រាជធានីភ្នំពេញ ៖ អាជ្ញាធរខណ្ឌសែនសុខ ដឹកនាំដោយលោកចេង មុន្នីរ៉ា អភិបាលរង មន្ត្រីជំនាញសាលាខណ្ឌ មន្ត្រីសាលាសង្កាត់ ប៉ូលិស-ប៉េអឹមមន្ត្រីនៃមន្ទីរសុខាភិបាល មន្ត្រីនៃមន្ទីរបរិស្ថាន បានចុះត្រួតពិនិត្យក្រុមហ៊ុននាំពលករទៅធ្វើការនៅក្រៅប្រទេសឈ្មោះស៊ីអ៊ីស៊ីអ៊ិច ខេមបូឌា ខូអិលធីឌី ហៅមជ្ឈមណ្ឌលខេអេច ដែលមានទីតាំងលេខ៣២៧ ផ្លូវរទេះភ្លើង ក្រុមទី៥ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ កាលពីវេលាម៉ោង៩និង៣០នាទីព្រឹកថ្ងៃទី១៧ មីនា ២០០១ ដើម្បីចង់ដឹងថា តើក្រុមហ៊ុននោះរៀបចំសណ្តាប់ធ្នាប់ត្រឹមត្រូវ និងមានបរិស្ថានល្អដែរឬក៏អត់។
តាមសម្តីរបស់លោកអភិបាលរងចេង មុន្នីរ៉ា បានប្រាប់កោះសន្តិភាពថា ការចុះមកមើលក្រុមហ៊ុនខេអេចនេះ គឺដើម្បីត្រួតពិនិត្យមើលក្រុមហ៊ុននេះមានប្រព្រឹត្តខុសច្បាប់ដូចក្រុមហ៊ុន ភី & ធី ដែលនាំពលករចេញទៅក្រៅប្រទេសដូចគ្នានេះដែរ ឬក៏អត់…ព្រោះក្រុមហ៊ុនធី & ភី នោះ តែងតែបង្កឱ្យអាជ្ញាធរឈឺក្បាល ខ្លាំងណស់…ម្តងមានមនុស្សខ្យល់គរដួល ម្តងមានមនុស្សស្លាប់…ម្តងមានមនុស្សលោតពីលើអគារ បន្ទប់តូចចង្អៀត បរិស្ថានកខ្វក់ ។ ការចុះត្រួតពិនិត្យមើលក្រុមហ៊ុនខេអេចនេះ លោកចេង មុន្នីរ៉ា និងអ្នកចូលរួមទាំងអស់មិនទាន់រកឃើញថា ក្រុមហ៊ុននេះមានប្រព្រឹត្តខុសលើផ្នែកអ្វីទេ ប៉ុន្តែមន្ត្រីអាជ្ញាធរនឹងតាមដានសកម្មភាពក្រុមហ៊ុននេះ មិនឱ្យធ្វើបាបពលករ-ពលការិនីឡើយ៕
ចែករំលែកព័តមាននេះ