ខេត្តស្វាយរៀង ៖ ក្រុមមន្ត្រីនគរបាលខេត្តបានតាមប្រមាញ់អតីតភិក្ខុសង្ឃ១រូបដែលរត់គេចខ្លួនដោយជាប់ចោទពីបទសមគំនិតប៉ុនប៉ងធ្វើមនុស្សឃាតមិនបានសម្រេចទៅលើភិក្ខុសង្ឃមួយអង្គគង់នៅវត្តចន្ត្រី ឃុំចន្ត្រី ស្រុករមាសហែក ហើយភ័យខ្លួនក៏និមន្តចេញពីវត្តទៅដោះស្បង់ចីវរចោលនៅផ្ទះញោមរបស់ខ្លួន រួចរត់គេចទៅលាក់ខ្លួននៅខេត្តមណ្ឌលគិរី ក៏ប៉ុន្តែសំណាងអាក្រក់ត្រូវសមត្ថកិច្ចតាមចាប់ខ្លួនបញ្ជូនមកសាលាដំបូងខេត្តចាត់ការតាមផ្លូវច្បាប់ ។
ទាក់ទិននឹងករណីខាងលើ លោកវរសេនីយ៍ត្រីកុយ សុភាព នាយរងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានប្រាប់កោះសន្តិភាពថា ការចាប់ខ្លួនជនសង្ស័យនេះគឺចាប់តាមដីការបស់តុលាការដែលចុះហត្ថលេខាដោយលោកចៅក្រមស៊ើបសួរគាំ ឈាន ចោទពីបទសមគំនិតប៉ុនប៉ងធ្វើមនុស្សឃាត។ ជនសង្ស័យឈ្មោះចិន សារ៉េន ហៅសុខ ចំរើន អាយុ២៤ឆ្នាំ អតីតភិក្ខុសង្ឃបួសនៅវត្តឧត្តមសាមគ្គី ឃុំធ្មា មានទីលំនៅភូមិខ្នងជ្រូកខាងកើតឃុំចន្ត្រី ស្រុករមាសហែក ជាប់ចោទពីបទសមគំនិតប៉ុនប៉ងធ្វើមនុស្សឃាតទៅលើភិក្ខុសង្ឃមួយអង្គនាមសុទ្ធ គង់នៅវត្តចន្ត្រី កាលពីថ្ងៃទី៣ សីហា ២០០៩ វេលាម៉ោង២រសៀលនៅវត្តចន្ត្រីនោះ ។
លោកកុយ សុភាព បន្តទៀតថា ជនសង្ស័យបានបួសនៅវត្តឧត្តមសាមគ្គី រួចនិមន្តទៅរៀន បាលីនៅវត្តចន្ត្រី ក្រោយមកមានទំនាស់ជាមួយភិក្ខុសង្ឃមួយអង្គនាមសុទ្ធ ក៏កើតទោសៈបានទៅជួលក្មេងទំនើងឱ្យតម្លៃ១០ម៉ឺនរៀលឱ្យកាប់ភិក្ខុសង្ឃរងគ្រោះ។ ឯក្មេងទំនើងដោយសារចង់បានប្រាក់ក៏ទាញកាំបិតដេញកាប់ភិក្ខុសង្ឃនាមសុទ្ធ ទាំងកណ្តាលថ្ងៃ ធ្វើឱ្យសង្ឃគង់នៅវត្តចន្ត្រី ភ័យឆោឡោក៏ដឹងដល់សមត្ថកិច្ច ឃុំចន្ត្រី ចុះមកចាប់ខ្លួនជនល្មើសបានភ្លាមៗ។ ក្រោយពីសមត្ថកិច្ចសាកសួរ ជនសង្ស័យនោះបានសារភាពប្រាប់ប៉ូលិសថា ភិក្ខុសង្ឃនាមចិន សារ៉េន ជាអ្នកជួលខ្លួនឱ្យកាប់ តែសង្ឃអង្គនោះគេចខ្លួន ទើបមានដីកាតាមស្វែងរកចាប់ខ្លួន។ រហូតមកដល់ថ្ងៃទី១៤ ធ្នូ ២០១១ មានប្រជាពលរដ្ឋផ្តល់ដំណឹងឱ្យ ទើបសមត្ថកិច្ចការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តទទួលបទបញ្ជាពីលោកស្នងការនគរបាលខេត្ត ទៅសហការជាមួយលោកស្នងការនគរបាលខេត្តមណ្ឌលគិរី ចាប់ខ្លួនជនសង្ស័យបាននៅថ្ងៃទី១៥ ធ្នូ វេលាម៉ោង៤និង២០នាទីរសៀលនៅចំណុចភូមិពូជ្រៃចាង ឃុំពូជ្រៃ ស្រុកពេជ្រាដា ខេត្តមណ្ឌលគិរី រួចបញ្ជូនមកខេត្តស្វាយរៀងទើបតុលាការចេញដីកាឃុំខ្លួននៅថ្ងៃទី១៧ ធ្នូ ។
រីឯជនសង្ស័យជាអតីតភិក្ខុសង្ឃបានឆ្លើយថា ការពិតនោះ ខ្លួនខឹងភិក្ខុនាមសុទ្ធនោះមែន ដោយសារបានធ្វើបាបសាមណេរពីរអង្គ មួយអង្គនាមរ៉ាន ព្រះជន្ម១២ឆ្នាំ និងមួយអង្គទៀតនាមទឺ ព្រះជន្ម១៧ឆ្នាំ ដែលបាននិមន្តមករៀនបាលីដែរ ហើយគង់នៅក្នុងកុដិជាមួយខ្លួន។ ការស្តីបន្ទោសនោះខ្លួនគិតថា មិនអាចទទួលយកបានក៏និយាយរអ៊ូៗថា មានអ្នកណាហ៊ានកាប់ភិក្ខុសង្ឃឈ្មោះសុទ្ធ ខ្លួនឱ្យលុយ១០ម៉ឺនរៀល។ ពេលនោះឈ្មោះឌួង នៅជិតវត្តនិយាយថា ឱ្យ១០ម៉ឺនរៀលមែនឬ? ខ្លួនក៏ឆ្លើយថា មែនឱ្យតែហា៊នកាប់ ថាហើយក៏ឡើងទៅលើកុដិសិងទៅ។
ស្រាប់តែនៅវេលាម៉ោង២រសៀលឈ្មោះឌួង បានយកកាំបិតដេញកាប់ភិក្ខុសង្ឃនាមសុទ្ធ មែន បង្កការភ្ញាក់ផ្អើលពេញក្នុងវត្តតែម្តង តែការកាប់អត់បានទេ ព្រោះភិក្ខុសង្ឃនោះរត់រួច ក៏ប្តឹងសមត្ថកិច្ចឱ្យចាប់ខ្លួនឈ្មោះឌួងតែម្តង ។ ដោយសារភ័យខ្លាចឈ្មោះឌួង ឆ្លើយដាក់ខ្លួនក៏រត់ទៅផ្ទះញោមដោះស្បង់ចីវរទុករួចស្លៀកពាក់ខោអាវរត់គេចខ្លួនទៅនៅខេត្តមណ្ឌលគិរី ៕
ចែករំលែកព័តមាននេះ