ខេត្តព្រះវិហារ ៖ វេលាម៉ោង៨ព្រឹកថ្ងៃទី១៣ ធ្នូ ២០១១ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធបើកឱ្យប្រើ ប្រាស់ជាផ្លូវការកំណាត់ផ្លូវជាតិលេខ៦២ ប្រវែង១១០គីឡូម៉ែត្រ ពីត្បែងមានជ័យ ទៅជើងភ្នំប្រាសាទព្រះវិហារ និងផ្លូវលេខ២១០ ពីភូមិផ្លូវបំបែក នៃផ្លូវជាតិលេខ៦២ ទៅស្រយង់កោះកេរ ក្រោមកម្ចីឥណទានពីសាធារណរដ្ឋប្រជាមានិតចិន ។
ពិធីបើកសម្ពោធឱ្យប្រើប្រាស់កំណាត់ផ្លូវខាងលើនេះប្រព្រឹត្តធ្វើឡើងនៅចំណុចតាកឹង ក្នុងមជ្ឈមណ្ឌលជនភៀសសឹក ស្ថិតក្នុងភូមិផ្លូវបំបែក ឃុំថ្មី ស្រុកគូលែន ស្ថិតនៅចម្តាយប្រមាណ២៣គីឡូម៉ែត្រ ពីក្រុងព្រះវិហារ ដោយមានក្រុមមន្ត្រីរដ្ឋាភិបាល មន្ត្រីស្ថានទូតនានា ដៃគូអភិវឌ្ឍន៍ អង្គការជាតិ-អន្តរជាតិ មន្ត្រីអាជ្ញាធរខេត្ត អ្នកគ្រូ លោកគ្រូ និងប្រជាបលរដ្ឋ សិស្សានុសិស្សយា៉ងច្រើនកុះករអញ្ជើញចូលរួមយ៉ាងរីករាយ ។ នេះជាប្រវត្តិសាស្ត្រហើយដែលនៅតំបន់ដាច់ស្រយាលមានផ្លូវក្រាល កៅស៊ូដ៏ប្រណីតសម្រាប់ធ្វើចរាចរណ៍បង្កលក្ខណៈងាយស្រួលដល់ប្រជា ពលរដ្ឋពន្លឿនចរាចរ ពាណិជ្ជកម្ម-សេដ្ឋកិច្ចមូលដ្ឋាន និងសង្គមឱ្យកាន់តែល្អប្រសើរ៕
ចែករំលែកព័តមាននេះ