មន្ត្រីម្នាក់រាយការណ៍កាលពីថ្ងៃទី១៣ ធ្នូ ថា គយម៉ាឡេស៊ីបានរកឃើញការប៉ុនប៉ងរត់ពន្ធភ្លុកដំរី និងរបស់របរសិប្បកម្មធ្វើពីភ្លុក ដែលមានតម្លៃសរុបប្រមាណជា១,៣លានដុល្លារ។ លោកអាហ្ស៊ីស យ៉ាគុប នាយកគយនៃរដ្ឋសឺឡានហ្គ័ររបស់ម៉ាឡេស៊ីថ្លែងក្នុងឱកាសនៃសន្និសីទសារព័ត៌មានមួយថាកុងតឺន័រមួយត្រូវបានចាប់កាលពីថ្ងៃទី៨ ធ្នូ កន្លងមកនេះ នៅឯកំពង់ផែក្លាង ជាកំពង់ផែធំបំផុតរបស់ម៉ាឡេស៊ីក្រោយទទួលបានព័ត៌មានស៊ើបការណ៍មួយមក។ កុងតឺន័រនោះត្រូវរើឆែកឆេរកាលពីថ្ងៃទី១២ ធ្នូ ។
ម្ចាស់នាវាកាហ្គោគូសបញ្ជាក់ថា កុងតឺន័រនេះផ្ទុករបស់របរធ្វើពីថ្មភក់ ក៏ប៉ុន្តែបណ្តាមន្ត្រីគយបានរកឃើញភ្លុកដំរី និងវត្ថុផ្សេងៗពីភ្លុកទម្ងន់ដល់ទៅ១៥តោន មានតម្លៃសរុបប្រមាណជា៤លានរីងហ្គីត (១,៣លានដុល្លារ)។ លោកអាហ្ស៊ីស ថ្លែងទៀតថា ការស៊ើបអង្កេតដំបូងនានាបង្ហាញថា ភ្លុកដំរីទាំងនេះនាំមកពីកំពង់ផែកេនយ៉ា នៅក្រុងមុមបាសា ហើយនឹងត្រូវដឹកមកកាន់កំពង់ផែក្រុងព្រះសីហនុរបស់កម្ពុជា។ សម្រាប់ពេលនេះប៉ូលិសនៅពុំទាន់ចាប់ខ្លួនមនុស្សណាម្នាក់នៅឡើយ។
នេះជាការប៉ុនប៉ងរត់ពន្ធភ្លុកដំរីលើកទី៤ ហើយកាត់តាមប្រទេសម៉ាឡេស៊ីនាឆ្នាំនេះ។ កាលពីខែកញ្ញាកន្លងមក គយបានចាប់រឹបអូសភ្លុកដំរីចំនួន២តោន នៅកំពង់ផែក្លាង៕
ចែករំលែកព័តមាននេះ