មានភាពច្របូកច្របល់មួយនៅប៉ាគីស្ថានខណៈដែលមនុស្សយ៉ាងតិច៤១នាក់ត្រូវស្លាប់កាលពីថ្ងៃទី៥ មេសា ដោយគ្រាប់បែករបស់ជនអត្ដឃាតក្នុងអង្គមីទ្ទីងនយោបាយមួយ និងការវាយប្រហារមួយប្រឆាំងស្ថានកុង ស៊ុលអាមេរិកនៅទីក្រុងប៉េសាវ៉ារ បណ្ដាលឱ្យមនុស្សស្លាប់១១នាក់ ក្នុងនោះមានអ្នកវាយប្រហារ៦នាក់ ។ ការវាយប្រហារប្រឆាំងស្ថានកុងស៊ុលអាមេរិកត្រូវបានអះអាងតាមទូរស័ព្ទដោយអ្នកនាំពាក្យម្នាក់របស់ពួកតាលីបង់ប៉ាគីស្ថាន ។
នៅទីក្រុងទីម៉ាហ្គោរ៉ាហ៍ ស្រុកឡូវ័រឌៀរ នៃតំបន់ជ្រលងភ្នំស្វាត ជនអត្ដឃាតម្នាក់ធ្វើឱ្យផ្ទុះគ្រាប់បែករបស់គេនៅមុខវេទិកានៃអង្គមិទ្ទីងកណ្ដាលវាលមួយរបស់គណបក្សជាតិអាវ៉ាមី ដែលដឹកនាំផ្នែកប្រតិបត្ដិនៅក្រុងប៉េសាវ៉ារ ។ យោងតាមប៉ូលិសថា មនុស្សយ៉ាងតិច៤១នាក់ត្រូវស្លាប់ ហើយជាង៨០នាក់ត្រូវរបួស ។ បន្ដិចក្រោយពីនោះ ពួកជនប្រដាប់អាវុធបានប៉ុនប៉ងវាយលុកលើស្ថានកុងស៊ុលអាមេរិក ស្ថិតក្នុងសង្កាត់យោធាមួយនៃក្រុងប៉េសាវ៉ារ ។ ភ្នាក់ងារសន្ដិសុខប៉ាគីស្ថានយ៉ាងតិច២នាក់បានត្រូវស្លាប់ ហើយជាច្រើននាក់ទៀតត្រូវរបួស ។ មេប៉ូលិសក្រុងប៉េសាវ៉ារម្នាក់និយាយថា ការវាយលុកនេះធ្វើឡើងដោយពួកបះបោរអ៊ិស្លាមពី១០ទៅ១៥នាក់ ជិះរថយន្ដ 4X4 ចំនួន២គ្រឿង ។ ជនវាយប្រហារម្នាក់បានធ្វើឱ្យផ្ទុះគ្រាប់បែករបស់គេនៅត្រង់បារ៉ាស់ចូលស្ថានកុងស៊ុល ហើយប៉ូលិសបាញ់ប្រហារលើពួកបះបោរ ។ ពួកគេសាកល្បងលុកចូលស្ថានកុងស៊ុល ហើយសភាពការណ៍ពេលនេះស្ថិតក្រោមការត្រួតពិនិត្យ រួចកងកំលាំងសន្ដិសុខបាន សំលាប់ពួកនេះ៤នាក់៕
ចែករំលែកព័តមាននេះ