ខេត្តកំពង់ស្ពឺ ៖ គ្រោះថ្នាក់ចរាចរណ៍ដ៏មហន្តរាយធំមួយបានកើតឡើងកាលពីវេលាម៉ោង ៣និង១០នាទីទៀបភ្លឺថ្ងៃទី១៣ ធ្នូ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រលេខ៦០ និងលេខ៦១ ចំណុចមុខខ្លោងទ្វារចូលអតីតបន្ទាយ ACO ដែលបច្ចុប្បន្នជាសាលាហ្វឹកហ្វឺនកងកម្លាំងរក្សាសន្តិភាពពហុ សាសន៍ ស្ថិតក្នុងភូមិក្រាំងខ្នុរ ឃុំមហាសាំង ស្រុកភ្នំស្រួច។ គ្រោះថ្នាក់នេះកើត
ខេត្តកំពង់ស្ពឺ ៖ គ្រោះថ្នាក់ចរាចរណ៍ដ៏មហន្តរាយធំមួយបានកើតឡើងកាលពីវេលាម៉ោង៣និង១០នាទីទៀបភ្លឺថ្ងៃទី១៣ ធ្នូ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រលេខ៦០ និងលេខ៦១ ចំណុចមុខខ្លោងទ្វារចូលអតីតបន្ទាយ ACO ដែលបច្ចុប្បន្នជាសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ ស្ថិតក្នុងភូមិក្រាំងខ្នុរ ឃុំមហាសាំង ស្រុកភ្នំស្រួច។ គ្រោះថ្នាក់នេះកើតឡើងដោយសាររថយន្តមា៉កហីុណូដឹកឥដ្ឋបុកជាមួយរថយន្តម៉ាកហ៊ីណូផ្ទុកទំនិញគ្រឿងទេស បណ្តាលឱ្យស្លាប់មនុស្សចំនួន៤នាក់ នៅជាប់ក្នុងកាប៊ីនរថយន្ត និងម្នាក់ទៀតរងរបួសធ្ងន់ធ្ងរត្រូវបានបញ្ជូនទៅសង្គ្រោះបន្ទាន់នៅរាជធានីភ្នំពេញ ។
ទាក់ទិននឹងករណីគ្រោះថ្នាក់ចរាចរណ៍នេះត្រូវបានមន្ត្រីប៉ូលិសចរាចរស្រុក ក៏ដូចជាកងរាជអាវុធហត្ថស្រុកភ្នំស្រួច ឱ្យដឹងថា នៅវេលាទៀបភ្លឺនោះមានរថយន្តហីុណូមួយគ្រឿងពណ៌ទឹកប៊ិច ដឹកឥដ្ឋមកពីភ្នំពេញ ឆ្ពោះទៅខេត្តព្រះសីហនុ បើកបរដោយឈ្មោះឈុំ ដានី ភេទប្រុស អាយុ២០ឆ្នាំ និងព្រូម្នាក់ឈ្មោះឡុង ប៊ន ភេទប្រុស អាយុ២៣ឆ្នាំ ។ អ្នកទាំងពីរមានទីលំនៅក្នុងភូមិសំបួរ ឃុំតាំងស្យា ស្រុកភ្នំស្រួច បានស្លាប់ ដោយកៀបជាប់ក្នុងកាប៊ីន។ រថយន្តមួយគ្រឿងនេះពេលមកដល់ចំណុចខាងលើក៏រេចង្កូតមកខាងឆ្វេងដៃបុកជាមួយរថយន្តហីុណូមួយគ្រឿងទៀត ពណ៌ប្រផេះ ផ្ទុកទំនិញគ្រឿងទេស ដែលធ្វើដំណើរបញ្ច្រាសទិសគ្នា។ រថយន្តទាំង២គ្រឿងបានបុកគ្នាពេញទំហឹងចំពីមុខ បណ្តាលឱ្យក្បាលរថយន្តទាំងពីរខាំជាប់គ្នាកាច់ក្បាលចុះក្រោមដូចគេផ្សារ ធ្វើឱ្យអ្នកបើកបរ និងព្រូរថយន្តទាំងពីរគ្រឿងស្លាប់សរុបចំនួន៤នាក់ ដោយកៀបក្នុងកាប៊ីន និងព្រូរថយន្តហីុណូពណ៌ប្រផេះ រងរបួសធ្ងន់ត្រូវបានសមត្ថកិច្ចបញ្ជូនទៅសង្គ្រោះបន្ទាន់នៅមន្ទីរពេទ្យឯភ្នំពេញ ។
សមត្ថកិច្ចនៅកន្លែងកើតហេតុនិយាយថា អ្នកស្លាប់ទាំងបួននាក់មាន ១-ឈ្មោះឈុំ ដានី ភេទប្រុស អាយុ២០ឆ្នាំ ២-ឈ្មោះឡុង ប៊ន ភេទប្រុស អាយុ២៣ឆ្នាំ មានទីលំនៅភូមិសំបូរ ឃុំតាំងស្យា ស្រុកភ្នំស្រួច ៣-ឈ្មោះសឿន អ្នកបើកបររថយន្តហ៊ីណូ ពណ៌ប្រផេះ ស្លាប់ក្នុងកាប៊ីន និង៤-ឈ្មោះអុល ភេទប្រុស ស្លាប់ក្នុងកាប៊ីនដែរ ។ អ្នកទាំងពីរនាក់មានទីលំនៅក្នុងខេត្តកំពត ។
ចំណែកម្នាក់ទៀតឈ្មោះអេង សុខម៉ាច ជាព្រូរថយន្តរងរបួសធ្ងន់ មានទីលំនៅភូមិដំណាក់ស្វាយ ឃុំពាមជីកង ស្រុកកងមាស ខេត្តកំពង់ចាម ។ ពេលបុកគ្នានៅវេលាទៀបភ្លឺនោះសមត្ថកិច្ចពុំអាចជួយអ្នករងគ្រោះបានទេ រហូតដល់ព្រឹកឡើងទើបក្រុមសមត្ថកិច្ចទៅជួយគាស់ កាត់ដែកទាញយកមនុស្សចេញពីក្នុងកាប៊ីនរថយន្តដែលគេដឹងថា សុទ្ធតែស្លាប់ទៅហើយ ដោយគាស់ទាញយកចេញម្តងមួយៗមើលទៅគួរឱ្យសង្វេគពន់ពេកណាស់ ។ នេះគឺជាសោកនាដកម្មគួរឱ្យតក់ស្លុតបំផុត ហើយក្បាលរថយន្តទាំង២គ្រឿងខ្ទេចទាំងស្រុង ។
តាមការសន្និដ្ឋានជំហានដំបូងក្នុងឧប្បត្តិហេតុរថយន្តបុកគ្នានេះ ត្រូវបានសមត្ថកិច្ចសង្ស័យថា អាចអ្នកបើកបរដឹកឥដ្ឋងោកងុយមួយភាំង ទើបរេចង្កូតឆ្លងគំនូសលឿងកណ្តាលផ្លូវមកបុករថយន្តហ៊ីណូដឹកទំនិញគ្រឿងទេស ។ រថយន្តទាំងពីរគ្រឿងនេះជារថយន្តឯកជនពុំមែនជារថយន្តរបស់ក្រុមហ៊ុនណាមួយនោះទេ ។
លោកវរសេនីយ៍ឯក ម៉ន មុត ស្នងការរងនគរបាលខេត្តទទួលបន្ទុកការងារសណ្តាប់ធ្នាប់មានប្រសាសន៍ថា គ្រោះថ្នាក់ដ៏ធ្ងន់ធ្ងរនេះបណ្តាលមកពីការបើកបរធ្វេសប្រហែស និងមានល្បឿនលឿន ព្រមទាំងងោកងុយទៀត ៕
ចែករំលែកព័តមាននេះ