រាជធានីភ្នំពេញ ៖ នៅទីស្នាក់ការសាខា អង្គការសេអ៊ីសេអឹម ដែលមានទីតាំងស្ថិតនៅភូមិក្តីកណ្តាល ឃុំសារិកាកែវ ស្រុកល្វាឯម កាលពីថ្ងៃទី១៤ ធ្នូ មានរៀបចំពិធីចែកអំណោយដល់ប្រជាពលរដ្ឋដែលរងគ្រោះដោយទឹកជំនន់ចំនួន១៥០គ្រួសារ ក្រោមអធិបតីភាពលោកឆាន់ វឌ្ឍនៈ អនុរដ្ឋលេខាធិការក្រសួងសេដ្ឋកិច្ច និងលោក ផៃ ប៊ុនឈឿន អភិបាលរងខេត្ត
កណ្តាល។ ប្រជាពលរដ្ឋដែលទទួលអំណោយទាំងនោះក្នុងមួយគ្រួសារ ទទួលបានអង្ករ១០គីឡូក្រាមមីមួយកេស ត្រីខមួយយួរ ថវិកា១ម៉ឺនរៀល និងអាវយឺតម្នាក់មួយ។
មានមតិសំណេះសំណាលនៅក្នុងឱកាសនោះ លោកផៃ ប៊ុនឈឿន បានថ្លែងអំណរគុណដល់អង្គការសេអ៊ីសេអឹម ដែលបានផ្តល់អំណោយដល់ប្រជាពលរដ្ឋរងគ្រោះដោយទឹកជំនន់ខណៈពេលប្រជាពលរដ្ឋដែលកំពុងតែខ្វះខាត់។
លោកឆាន់ វឌ្ឍនៈ បានថ្លែងថា ឆ្នាំ២០១១ នេះ ព្រះរាជាណាចក្រកម្ពុជា ទទួលរងនូវទឹកជំនន់ទន្លេមេគង្គ មានសភាពធ្ងន់ធ្ងរជាងបណ្តាឆ្នាំមុនៗ មានចំនួន១៧រាជធានី-ខេត្តបានជន់លិចដោយទឹកជំនន់ បណ្តាលឱ្យខូចខាត និងកើតមានគ្រោះមហន្តរាយជាច្រើនប៉ះពាល់ទៅលើហេដ្ឋារចនាសម្ព័ន្ធដូចជាសាលារៀន មន្ទីរពេទ្យ ផ្លូវថ្នល់ ស្ពាន ទំនប់ប្រឡាយជាដើម ជាពិសេសប៉ះពាល់ដល់ផ្ទះសម្បែង ជីវភាពរស់នៅប្រជាពលរដ្ឋ និងមានប្រជាពលរដ្ឋមួយចំនួនបានស្លាប់ដោយសារគ្រោះទឹកជំនន់ ក្នុងនោះភាគច្រើនជាកុមារផងដែរ ។
ទឹកជំនន់ឆ្នាំនេះមិនមែនជាបញ្ហាចម្លែកទេ សម្រាប់ប្រទេសកម្ពុជា បើយើងសង្កេតមើលប្រទេសជិតខាង ក៏ត្រូវទទួលរងគ្រោះដោយទឹកជំនន់ធ្ងន់ធ្ងរជាងយើងទៅទៀត ដូចជានៅប្រទេសថៃ ទឹកជំនន់បានជន់លិចប្រមាណ២ភាគ៣នៃផ្ទៃប្រទេសទាំងមូល សូម្បីតែរាជធានីបាងកក ក៏ត្រូវទឹកជន់លិចជាច្រើនខែ ធ្វើឱ្យប៉ះពាល់ដល់សេដ្ឋកិច្ចប្រទេសជាតិយ៉ាងធ្ងន់
ធ្ងរ ។ ជាមួយគ្នានេះដែរ នៅអាមេរិក ប្រទេសអូស្ត្រាលី មានកើតគ្រោះមហន្តរាយភ្លើងឆេះព្រៃ ហើយថ្មីៗនេះនៅសហគមន៍អឺរ៉ុប មានកើតគ្រោះរាំងស្ងួតដែលមិនធ្លាប់មាន។ មូលហេតុទាំងនេះបង្កឡើងដោយប្រទេសឧស្សាហកម្មធំៗ ដែលបានកំពុងនិងបញ្ចេញឧស្ម័នផ្ទះកញ្ចក់ពីរោងចក្រធំៗនៅក្នុងស្រទាប់បរិយាកាស ប៉ះពាល់ដល់ស្រទាប់ផែនដីពីមួយថ្ងៃទៅមួយថ្ងៃ ។ ម្យ៉ាងទៀតបណ្តាប្រទេសកំពុងអភិវឌ្ឍន៍ បានកាប់បំផ្លាញព្រៃឈើយកដីសង់លំនៅឋាន និងធ្វើកសិកម្ម បញ្ហាទាំងអស់នេះជាហេតុនាំឱ្យកំដៅផែនដីនៅលើពិភពលោកកាន់តែកើនឡើងជាបន្តបន្ទាប់ និងកើតមានគ្រោះមហន្តរាយប្លែកៗ មិនអាចដឹងមុន ។
យើងដឹងហើយថា ការប្រែប្រួលអាកាសធាតុនេះបង្កឡើងដោយសារមនុស្ស ដូច្នេះយើងទាំងអស់គ្នាត្រូវតែនាំគ្នាជួយគ្រប់គ្រង និងទប់ស្កាត់អំពីបញ្ហាបំរែបំរួលអាកាសធាតុនេះ។
នៅពេលប្រជាពលរដ្ឋក្នុងស្រុកល្វាឯម ទទួលរងគ្រោះដោយទឹកជំនន់ យើងសង្កេតឃើញថា មានតែថ្នាក់ដឹកនាំគណបក្សប្រជាជនកម្ពុជាគ្រប់ជាន់ថ្នាក់ប៉ុណ្ណោះ ដែលចុះមកសួរសុខទុក្ខ និងនាំយកអំណោយសង្គ្រោះបន្ទាន់របស់រាជរដ្ឋាភិបាល អំណោយគណបក្សប្រជាជនកម្ពុជា កាកបាទក្រហមកម្ពុជា អង្គការក្រៅរដ្ឋាភិបាល និងសប្បុរសជន មកឧបត្ថម្ភដល់ប្រជាពលរដ្ឋស្រុកល្វាឯម ជាបន្តបន្ទាប់ដូចនៅថ្ងៃនេះមានអង្គការសេអុីសេអឹម បាននាំយកអំណោយមកចែកជូនប្រជាពលរដ្ឋក្រីក្ររងគ្រោះដោយទឹកជំនន់ចំនួន១៥០គ្រួសារ នៅឃុំសារិកាកែវ នាពេលនេះ ៕
ចែករំលែកព័តមាននេះ