ខេត្តកំពង់ឆ្នាំង ៖ ប្រាក់ចំនួន២០ម៉ឺនរៀល ជាអំណោយដ៏ថ្លៃថ្លារបស់សប្បុរសជននៅរាជធានីភ្នំពេញ ត្រូវភ្នាក់ងារសារព័ត៌មានកោះសន្តិភាពនាំយកទៅប្រគល់ជូនលោក តាកំលោះចាស់ អាយុ៦៨ឆ្នាំ ដែលពិការភ្នែក រស់នៅឯកោ និងមួយផ្នែកទៀតយកទៅប្រគល់ជូនកុមារក្រីក្រដែលធ្លាក់ពីលើចុង អម្ពិល ។
ខេត្តកំពង់ឆ្នាំង ៖ ប្រាក់ចំនួន២០ម៉ឺនរៀល ជាអំណោយដ៏ថ្លៃថ្លារបស់សប្បុរសជននៅរាជធានីភ្នំពេញ ត្រូវភ្នាក់ងារសារព័ត៌មានកោះសន្តិភាពនាំយកទៅប្រគល់ជូនលោកតាកំលោះចាស់ អាយុ៦៨ឆ្នាំ ដែលពិការភ្នែក រស់នៅឯកោ និងមួយផ្នែកទៀតយកទៅប្រគល់ជូនកុមារក្រីក្រដែលធ្លាក់ពីលើចុងអម្ពិល ។
អំណោយនោះបានប្រគល់ជូននៅព្រឹកថ្ងៃទី១៨ ធ្នូ ក្នុងនោះទឹកប្រាក់ចំនួន១០មឺុនរៀល បានប្រគល់ជូនកុមារាឈ្មោះសំ សុគារិន្ទ អាយុ១៣ឆ្នាំ នៅមន្ទីរពេទ្យខេត្ត ដោយម្តាយឈ្មោះសំ នាង អាយុ៣៤ឆ្នាំជាអ្នកទទួល។ ប្រាក់អំណោយនេះកោះសន្តិភាពបានទទួលពីលោកឧត្តមសេនីយ៍ត្រី កែវ សារ៉ុម នាយសេនាធិការរង កងទ័ពជើងអាកាស ។ ស្ត្រីជាម្តាយនិយាយថា គ្រួសារគាត់មានសមាជិក៧នាក់ គឺម្តាយឪពុក និងកូន៥នាក់។ ដោយសារជីវភាពក្រីក្រខ្លាំងពេកគាត់បានសុំដីគេសង់ខ្ទមមួយនៅក្រោមដើមអម្ពិល ស្ថិតក្នុងភូមិព្រៃខ្មែរ ឃុំរលាប្អៀរ ។ កាលពីថ្ងៃទី១២ ធ្នូ គាត់បានប្រើកូនប្រុសឡើងកាប់មែកអំពិល ដើម្បីបេះយកផ្លែយកប្រាក់លក់ទិញអង្ករ តែចៃដន្យកូនប្រុសគាត់ធ្លាក់បណ្តាលឱ្យរបួសធ្ងន់ ។
ដោយឡែកប្រាក់ចំនួន១០ម៉ឺនរៀលទៀតបានយកប្រគល់ជូនលោកតាកំលោះចាស់ អាយុ៦៨ឆ្នាំ ពិការភ្នែកសងខាងឈ្មោះអ៊ឹម សុក រស់នៅភូមិថ្មី ឃុំតាំងក្រសាំង ស្រុកទឹកផុស ។
ប្រាក់នេះ ជាអំណោយរបស់លោកហួរ ពិសិដ្ឋ ប្រធានចាត់ចែងទូទៅដេប៉ូចែកចាយផលិតផលគ្រឿងសំអាងភ្នំពេញ និងតាមបណ្តាខេត្ត “PLL” ដែលមានអាសយដ្ឋានលេខ៩៩ ផ្លូវ៥១BT សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
ស្ត្រីជាម្តាយកុមាររងគ្រោះ និងលោកតាពិការភ្នែកបានថ្លែងអំណរគុណយា៉ងជ្រាលជ្រៅចំពោះសប្បុរសជន និងបានប្រសិទ្ធពរជ័យឱ្យជួបប្រទះតែវិបុលសុខគ្រប់ប្រការកុំបីឃ្លៀងឃ្លាតឡើយ៕
ចែករំលែកព័តមាននេះ