រាជធានីភ្នំពេញ ៖ ក្រុមចោរបានបាញ់អាជីវករលក់មាសប្តូរប្រាក់នៅផ្សារស្ទឹងមានជ័យ ២នាក់ឪពុក-កូនប្លន់យកលុយ និងគ្រឿងអលង្ការយ៉ាងស្វិតស្វាញបំផុត កាលពីវេលាម៉ោង៥និង៣០នាទីល្ងាច ថ្ងៃទី១៩ ធ្នូ ២០១១ នៅពេលចេញពីផ្សារចូលទៅដល់ក្នុងផ្ទះទៅហើយដែលផ្ទះស្ថិតក្នុងភូមិព្រែកទ័ល សង្កាត់ស្ទឹងមានជ័យ ខណ្ឌមានជ័យ។
ក្រោយពេលបាញ់អ្នកលក់មាស-ប្តូរប្រាក់២នាក់ឪពុក និងកូនឱ្យរបួសហើយ ក្រុមចោរបានជិះម៉ូតូគេចខ្លួនបាត់យកទៅជាមួយនូវស្បោងគ្រឿងអលង្ការ និងលុយច្រើនសន្ធឹកសន្ធាប់ បន្សល់ទុកជនរងគ្រោះដែលចោរបាញ់ត្រូវស្មាឱ្យរងរបួសទាំង២នាក់ដេកដួល ហើយត្រូវបានគេបញ្ជូនទៅសង្គ្រោះនៅមន្ទីរពេទ្យយ៉ាងប្រញាប់ប្រញាល់ ។ ជនរងគ្រោះទាំង២នាក់ ឪពុកឈ្មោះ ចាន់ សៀក អាយុ៦៨ឆ្នាំ រងរបួសជើង និងម្តាយស្រីឈ្មោះ ចាន់ នី អាយុ៤០ឆ្នាំ រងរបួសស្មា អ្នកទាំងរស់នៅទីកន្លែងកើតហេតុខាងលើ ។
តាមប្រភពព័ត៌មានពីជនរងគ្រោះបានឱ្យដឹងថា ខណៈពួកគាត់២នាក់ឪពុក-កូនវេចខ្ចប់គ្រឿងអលង្ការ និងលុយចេញពីផ្សារស្ទឹងមានជ័យ ហើយធ្វើដំណើរទៅកាន់គេហដ្ឋាន… លុះពួកគាត់ចូលដល់ក្នុងផ្ទះទៅហើយ ស្រាប់តែមានបុរស២នាក់ស្ទុះចូលទៅតាម ហើយដកកាំភ្លើងភ្ជង់ និងដណ្តើមយកកាបូបគ្រឿងអលង្ការ និងលុយពីពួកគាត់ ប៉ុន្តែពួកគាត់មិនព្រមក៏ប្រវាយប្រតប់គ្នាជាមួយពួកចោរ ព្រោះតែស្តាយទ្រព្យសម្បត្តិដែលខំរកហូរញើសហូរឈាមតាំងពីយូរមកហើយ ។ ពេលនោះពួកចោរបានបាញ់២នាក់ឪពុក-កូនពួកគាត់៣គ្រាប់ត្រូវរបួសត្រង់ស្មាដេកដួលតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ