ខេត្តព្រៃវែង ៖ អង្គការអន្តរជាតិទេសន្តរប្រវេសន៍ (IOM) គឺជាអង្គការមួយក្នុងចំណោមអង្គការជាច្រើនដែលជាដៃគូរបស់រាជរដ្ឋាភិបាល និងកំពុងអនុវត្តគម្រោងជំនួយសង្គ្រោះបន្ទាន់ ដោយសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ និងគណៈកម្មាធិការគ្រប់គ្រងគ្រោះមហន្តរាយខេត្តព្រៃវែង ខេត្តស្វាយរៀង និងខេត្តកំពង់ចាម ក្រោមការឧបត្ថម្ភថវិកាពីមូលនិធិឆ្លើយតបគ្រោះមហន្តរាយជាបន្ទាន់របស់អង្គការសហប្រជាជាតិ ។
សម្រាប់ខេត្តស្វាយរៀង អង្គការនេះបានផ្តល់ដល់ប្រជាពលរដ្ឋ ក្នុងស្រុកស្វាយជ្រំ ចំនួន ១.៤០០គ្រួសារ ខេត្តព្រៃវែង ក្នុងស្រុកពាមរក៍៨០០គ្រួសារ ស្រុកកំពង់លាវ ១.០០០គ្រួសារ និងខេត្តកំពង់ចាម ក្នុងស្រុកកងមាស និងស្រុកស្រីសន្ធរចំនួន១.៨០០គ្រួសារ សរុបចំនួន ៥.០០០គ្រួសារ ដែលក្នុងមួយគ្រួសារៗទទួលបាន តង់ដំបូល១ តង់ក្រាលដី១ កូនឈើ៣ដើម ខ្សែមួយដុំ កាំបិតផ្គាក់១ កូនកាំបិតមួយ ចបកាប់១ ចបជីក១ រណារដៃ១ ញញួរ១ ពូថៅមួយ និងចង្ក្រានដី១ ។
ដោយឡែកនៅស្រុកពាមរក៍ ខេត្តព្រៃវែងនាថ្ងៃទី១៣ ធ្នូ នៅក្នុងបរិវេណវត្តឧត្តមខេមរារាម ហៅវត្តឧត្តមសមាគម ស្ថិតក្នុងឃុំព្រែកខ្សាយ “ក” គឺជាថ្ងៃទី៣ហើយ ដែលអង្គការអន្តរជាតិទេសន្តរប្រវេសន៍ បាននាំយកជំនួយសង្គ្រោះបន្ទាន់ទាំងនោះទៅធ្វើការចែកជូនបងប្អូនជាជនរងគ្រោះ ដោយទឹកជំនន់កន្លងមកចំនួន ៤១០គ្រួសារ មកពីឃុំ៤ គឺឃុំអ្នកលឿង ឃុំព្រែកខ្សាយ”ក” ឃុំព្រែកខ្សាយ”ខ” និងឃុំបន្លិចប្រាសាទ ។ ចូលរួមក្នុងពិធីនោះមានលោក ម៉ុក ធារី អភិបាលរងខេត្ត លោក សៅ ប្រសិដ្ឋ អភិបាលស្រុកពាមរក៍ លោក ប្រ៊ុយណូ ម៉ាតូនី ប្រធានអង្គការ IOM និងសហការីជាច្រើនរូបទៀត ក្រុមប្រឹក្សាស្រុក គណៈអភិបាលស្រុក មន្ត្រីសាលាស្រុក លោកមេឃុំ ក្រុមប្រឹក្សាឃុំ មេភូមិ កងកម្លាំងប៉ុស្តិ៍រដ្ឋបាលមូលដ្ឋាន និងបងប្អូនពលរដ្ឋរងគ្រោះចំនួន ៤១០គ្រួសារ ។
លោក សៅ ប្រសិដ្ឋ បានសំដែងនូវការស្វាគមន៍យ៉ាងកក់ក្តៅ និងថ្លែងអំណរគុណលោកអភិបាលរងខេត្ត ដែលបានអនុញ្ញាតឱ្យអង្គការIOM ចូលមកជួយដល់ស្រុកពាមរក៍ដែលជាស្រុកមួយទទួលរងផលប៉ះពាល់យ៉ាងធ្ងន់ធ្ងរពីទឹកជំនន់កន្លងមក ។ លោកក៏បានថ្លែងអំណរគុណយ៉ាងជ្រាលជ្រៅអង្គការ IOM ដែលបានខិតខំស្វះស្វែងរកជំនួយពីសប្បុរសជននានានៅក្រៅប្រទេសមកជួយដល់ស្រុកពាមរក៍ ដើម្បីជាការឆ្លើយតបបន្ទាន់នូវសេចក្តីត្រូវការរបស់បងប្អូនប្រជាពលរដ្ឋយើង ។ លោកបានបញ្ជាក់ថា រហួតមកដល់ថ្ងៃទី១៣ ធ្នូ ២០១១ ស្រុកពាមរក៍បានទទួលអំណោយនិងធ្វើការចែកជូនដល់ដៃប្រជាពលរដ្ឋបានចំនួន ១២.៩៩៤គ្រួសារហើយ ក្នុងចំណោមគ្រួសាររួមចំនួនជាង ១៤.០០០គ្រួសារ ហើយក្នុងនោះអំណោយបានទទួលពីអង្គការទាំងក្នុងនិងក្រៅរដ្ឋាភិបាលមានចំនួនជាង ៥.០០០គ្រួសារ មានដូចជាអង្គការ World Food, ADRA, IOM, ស្រឡាញ់កម្ពុជា,វិទ្យុ ABC, WOMEN, កាកបាទក្រហមកម្ពុជា, សហព័ន្ធអន្តរជាតិនៃសមាគមកាកបាទក្រហម និងអឌ្ឍច័ន្ទក្រហមជាដើម ។
លោក ប្រ៊ុយណូ មា៉តូនី បានសម្តែងក្តីសប្បាយរីករាយ ដោយឃើញបងប្អូនដែលជាគ្រួសាររងគ្រោះបានមកទទួលយកជំនួយសង្គ្រោះបន្ទាន់ផ្ទាល់ដៃពីអង្គការរបស់លោក តាមរយៈការពិនិត្យជ្រើសរើសពីអាជ្ញាធរមូលដ្ឋាន ដោយពុំមានរើសអើងនិន្នាការនយោបាយ ពូជសាសន៍ បក្សពួកនិយម គ្រួសារនិយមឡើយ ។ លោកក៏មានការសប្បាយចិត្ត ដោយឃើញមានការចូលរួមសហការយ៉ាងសស្រាក់សស្រាំ និងជិតស្និទ្ធបំផុតពីអាជ្ញាធរគ្រប់ជាន់ថ្នាក់ កម្លាំងប្រដាប់អាវុធ ព្រមទាំងមានការរៀបរយល្អសមរម្យទៅតាមស្ថានភាពជាក់ស្តែងរបស់មូលដ្ឋាន ។
លោក ប្រ៊ុយណូ មា៉តូនី បានបន្តទៀតថា ព្រៃវែងគឺជាខេត្តស្ថិតក្នុងលំដាប់ទី១ ជាមួយនឹងខេត្តកំពង់ធំដែរ ដែលទទួលរងផលប៉ះពាល់ដោយទឹកជំនន់ធ្ងន់ធ្ងរជាងគេ ។ ដោយឡែកមានស្រុក២ គឺស្រុកពាមរក៍ និងស្រុកកំពង់លាវ ដែលលោកមានការចាប់អារម្មណ៍ខ្លាំង ហើយលោកបានធ្វើគម្រោងស្នើសុំទៅមូលនិធិឆ្លើយតបគ្រោះមហន្តរាយជាបន្ទាន់របស់អង្គការសហប្រជាជាតិ (CERF) ដើម្បីទិញសម្ភារទាំងអស់នេះមកចែកជូនដល់បងប្អូន ។ ទោះបីសម្ភារទាំងនេះ ជាសម្ភារសម្រាប់ជាជម្រកក្នុងការរស់នៅលើទួលសុវត្ថិភាពពេលទឹកជំនន់នោះក្តី ប៉ុន្តែពេលនេះ គឺទឹកបានស្រកផុតទៅហើយ ទើបយើងបានធ្វើការចែកចាយ ទោះបីជាយ៉ាងណាសម្ភារទាំងនេះ គឺជាការឆ្លើយតបនឹងតម្រូវការបំផុតសម្រាប់យើងប្រើប្រាស់ប្រចាំថ្ងៃ និងប្រើប្រាស់ស្របនឹងតម្រូវការរបស់ពលរដ្ឋ ។
លោក ម៉ុក ធារី អភិបាលរងខេត្ត បានកោតសសើរចំពោះសកម្មភាពរបស់អង្គការ IOM និងសហការីទាំងម្ចាស់ ព្រមទាំងអស់ជំនួយ ដែលបានចំណាយធនធាន ថវិកាយ៉ាងច្រើនដើម្បីជួយដល់អ្នករងគ្រោះនៅខេត្តព្រៃវែងនាពេលនេះ ។ សកម្មភាពទាំងនេះ គឺជាការចូលរួមរំលែកទុក្ខលំបាករបស់រាជរដ្ឋាភិបាល ក៏ដូចជាខេត្ត ស្រុក ហើយនេះក៏ជាការឆ្លុះបញ្ចាំងឱ្យឃើញពីសាមគ្គីភាព ពីការចូលរួមចែករំលែក និងជាការឆ្លើយតបតាមតម្រូវការ ក្នុងនាមជាដៃគូដ៏ល្អជាមួយរាជរដ្ឋាភិបាល។ លោកក៏បានស្នើសុំឱ្យអង្គការ IOM ជួយបន្តសកម្មភាពរបស់ខ្លួន និងពង្រីកទៅតាមបណ្តាស្រុកមួយចំនួនទៀតក្នុងខេត្ត ៕
ចែករំលែកព័តមាននេះ