ខេត្តរតនគិរី ៖ ឈើប្រណីតប្រភេទធ្នង់ ដែលមានមុខកាត់ធំៗ កំពុងត្រូវឈ្មួញដឹកជញ្ជូនយ៉ាងអនាធិបតេយ្យតាមរថយន្តធុនធំ (រថយន្តអារ៉េវ) និងគោយន្តច្នៃសម្រុកចូលមកស្រុកអណ្តូងមាសនិងមួយចំនួនទៀតលួចលាក់ដឹកទៅប្រទេសវៀតណាម។ ឈើប្រណីតដែលគេសំរុកដឹកនេះ ត្រូវគេកាប់ផ្តួលរំលំពាសពេញព្រៃស្ថិតក្នុងឃុំម៉ាលិច ឃុំតាឡាវ និងឃុំញ៉ាង ក្នុងស្រុកអណ្តូងមាសដោយពុំមានការបង្ក្រាបទេ ។ ជាងនេះទៅទៀតតំបន់ខ្លះកំពុងតែត្រួសត្រាយផ្លូវនិងធ្វើស្ពានឆ្លងអូរដើម្បីចូលទៅដឹកជញ្ជូនឈើប្រណីតទាំងនោះផងដែរ ។
បើតាមប្រភពពីស្រុកអណ្តូងមាសបង្ហើបឱ្យដឹងថា មេឈ្មួញធំៗមិនក្រោមពី១៥នាក់ឡើយដែលធ្លាប់កាប់ឈើប្រណីតប្រភេទធ្នង់យ៉ាងរង្គាលនៅត្រើយម្ខាងទន្លេសេសាន ក្នុងឃុំញ៉ាង ហើយត្រូវសមត្ថកិច្ចចម្រុះរបស់ខេត្តរឹបអូសបានឈើប្រណីតជាង៩០០ម៉ែត្រគូប ។ កន្លងទៅថ្មីៗរហូតមកដល់ពេលនេះឈ្មួញមួយចំនួនកំពុងរត់គេចខ្លួន ឯមួយចំនួនទៀតបង្វែរទិសទៅសម្រុកចូលទៅកាប់និងដឹកជញ្ជូនឈើនៅតំបន់ដែលមិនចាំបាច់ឆ្លងទន្លេសេសានវិញ គឺនៅក្នុងឃុំម៉ាលិចនិងឃុំតាឡាវ ។
សកម្មភាពជាក់ស្តែង ជារៀងរាល់ថ្ងៃឈើប្រណីតប្រភេទធ្នង់ដែលកំពុងសំរុកដឹកជញ្ជូនខ្លាំង គឺឃុំតាឡាវ ដែលឈ្មួញដឹកជញ្ជូននៅពេលយប់ចាប់ពីម៉ោង៩រហូតដល់ម៉ោង១២អធ្រាត្រ ។ រថយន្តមួយគ្រឿងអាចផ្ទុកបានឈើចាប់ពី៥ម៉ែត្រគូបទៅ៨ម៉ែត្រគូប ហើយក្នុងមួយយប់មានរថយន្តដឹកជញ្ជូនចាប់ពី៤ទៅ៨គ្រឿង ។ ក្នុងរថយន្តមួយគ្រឿងត្រូវម្ចាស់ប្រាប់ថា បង់ជូនសមត្ថកិច្ចចំនួន២០ម៉ឺនរៀល ក្នុងមួយស្ថាប័នហើយមានស្ថាប័នខ្លះប្រាប់ថា កុំឱ្យដឹកពេលថ្ងៃ គឺចាំពេលយប់ជ្រៅចាំដឹកជញ្ជូន ។ ឈើប្រណីតដែលកាប់រាយប៉ាយមាននៅតាមបណ្តាចំណុចមួយចំនួនដូចជានៅក្នុងភូមិរោង ភូមិកាក់ ភូមិអុីន ភូមិណាកធំ ភូមិកាណាកតូច និងឃុំតាឡាវ និងភូមិលោម ឃុំម៉ាលិច ។ ពេលបច្ចុប្បន្នចំណុចដែលជាច្រកដឹកជញ្ជូនគឺតាមផ្លូវលំកាត់ ព្រៃជ្រៅដែលគេហៅថាច្រកទ្វារអូរតាម៉ូ ក្នុងភូមិកាណាកធំ ក្នុងឃុំតាឡាវ ស្រុកអណ្តូងមាស ។
សហគមន៍ជនជាតិភាគតិចដែលប្រចាំការនៅទីនោះក៏ចាំអង្គុយយកប្រាក់ជារៀងរាល់ថ្ងៃដែរ ។ តំណាងសហគមន៍ប្រាប់ថា ពួកគាត់ចាំយកប្រាក់ពីរថយន្តដឹកឈើប្រណីតប្រភេទ ធ្នង់ក្នុងរថយន្តមួយគ្រឿង២០ម៉ឺនរៀល ដោយមានដាក់របាំងឈើធ្វើជាកុងត្រូលបើពុំបង់ប្រាក់ ឱ្យពួកគាត់ទេ ពុំអនុញ្ញាតឱ្យដឹកជញ្ជូនចេញឡើយ ។
តំណាងសហគមន៍នៅទីនោះបន្តទៀតថា ឈ្មួញដឹកឈើមានច្រើនណាស់ ប៉ុន្តែពួកគាត់ស្គាល់តែឈ្មោះតាអ៊ី ម្នាក់ប៉ុណ្ណោះ ដែលធំជាងគេក្នុងតំបន់នោះ ។ គាត់ជាជនជាតិវៀតណាម អាយុប្រហែលជាង៥០ឆ្នាំ រស់នៅក្រុងបានលុង។ ពួកឈ្មួញដឹកជញ្ជូនឈើបានប្រាប់ពួកគាត់ថា ឈើនៅក្នុងព្រៃដែលត្រូវដឹកជញ្ជូនឆ្លងកាត់អូរតាម៉ូនោះពួកគេនឹងដឹកជញ្ជូនរហូតដល់ខែមករា ឆ្នាំ២០១២ ទើបឈប់ដឹក ហើយថៅកែឈ្មោះតាអុី បង់ប្រាក់ចំនួន២លានរៀល ក្នុងចំនួន១០ជើងបង់ម្តង។
តាមប្រភពថា ឈើតាអ៊ី នឹងលែងដឹកជញ្ជូនតាមផ្លូវអូរតាម៉ូទៀតហើយ គឺគាត់កំពុងត្រួសត្រាយផ្លូវថ្មី ដោយមិនបាច់បង់ប្រាក់ដល់សហគមន៍គឺកំពុងធ្វើស្ពានថ្មីមិនទាន់បានឆ្លងនៅឡើយ ដែលគេហៅថា ចំណុចអូរថ្ម។
តាអ៊ី និយាយថា គាត់ដឹកឈើនេះគឺមិនមានភាពអត្តនោម័តដោយខ្លួនឯងទេ គឺមានមេមានកោយរបស់គាត់ ។
ទាក់ទិននឹងភាពអនាធិបតេយ្យដឹកជញ្ជូនឈើប្រណីតនេះពុំអាចសុំការបំភ្លឺពីសមត្ថកិច្ចនៅក្នុងស្រុកអណ្តូងមាសបានឡើយ ព្រោះហាក់ដូចជាមានការស៊ីសង្វាក់ជាប្រព័ន្ធទៅហើយ៕
ចែករំលែកព័តមាននេះ