រាជធានីភ្នំពេញ ៖ ក្រុមអាជីវករនៅផ្សារអូឡាំពិកប្រមាណជាង១៥០នាក់ កាលពីព្រលប់ថ្ងៃទី១៧ ធ្នូ និងបន្តដល់ព្រឹកថ្ងៃទី១៨ ធ្នូ បានបណ្តាក់គ្នាទៅអង្គុយសំកុកមុខផ្ទះម្តាយមេតុងទីនម្នាក់ដែលស្ថិតនៅផ្លូវលេខ៤៦០ សង្កាត់ទួលទំពូងទី២ ខណ្ឌចំការមន ខណៈមេតុងទីនរត់ទៅស្រុកសៀមបាត់ ។
ក្រុមអាជីវករបានប្រាប់ឱ្យដឹងថា មេតុងទីន ឈ្មោះជា សោភ័ណ្ឌ ហៅលីលី ភេទស្រី អាយុ៣២ឆ្នាំ ប្តីឈ្មោះថោង វណ្ណដេត អាយុ៣៣ឆ្នាំ មានអាសយដ្ឋានផ្ទះលេខ៩០៨ ផ្លូវបេតុង ក្នុងបុរី៩៩៩ សង្កាត់បឹងទំពុន ខណ្ឌមានជ័យ។ ក្រុមអាជីវករបានឱ្យដឹងទៀតថា មេតុងទីនឈ្មោះជា សោភ័ណ្ឌ ហៅលីលី មានមុខរបរលក់កាបូប នៅក្នុងផ្សារអូឡាំពិកយូរឆ្នាំមកហើយ ដោយសារមានការរាប់អានពីសំណាក់អាជីវករដូចគ្នា កាលពី២ឆ្នាំកន្លងមកនេះ អ្នកស្រីលីលីបានបង្កើតជាក្រុមលេងតុងទីនដោយអ្នកស្រីធ្វើមេ និងមានអាជីវករប្រមាណជាង១៥០នាក់ បានលេងជាមួយ ព្រោះតែជឿទុកចិត្តគ្រប់គ្នា ។ តាមការរៀបរាប់ឱ្យដឹងទៀតថា តុងទីនដែលលេងនោះ១ក្បាល៥០០ដុល្លារ ខ្លះ២០០ដុល្លារ និងរហូតដល់១០ដុល្លារដេញក្នុង១ថ្ងៃ១ដង ហើយនៅពេលដេញនោះក៏មានការលក់ពីមួយទៅមួយដែលមើលទៅ គឺសប្បាយលេងព្រោះទទួលបានការប្រាក់ខ្ពស់ ។
ក្រុមអាជីវករជាកូនតុងទីនបន្តថា ៦ខែចុងក្រោយនេះ តាមការកត់សម្គាល់មេតុងទីនទំនងដូចជាមិនសូវស្រួល ព្រោះមេក្រឡុកកូនខ្លាំងណាស់ដូចជាពេលដេញបានមិនដឹងប្រាក់នៅឯណា អ្នកដេញបានប្រៀបដូចដេញយកខ្យល់ ។ ប្រការដែលខុសប្លែកថែមទៀតនោះគឺគេតែងឃើញមេតុងទីនឈ្មោះលីលី និងប្តីឧស្សាហ៍ចេញចូលកាស៊ីណូញឹកញាប់ ប្រហែលជាចាញ់វ័ណ្ឌ.កនៅកាស៊ីណូ បានជារត់ចោលស្រុក ធ្វើឱ្យពួកគេកូនៗតុងទីនស្រឡាំងកាំងគ្រប់គ្នា ។
តាមការអះអាងពីក្រុមអាជីវករជាកូនតុងទីនប្រមាណជាង១៥០នាក់ថា មេតុងទីនឈ្មោះលីលី នៅជាប់ប្រាក់ពួកគេសរុបរាប់លានដុល្លារព្រោះខ្លះបាត់បង់៤៥ម៉ឺនដុល្លារ ខ្លះ៣០ម៉ឺន ខ្លះ ២០ម៉ឺន ខ្លះ១០ម៉ឺន និងតិចបំផុតក៏៣ម៉ឺនដុល្លារឡើងទៅដែរ ។ តែប្រាក់រាប់លានដុល្លារនោះមិនមែនជាប្រាក់លេងតុនទីនសុទ្ធសាធទេ គឺប្រាក់ខ្លះខ្ចីដោយមានកិច្ចសន្យាត្រឹមត្រូវ ហើយប្រាក់ខ្លះទៀតទិញរថយន្តគេមិនទាន់បានបង្វិលលុយឱ្យម្ចាស់ ។
ការរត់គេចដូរដីពីស្រុកខ្មែរទៅស្រុកសៀមនោះ ទំនងមកពីមេតុងទីនបានដឹងខ្លួនថា មិនមានសមត្ថភាពយកឈ្នះក្នុងកាស៊ីណូយកលុយមកសងកូនៗតុងទីនវិញបាន ដែលមានតែផ្លូវម្យ៉ាងគឺដូរដីរត់ចោលស្រុក ។ បានកត់សម្គាល់ឃើញថា កាលពីព្រឹកថ្ងៃទី១៧ ធ្នូ មេតុងទីនរូបនេះ បានលក់តូប៣កន្លែងនៅក្នុងផ្សារអូឡាំពិកបានប្រាក់ជាង១០ម៉ឺនដុល្លារ និងផ្ញើកូនម្នាក់ឱ្យម្តាយបង្កើតនៅខេត្តបាត់ដំបង កូនម្នាក់ទៀតផ្ញើម្តាយក្មេកនៅទួលទំពូង និងយកកូនច្បងទៅជាមួយដែលគេដឹងថា បានចេញពីភ្នំពេញបាត់តាំងពីព្រលឹម និងបានឆ្លងផុតពីដីខ្មែរចូលទៅប្រទេសថៃតាមច្រកទ្វារចាំយាម ខេត្តកោះកុង ។ ពេលដឹងថា អ្នកស្រីលីលីនាំប្តី និងកូនចេញផុតពីស្រុកខ្មែរបាត់ទៅហើយនោះ ពួកគេហាក់ដូចជាមិនអស់ចិត្ត បាននាំគ្នាទៅពពាក់ពពូននៅឈរមុខផ្ទះម្តាយក្មេកអ្នកស្រីលីលី ដើម្បីប្រមូលព័ត៌មានរៀបចំសំណុំរឿងដាក់បណ្តឹងទៅកាន់សាលាដំបូងរាជធានីភ្នំពេញនៅព្រឹកថ្ងៃចន្ទនេះ ។
បើទោះជាយ៉ាងណា ការដាក់ពាក្យបណ្តឹងនោះមិនប្រាកដថានឹងអាចយកប្រាក់បានគ្រប់ចំនួនពីមេតុងទីនវិញទេ ។ ប៉ុន្តែម្នាក់ៗជាកូនតុងទីនចង់ឃើញមេតុងទីនចេញមុខទទួលខុសត្រូវ និងត្រូវទទួលទោសតាមផ្លូវច្បាប់មិនត្រូវគេចខ្លួនបែបនេះឡើយ ៕
ចែករំលែកព័តមាននេះ