ខេត្តសៀមរាប ៖ មន្ដ្រីជាន់ខ្ពស់រាជរដ្ឋាភិបាលបានលើកឡើងថា ចំនួនភ្ញៀវទេសចរអន្ដរជាតិចូលទស្សនានៅរមណីយដ្ឋានធម្មជាតិ និងប្រវត្ដិសាស្ដ្រអង្គរ បេតិកភណ្ឌពិភពលោកនារយៈពេលចុងក្រោយនៃឆ្នាំ២០១១នេះ បានហក់ឡើងរហូតដល់២៧ភាគរយ ដែលតួលេខនេះជាមោទនភាពបំផុតមួយសម្រាប់កម្ពុជា ប៉ុន្ដែក៏មានឥទ្ធិពលអាក្រក់ខ្លះៗដែរ មកលើប្រាង្គប្រាសាទបុរាណមួយចំនួន ដែលទាមទារឱ្យមានការគិតគូរទៅដល់វង់ទស្សនាចរណ៍របស់ភ្ញៀវនៅក្នុងតំបន់ឧទ្យានដ៏ប្រសិទ្ធិ៍នោះឱ្យបានប្រាកដប្រជាទុកជាមុន ។
ថ្លែងទៅកាន់អ្នកជំនាញបច្ចេកទេសផ្នែកវប្បធម៌ជាតិ-អន្ដរជាតិប្រមាណ៣០០នាក់ ដែលបានចូលរួមក្នុងកិច្ចប្រជុំពេញអង្គលើកទី១៨ នៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្ត្រអង្គរ “ICC” កាលពីថ្ងៃទី១៣ ធ្នូ នៅ ក្រុងសៀមរាប លោកឧបនាយករដ្ឋមន្ដ្រីសុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីមានប្រសាសន៍ថា ចំនួនភ្ញៀវទេសចរចូលមកទស្សនារមណីយដ្ឋានអង្គរក្នុងឆ្នាំ២០១១នេះ បានកើនឡើងរហូតដល់២៧ភាគរយ គឺជាការស្ទុះងើបឡើងដ៏ប្រសើរបំផុតមួយសម្រាប់វិស័យទេសចរណ៍ ដែលនាំមកទាំងភាពវិជ្ជមាន ទាំងភាពអវិជ្ជមាន សម្រាប់រមណីយដ្ឋានប្រវត្ដិសាស្ដ្រអង្គរ បើយើងមិនបានចាត់វិធានការសមរម្យជាមុន ។
លោកឧបនាយករដ្ឋមន្ដ្រីបានមានប្រសាសន៍បន្ដថា ក្នុងយុទ្ធសាស្ដ្រប្រយុទ្ធប្រឆាំងទៅនឹងហានិភ័យផ្សេងៗ ដែលអាចកើតឡើងមកលើតំបន់រមណីយដ្ឋានអង្គរ យើងកំពុងតែយកចិត្ដទុកដាក់យ៉ាងខ្លាំងទៅលើបញ្ហាលំហូរទេសចរដែលមានកំណើនយ៉ាងឆាប់រហ័សពីមួយឆ្នាំទៅមួយឆ្នាំ ដោយទាមទារឱ្យមានការរៀបចំប្លង់វង់ទស្សនាគ្រប់គ្រងច្បាស់លាស់ជាងមុន សម្រាប់ពង្រាយចំនួនភ្ញៀវទេសចរឱ្យទៅ កាន់ប្រាសាទបុរាណផ្សេងៗទៀត ឬទៅកាន់រមណីយដ្ឋានធម្មជាតិមួយចំនួនទៀត ក្នុងពេលដំណាលគ្នា ដែលគម្រោងការនេះត្រូវសហប្រតិបត្ដិការជាលក្ខណៈអន្ដរជាតិយ៉ាងស្អិតរមួតរវាងប្រទេសអូស្ដ្រលី ជាមួយអាជ្ញាធរអប្សរា ព្រមទាំងក្រសួងទេសចរណ៍ក៏ដូចអាជ្ញាធរខេត្ដសៀមរាប ។
ថ្វីបើយ៉ាងនេះក្ដី ពុំមានរបាយការណ៍ជាក់លាក់ណាមួយបង្ហាញពីចំនួនភ្ញៀវទេសចរចូលទស្សនារមណីយដ្ឋានអង្គរនៅឡើយទេ តែគេជឿជាក់ថា ទន្ទឹមនឹងការកើនឡើងនៃចំនួនភ្ញៀវទេសចរនៅក្នុងតំបន់អង្គរនេះ ចំណូលប្រចាំឆ្នាំ ដែលបានមកពីការលក់សំបុត្រចូលទស្សនាប្រាសាទក៏មានការកើនឡើងដូចគ្នា ។
ខេត្ដសៀមរាប ត្រូវបានចាត់ទុកជាតំបន់ប៉ូលនៃទេសចរណ៍ជាតិរបស់ប្រទេសកម្ពុជា ដោយសារតែខេត្ដនេះសម្បូរទៅដោយប្រាង្គប្រាសាទបុរាណ និងសម្បូរទៅដោយរមណីយដ្ឋានវប្បធម៌- ធម្មជាតិយ៉ាងសន្ធឹកសន្ធាប់ដូចជា បឹងទន្លេសាបជាបឹងទឹកសាបដ៏ធំជាងគេនៅអាស៊ីអាគ្នេយ៍ ដែលពោរពេញទៅដោយជីវៈចម្រុះ គ្រប់ប្រភេទ ជាពិសេសរមណីយដ្ឋាន ធម្មជាតិវប្បធម៌ប្រវត្ដិសាស្ដ្រអង្គរបេតិកភណ្ឌពិភពលោកបូករួមទាំងសន្ដិភាព ស្ថិរភាពនៅក្នុងតំបន់ ធ្វើឱ្យកំណើនភ្ញៀវទេសចរជាតិ-អន្ដរជាតិ មានការកើនឡើងពីមួយឆ្នាំទៅមួយឆ្នាំ ។
ចំណែកលោកថោង ខុន រដ្ឋមន្ដ្រីក្រសួងទេសចរណ៍ បានមានប្រសាសន៍ ទាក់ទិនទៅនឹងចំនួនភ្ញៀវទេសចរយ៉ាងដូច្នេះថា នៅដំណាច់ឆ្នាំ២០១១ ខាងមុខនេះ កម្ពុជារំពឹងទុកថា និងទទួលបានចំនួនភ្ញៀវទេសចរអន្ដរជាតិរហូតដល់ទៅ២,៨លាននាក់ គឺកើនឡើង២៧ភាគរយ ខណៈមានការអះអាងថា រយៈពេល១០ខែចុងឆ្នាំនេះកម្ពុជាទទួលបានភ្ញៀវទេសចរអន្ដរជាតិចំនួនជាង២លាននាក់ រួចជាស្រេច ។ ក្នុងចំនួននោះ ភ្ញៀវទេសចរអន្ដរជាតិប្រមាណ៥៣ភាគរយ បានធ្វើដំណើរមកទស្សនាតំបន់សៀមរាប ហើយនៅឆ្នាំ២០២០ ខាងមុខ សៀមរាបអាចនឹងទទួលបានភ្ញៀវទេសចរអន្ដរជាតិ ៤លាននាក់ បូករួមទាំងភ្ញៀវទេសចរក្នុងស្រុកជាង១លាននាក់ បន្ថែមទៀត ដូច្នេះយើងត្រូវតែគិតពីផែនការរៀបចំវង់ទស្សនកិច្ចដ៏មានសារសំខាន់នេះជាមុន ដើម្បីបញ្ចៀសបាននូវការប៉ះពាល់បង្កឡើងដោយចំនួនមនុស្សដ៏ច្រើនក្នុងមួយថ្ងៃៗ ។
វិស័យទេសចរណ៍ត្រូវបានចាត់ទុកថា ជាឧស្សាហកម្មគ្មានផ្សែង ប៉ុន្ដែអាចទាញយកចំណូលយ៉ាងច្រើនសំបើមសម្រាប់បង្កើនកំណើនសេដ្ឌកិច្ចជាតិបានយ៉ាងល្អនិងមានការបំពុលបរិស្ថានតិចតួចបំផុត តាមរយៈការផ្ដល់ឱកាសទីផ្សារការងារជូនប្រជាពលរដ្ឋប្រមាណជាង២ ម៉ឺននាក់ឯណោះ ។
លោករដ្ឋមន្ដ្រីបានបន្ថែមទៀតថា បើតាមការប៉ាន់ប្រមាណឃើញថា ភ្ញៀវទេសចរបរទេស ដែលមកទស្សនាប្រទេសកម្ពុជាបានចំណាយជាមធ្យម ៧០០ដុល្លារ ក្នុងម្នាក់ ដោយមិនគិតពីសំបុត្រយន្ដហោះ និងថ្លៃទិដ្ឋាការ ដូច្នេះបើប្រទេសកម្ពុជា ទទួលបានភ្ញៀវទេសចរបរទេសជាង២លាន៨សែននាក់ ដូចការរំពឹងទុករបស់យើងនោះ គឺប្រទេសកម្ពុជាអាចទទួលបានចំណូលដុលពីភ្ញៀវទេសចរទាំងនោះរហូតដល់ជិត២ពាន់លានដុល្លារក្នុងមួយឆ្នាំ ។
រីឯលោកស្រី Anne Lemais-tre តំណាងអង្គការយូណេស្កូប្រចាំកម្ពុជា បានលើកឡើងនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំពេញអង្គ ICC លើកទី១៨ ថា «ខ្ញុំសូមសម្តែងនូវការស្វាគមន៍ និងពេញចិត្ដពេញថ្លើមយ៉ាងខ្លាំងជាមួយកម្ពុជា ចំពោះកំណើនភ្ញៀវចូលមកទស្សនាតំបន់រមណីយដ្ឋានអង្គរ រហូតដល់២៧ ភាគរយនោះ ប៉ុន្ដែក្នុងនាមជាអង្គការយូណេស្កូ ខ្ញុំសូមស្នើយ៉ាងទទូចដល់អាជា្ញធរអប្សរា អាជ្ញាធរខេត្ដសៀមរាប ក៏ដូចជាក្រសួងទេសចរណ៍ គិតគូរពីការបែងចែកចំនួនភ្ញៀវទេសចរចូល ទស្សនាប្រាសាទបុរាណនេះ ដោយរកតំបន់ថ្មីៗដែលអាចប្តូរវេនគ្នាចូលទស្សនា កុំឱ្យភ្ញៀវដើរជាន់ប្រាសាទបុរាណច្រើនលើសកំណត់នៅក្នុងគ្រាតែមួយ ហើយយន្ដការនេះនៅលើពិភពលោកគេអនុវត្ដបានជោគជ័យរួចហើយដែរ ដូចជានៅប្រាសាទមួយរបស់ប្រទេសបារាំង ។
ព្រះរាជាណាចក្រកម្ពុជា ពិតជាប្រទេសអច្ឆរិយៈ នេះជាប្រសាសន៍ លើកឡើងរបស់លោក Herbef Hancock ជាមហាសេដ្ឋីផ្នែកតូរ្យតន្ដ្រីរបស់សហរដ្ឋអាមេរិក និងជាឯកអគ្គរដ្ឋទូតស្ម័គ្រចិត្ដប្រចាំអង្គការយូណេស្កូពិភពលោកដែលបានលើកឡើង កាលពីល្ងាចថ្ងៃទី ១៣ ធ្នូ នៅក្នុងសន្និសីទសារព័ត៌មានបញ្ចប់កិច្ចប្រជុំពេញអង្គលើកទី១៨ ដោយលោក
បញ្ជាក់ថា «មុនពេលខ្ញុំ និងគ្រួសារខ្ញុំ សម្រេចធ្វើដំណើរមកកម្ពុជា ខ្ញុំបានឮការឃោសនាតែប្រាសាទអង្គរមួយប៉ុណ្ណោះដែលអស្ចារ្យ តែពេលមកដល់ទើបដឹងថាពិតជាប្រទេសមួយដ៏អច្ឆរិយៈផ្នែកវប្បធម៌គឺមានប្រាសាទបុរាណរាប់រយទៀត ។
មហាសេដ្ឋីតូរ្យតន្ដ្រីរូបនោះបានបន្ដទៀតថា «អ្វីដែលធ្វើឱ្យខ្ញុំក៏ដូចភ្ញៀវទេសចរឯទៀត ចាំមិនភ្លេចក្រៅពីប្រាសាទ គឺស្នាមញញឹមប្រកបដោយភាពរាក់ទាក់របស់ពលរដ្ឋខ្មែរផងដែរ។ ដូច្នេះខ្ញុំសូមសន្យាថា ក្រោយពីខ្ញុំត្រឡប់ទៅវិញ ខ្ញុំនឹងជួយឃោសនាអំពីប្រទេសកម្ពុជាឱ្យគេស្គាល់ និងមកលេងឱ្យបានច្រើនបន្ថែមទៀតតាមរយៈការប្រគំតន្ដ្រីយ៉ាតរបស់ខ្ញុំ» ៕
ចែករំលែកព័តមាននេះ