ខេត្តព្រៃវែង ៖ អគារពន្ធនាគារថ្មីរបស់ខេត្តព្រៃវែង ត្រូវបានសម្ពោធជាផ្លូវការក្រោមអធិបតីភាពលោកស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោកស្រី ផេនី រីឆាត ឯកអគ្គរាជទូតអូស្ដ្រាលីប្រចាំនៅកម្ពុជា ព្រមទាំងមានការអញ្ជើញចូលរួមពី សំណាក់ប្រតិភូជាតិ-អន្ដរជាតិ អាជ្ញាធរដែនដី កងកម្លាំងប្រដាប់អាវុធសិស្សានុសិស្ស និងប្រជាពលរដ្ឋយ៉ាងច្រើនកុះករ ។
លោក អ៊ុង សាមី អភិបាលខេត្ដបានថ្លែងថា អគារពន្ធនាគារថ្មីដែលដាក់សម្ពោធនាថ្ងៃនេះ ជាជំនួយឧបត្ថម្ភរបស់រដ្ឋាភិបាលអូស្ដ្រាលីតាមរយៈគម្រោងជំនួយផ្នែកព្រហ្មទណ្ឌ និងយុត្ដិធម៌នៅកម្ពុជា ។ គម្រោងនេះមានរយៈពេល៥ឆាំ្ន គឺពីឆាំ្ន២០០៧ ដល់២០១២ មានថវិកាសរុប៣០លានដុល្លារ គាំទ្រដល់ក្រសួងមហាផ្ទៃ ក្រសួងយុត្ដិធម៌ ក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ ព្រមទាំងគាំទ្រខេត្ដចំនួន៦ទៀតក្នុងនោះក៏មានខេត្ដព្រៃវែងផងដែរ ។ លោកអភិបាលខេត្ត បានបញ្ជាក់ថា ពន្ធនាគារនេះមានអគារទាំងអស់ចំនួន៧ខ្នង អាងស្ដុកទឹកមួយចំណុះ៥.០០០លីត្រ និងអណ្ដូងទឹក១ ដែលសរុបថវិកាសាងសង់អស់ចំនួន៣៥២.៦២៨,៩៤ដុល្លារអាមេរិក ។ ជាមួយគា្ននេះ រាជរដ្ឋាភិបាលកម្ពុជា តាមរយៈអគ្គនាយកដា្ឋនពន្ធនាគារក៏បានរួមចំណែកជាបដិភាគផងដែរ ដើម្បីសាងសង់របងជុំវិញ និងចាក់ដីបំពេញទីតាំងពន្ធនាគារដោយចំណាយអស់ថវិកាចំនួន១០៨.៦៦១ដុល្លារអាមេរិក ។
នាឱកាសនោះ លោកស្រីផេនី រីឆាត មានប្រសាសន៍ថា ពន្ធនាគារថ្មីនេះគឺជាសក្ខីភាពមួយដើម្បីឆ្លុះបញ្ចាំងនូវភាពជាដៃគូរវាងរាជរដ្ឋាភិបាលកម្ពុជា និងរដ្ឋាភិបាលអូស្ដ្រាលី ក្នុ្នងកិច្ចសហការការងារដើម្បីធ្វើឱ្យប្រសើរឡើងនៅគ្រប់ផ្នែកក្នុងប្រពន្ធ័យុត្ដិធម៌ព្រហ្មទណ្ ឌដែលរួមបញ្ចូលទាំងកិច្ចខិតខំប្រឹងប្រែង ដើម្បីធ្វើឱ្យប្រសើរឡើងនូវលក្ខខណ្ឌរស់នៅរបស់ប្រជាពលរដ្ឋដែលទទួលទោសនៅក្នុងពន្ធនាគារ ។ លោកស្រីបានបន្ដទៀតថា ពន្ធនាគារគឺជាកន្លែងដែលមានភាពតានតឹងជាច្រើន ជនជាប់ឃុំចាំបាច់ត្រូវគ្រប់គ្រងឱ្យបានម៉ត់ចត់ ហើយទន្ទឹមគា្ននេះដែរចាំបាច់ត្រូវមានកិច្ចខិតខំប្រឹងប្រែងដើម្បីផ្ដល់ឱកាសដល់ពួកគេដើម្បីក្លាយខ្លួនជាប្រជាពលរដ្ឋល្អនៅពេលដែលត្រូវបានដោះលែង ។ ការគ្រប់គ្រងជនជាប់ឃុំ ប្រកបដោយភាពស្មើគា្ន និងលក្ខខណ្ឌមនុស្សធម៌គឺជាកត្ដាមួយដ៏សំខាន់ និងជាមូលដា្ឋនដ៏ប្រសើរសម្រាប់ការគោរពសិទ្ធិមនុស្ស ។
មានប្រសាសន៍សំណេះសំណាលក្នុងពិធីនោះលោក ស ខេង បានបញ្ជាក់ថា តាមរយៈកិច្ចសហការអនុវត្ដរួមគា្នរវាងក្រសួងមហាផ្ទៃ អគ្គនាយកដា្ឋនពន្ធនាគារ អាជ្ញាធរខេត្ដព្រៃវែង ជាមួយគម្រោងជំនួយផ្នែកព្រហ្មទណ្ឌនិងយុត្ដិធម៌នៅកម្ពុជាដំណាក់កាលទី៣ បានជួយកសាងហេដ្ឋារចនាសម្ព័នពន្ធនាគារថ្មីក្នុងខេត្ដព្រៃវែងនេះ ប្រកបដោយគុណភាព និងមានស្ដង់ដាខ្ពស់ ផ្ដល់លក្ខខណ្ឌសុវត្ថិភាព សន្ដិសុខ សុខុមាលភាព និងមនុស្សធម៌ និងការឃុំឃាំងដោយឡែកសម្រាប់ស្ដ្រី និងអនីតិជន ។ នេះពិតជាបានបង្ហាញនូវជំហានវិជ្ជមាន និងធ្វើឱ្យប្រសើរឡើងលើវិស័យ ព្រហ្មទណ្ឌនិងយុត្ដិធម៌នៅកម្ពុជា ដែលជាសក្ខីកម្មមួយបញ្ជាក់យ៉ាងច្បាស់អំពីភាពរីកចម្រើននានាក្នុងការកែទម្រង់ និងការអភិវឌ្ឍពន្ធនាគារនៅកម្ពុជាឱ្យកាន់តែមានប្រសិទ្ធភាពមួយកម្រិតថែមទៀត ៕
ចែករំលែកព័តមាននេះ