ខេត្តប៉ៃលិន ៖ បុរសចំណាស់អនាថាម្នាក់ឈ្មោះធុយ ណុល អាយុ៦៥ឆ្នាំ មានជំងឺក្រពះធ្ងន់ធ្ងរកំពុងសម្រាកព្យាបាលនៅមន្ទីរពេទ្យបង្អែកខេត្ត។ បុរសចំណាស់នេះមានស្រុកកំណើតភូមិព្រែកតាមាក់ ឃុំពុកឫស្សីស្រុកខ្សាច់កណ្តាល ខេត្តកណ្តាល។ បច្ចុប្បន្នរស់នៅភូមិអូរប្រឺស សង្កាត់អូរតាវ៉ៅ ក្រុងប៉ៃលិន ជាហោរាទស្សន៍ទាយកើតជំងឺក្រពះចុកចាប់ខ្លាំង ហើយត្រូវបានមេភូមិអូរប្រឺសដឹកទៅព្យាបាលនៅមន្ទីរពេទ្យកាលពីថ្ងៃទី៤ ធ្នូ ២០១១។
បុរសចំណាស់បាននិយាយថា រូបគាត់គ្មានកូនចៅ ឬសាច់ញាតិណាម្នាក់ទេ ពួកគេបានស្លាប់តាំងពីសម័យប៉ុល-ពតអស់ហើយ។ លោកតាវ័យចំណាស់បានបន្តថា រូបគាត់បានចាកចេញពីស្រុកកំណើតរបស់ខ្លួន ដោយធ្វើដំណើរមកខេត្តប៉ៃលិន ដើម្បីស្វែងរកមុខរបរថី្មធ្វើដែរ ប៉ុន្តែដោយមានវ័យកាន់តែចាស់កម្លាំងកាន់តែខ្សោយ មិនអាចរកមុខរបរណាមកជំនួសបាន ទើបបន្តធ្វើអ្នកទស្សន៍ទាយឲ្យគេនៅក្នុងភូមិអូរប្រឺស សង្កាត់ប៉ៃលិន ក្រុងប៉ៃលិន ដើម្បីបានលុយកាក់ខ្លះសម្រាប់យកមកទិញអាហារចិញ្ចឹមជីវិត។ ដោយសារតែគាត់ចេះតែចុកឆ្អល់ណែនក្នុងពោះជារៀងរាល់ ក៏សុំផ្ទះមេភូមិអូរប្រឺស ស្នាក់នៅបណ្តោះអាសន្នសិន ទម្រាំនឹងជាហើយរកលុយកាក់បានគាត់នឹងត្រឡប់ទៅស្រុកកំណើតវិញ។ ដោយកាន់តែឈឺធ្ងន់ឡើងៗ ទើបលោកមេភូមិបានដឹកទៅព្យាបាលនៅមន្ទីរពេទ្យខេត្ត។
រូបគាត់អរគុណដល់មេភូមិអូរប្រឺសខ្លាំងណាស់ដែលគាត់បានយកចិត្តទុកដាក់ផ្តល់កន្លែងស្នាក់នៅនឹងជូនបាយទឹកសម្រាប់ទទួលទានស្ទើរតែជារៀងរាល់ថ្ងៃ។ ពេលរូបគាត់មានជំងឺក្រពះធ្ងន់ធ្ងរលោកមេភូមិក៏បានចំណាយលុយកាក់ជាច្រើនយកមកព្យាបាលដូចសាច់ញាតិរបស់គាត់ដែរ៕
ចែករំលែកព័តមាននេះ