រាជធានីភ្នំពេញ ៖ សម្តេចហេង សំរិន ប្រធានរដ្ឋសភា បានមានប្រសាសន៍នៅក្នុងឱកាសទទួលជួបសវនាការជាមួយលោកថង ស៊ីងថាំម៉ាវង្ស នាយករដ្ឋមន្ត្រីឡាវនៅវិមានរដ្ឋសភា កាលពីថ្ងៃទី៧ មីនា ឆ្នាំ២០១១ ថា ចំពោះការឈ្លានពានរបស់សៀមមកលើទឹកដីកម្ពុជានៅតំបន់ប្រាសាទព្រះវិហារ ជំហរកម្ពុជាគឺប្តេជ្ញាខ្ពស់ការពារអធិបតេយ្យជាតិ បូរណភាពទឹកដីមិនឱ្យបាត់បង់ឡើយ ។
សម្តេចប្រធានរដ្ឋសភាបានបន្តថា ទន្ទឹមនឹង នេះកម្ពុជានៅតែរក្សាមិត្តភាពជាមួយនឹងថៃ។ កម្ពុជាគោរពធម្មនុញ្ញ អង្គការសហប្រជាជាតិ និងធម្មនុញ្ញអាស៊ាន ព្រមទាំងច្បាប់អន្តរជាតិ។ យើងខ្ញុំមាន ការអត់ធ្មត់ខ្លាំងណាស់ យកការចរចារដោយសន្តិវិធី ក្នុងនាមជាអ្នកជិតខាងភូមិផងរបងជាមួយ បញ្ចៀសសង្រ្គាម ដោយយកគោលការណ៍ច្បាប់ជាមូលដ្ឋាន។ ការចរចាគ្នាជាច្រើនលើកមកហើយតែលទ្ធផលមិនទៅមុខ ពេលបាន MOU គេបែរជាយកទៅឆ្លងពួកអាវលឿងនៅតាមចិញ្ចើមផ្លូវទៅវិញ។ ឯពួកនយោបាយសៀមចេះតែគឃ្លើនចូលទឹកដីកម្ពុជា គេបានធ្វើសមយុទ្ធដើម្បីបង្ហាញកម្លាំងសាច់ដុំគេ ព្រមទាំងឈ្លានពានចូលទន្រ្ទានទឹកដីកម្ពុជាជាច្រើនកន្លែង។
សម្តេចហេង សំរិន បានជម្រាបលោកនាយករដ្ឋមន្ត្រីឡាវទៀតថា ដោយអាងខ្លួនជាប្រទេសធំមានកម្លាំងសេដ្ឋកិច្ច និងយោធាខ្លាំងគេបានគូសផែនទីជាឯកតោភាគីចូលទឹកដីកម្ពុជា ដើម្បីចង្អុលកន្លែងនេះជារបស់គេ កន្លែងនោះជារបស់គេ ហើយប្រើកម្លាំងបាយទន្ទ្រានចូលតែម្តង ៕
ចែករំលែកព័តមាននេះ