤នាក់ត្រូវបានតុលាការចេញដីកាបង្គាប់ឱ្យចូលខ្លួននោះរួមមាន១-ឈ្មោះសឿង ពិសី ភេទប្រុស អាយុ៣៩ឆ្នាំ ២-ឈ្មោះស្រី ណាន់ ភេទប្រុស អាយុ៣១ឆ្នាំ ៣-ឈ្មោះយ៉ន គឹមអុន ភេទប្រុស អាយុ៤២ឆ្នាំ និង៤-ឈ្មោះអីុវ ឃាង ភេទស្រី អាយុ៤៧ឆ្នាំ ប៉ុន្តែមានតែឈ្មោះយ៉ន គឹម អុន និងឈ្មោះអីុវឃាង ពីរនាក់ប៉ុណ្ណោះ ដែលទើបបានចូលទៅបំភ្លឺជូនចៅក្រមស៊ើបសួរ ហើយក៏ត្រូវឃុំខ្លួនតែម្ដងដែលពួកគេទាំង៤នាក់ត្រូវបានចោទពីបទ«រំលោភអចលនវត្ថុអ្នកដទៃ»។ ដោយឡែកប្រជាពលរដ្ឋម្នាក់ដែលត្រូវសមត្ថ
កិច្ចចាប់ខ្លួនពេលប៉ះទង្គិចគ្នានោះឈ្មោះភឿន សុខេន ភេទប្រុស អាយុ៣២ឆ្នាំ។
ជនសង្ស័យទាំង៤នាក់នេះតំណាងឱ្យប្រជាកសិករចំនួន៤៣គ្រួសាររស់នៅភូមិគីឡូ៣៨ ឃុំត្រែង ស្រុករតនមណ្ឌល បានរងការចោទប្រកាន់ពីដើមបណ្ដឹងឈ្មោះកែវ សារ៉ាន់ ជាមន្រ្តីយោធាថ្នាក់ឧត្ដមសេនីយ៍ ប៉ុន្តែជំនួសមុខមន្រ្តីនេះដោយបុរសម្នាក់ឈ្មោះហ៊ុន សារ៉េត ។ បើយោងតាមបណ្ដឹងរបស់មន្រ្តីយោធានោះថា ក្រុមប្រជាពលរដ្ឋបានរំលោភយកដីរបស់ខ្លួនអស់ចំនួន១៣០ហិកតានៅចំណុចភ្នំតាទ្រូ ក្នុងភូមិគីឡូ៣៨ ឃុំត្រែងដែលបានប្រព្រឹត្តក្នុងអំឡុងឆ្នាំ២០០៦ ប៉ុន្តែដើមបណ្ដឹងរូបនេះ ទើបតែដាក់ពាក្យប្ដឹងចោទប្រកាន់ប្រជាពលរដ្ឋនៅក្នុងខែកក្កដា ឆ្នាំ២០១១ នេះ ។ មិនអាចទំនាក់ទំនងសុំការបំភ្លឺបន្ថែមពីភាគីដើមបណ្ដឹងបានទេ នៅព្រឹកថ្ងៃទី២០ ធ្នូ ប៉ុន្តែលោកនួន សាន តំណាងអយ្យការបានពន្យល់អំពីបញ្ហាដីនេះប្រាប់ប្រជាពលរដ្ឋថា នៅក្នុងបណ្ដឹងនេះគឺភាគីដើមបណ្ដឹងមានឯកសារស្របច្បាប់ក្នុងការកាន់កាប់ដីនោះ។
មន្រ្តីស៊ើបអង្កេតសមាគមការពារសិទ្ធិមនុស្ស អាដហុកខេត្តបាត់ដំបង លោកយិន ម៉េងលី ប្រាប់កោះសន្តិភាពកាលពីព្រឹកថ្ងៃទី២០ ធ្នូថា ភាគីដើមបណ្ដឹងមិនមានឯកសារគ្រប់គ្រាន់ក្នុងការកាន់កាប់ដីនោះទេ ពិតមែនតែភាគីប្រជាពលរដ្ឋគ្មានឯកសារពាក់ព័ន្ធនឹងដីនោះក្ដី។ ដើមបណ្ដឹងមានតែពាក្យស្នើសុំកាន់កាប់ និងប្រើប្រាស់ដីនោះប៉ុណ្ណោះ ដែលដាក់ជូនតុលាការ ឯភាគីប្រជាពលរដ្ឋជាអ្នកកាន់កាប់ និងបង្កបង្កើនផលដីនោះតាំងពីអំឡុងឆ្នាំ១៩៩៧រហូតមក ខណៈដែលភាគីដើមបណ្ដឹងមិនដែលប៉ះពាល់លើដីនោះសោះ ។ ដូច្នេះតុលាការមិនគប្បីទទួលចាត់ការលើករណីនេះពីបទព្រហ្មទណ្ឌឡើយ ដែលគួរតែរកឱ្យឃើញថា តើអ្នកណាជាម្ចាស់កម្មសិទ្ធិដីនេះពិតប្រាកដសិន ដោយបានបន្ថែមថា គោលការណ៍ច្បាប់លោកចៅក្រមត្រូវតែអង្កេតទាំងដោះបន្ទុក ទាំងដាក់បន្ទុកមិនគប្បីប្រញាប់ពេកទេ ក្នុងការចាប់ប្រជាពលរដ្ឋដាក់គុក គួរតែផ្ដល់លទ្ធភាពឱ្យពួកគាត់បង្ហាញសាក្សី និងភស្ដុតាងដែលពាក់ព័ន្ធលើករណីដីធ្លីនេះសិន ទើបប្រសើរ ពីព្រោះពួកគាត់មានសាក្សីជាច្រើនចាំបំភ្លឺ។
ករណីវិវាទដីធ្លីនៅក្នុងខេត្តបាត់ដំបងបានស្ងប់ស្ងាត់មួយរយៈកន្លងមក ប៉ុន្តែជម្លោះនេះហាក់ដូចជាកំពុងផ្ទុះឡើងវិញនៅក្នុងអំឡុងខែធ្នូ ឆ្នាំ២០១១នេះ ។ បើគ្រាន់តែរយៈពេលជាងកន្លះខែកន្លងមកនេះ មានការផ្ទុះរឿងដីធ្លីធំៗចំនួន៤លើកផ្ទួនៗគ្នា ដែលជម្លោះនេះឈានដល់ការប្រើប្រាស់កាំភ្លើងបាញ់របួសមនុស្សទៀតផង ។
ការផ្ទុះជម្លោះដីធ្លីដំបូងសម្រាប់ខែនេះនៅថ្ងៃទី៦ ធ្នូ នៅក្នុងភូមិបឹងក្រឡ ឃុំអំពិលប្រាំដើម ស្រុកបវេល រវាងប្រជាពលរដ្ឋនិងកម្លាំងសមត្ថកិច្ចដែលចុះការពារគ្រឿងចក្រឈូសផ្លូវក្នុងដី
សម្បទានសង្គមកិច្ចរបស់រដ្ឋ។ ការប៉ះទង្គិចនោះបណ្ដាលឱ្យប្រជាពលរដ្ឋម្នាក់ និងមន្រ្តីប៉េអឹមម្នាក់រងរបួស ហើយប្រជាពលរដ្ឋបានវាយរឹបអូសយកកាំភ្លើងវែងខ្លីពីកម្លាំង
ប៉េអឹមបានចំនួនបីដើម កម្ទេចគ្រឿងចក្រពីរគ្រឿង រថយន្តពីរគ្រឿង និងសម្ភារមួយចំនួនទៀត ។
ការផ្ទុះលើកទីពីរនៅថ្ងៃទី៩ ធ្នូ នៅភូមិអូរគគីរ ឃុំសិរីមានជ័យ ស្រុកសំពៅលូន រវាងប្រជាពលរដ្ឋ និងក្រុមហ៊ុនសួនមានសម្បត្តិ ដែលសមត្ថកិច្ចការពារដីក្រុមហ៊ុននេះចាប់ប្រជាពលរដ្ឋចំនួនពីរនាក់យកទៅវាយដំឡើងទ្រមខ្លួន ។
ការផ្ទុះលើកទីបីនៅថ្ងៃទី១២ ធ្នូ នៅភូមិបុស្សស្អំ ឃុំចក្រី ស្រុកភ្នំព្រឹក រវាងក្រុមប្រជាពលរដ្ឋនិងក្រុមហ៊ុនសួនមានសម្បត្តិដដែលទៀត ដែលកម្លាំងប្រដាប់អាវុធការពារដីឱ្យក្រុមហ៊ុននេះបានប្រើប្រាស់កាំភ្លើងអាកាបាញ់ទៅលើអ្នកភូមិបណ្ដាលឱ្យរងរបួស៣នាក់ ក្នុងគ្រាដែលក្រុមអ្នកភូមិលើកគ្នាទៅរារាំងគ្រឿងចក្ររបស់ក្រុមហ៊ុនដែលពួកគាត់អះអាងថា ឈូសរំលោភយកដីរបស់ពួកគាត់។
ដោយឡែកក្នុងករណីលើកទី៤នេះ ផ្ទុះជម្លោះនៅខាងមុខតុលាការខេត្តតែម្ដងនៅល្ងាចថ្ងៃទី១៩ ធ្នូ រវាងកម្លាំងសមត្ថកិច្ច និងប្រជាពលរដ្ឋដោយសារតែតុលាការសម្រេចឃុំខ្លួនតំណាងពួកគេចំនួនពីរនាក់ពាក់ព័ន្ធក្នុងសំណុំរឿងដីធ្លីដែរ ។ ទោះបីជាបែបណាក្តី បើគិតត្រឹមម៉ោង១២ថ្ងៃត្រង់ថ្ងៃទី២០ ធ្នូ ក្រុមកសិករដែលតវ៉ានៅមិនទាន់ចាកចេញពីខាងមុខតុលាការនៅឡើយទេ ព្រោះពួកគេទាមទារឱ្យដោះលែងពលរដ្ឋម្នាក់ដែលបានចាប់ខ្លួនក្នុងគ្រាដែលប៉ះទង្គិចជាមួយសមត្ថកិច្ចកាលពីយប់ ៕
ចែករំលែកព័តមាននេះ