មតិជាតិ-អន្តរជាតិភាគច្រើនមានការខ្មាសអៀនជំនួសគណបក្សនយោបាយប្រឆាំង និងអង្គការមិនមែនរដ្ឋាភិបាលមួយចំនួនតូច ដែលបានដណ្តើមគ្នាចង់ជួបដើម្បីយកចិត្តគាប់គួរដល់អ្នកតំណាងអង្គការបរទេស ជាពិសេសក្នុងខណៈពេលដែលលោកសុរិយា ស៊ូប៊េឌី អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទិ្ធមនុស្ស មកស្នាក់នៅក្នុងប្រទេសកម្ពុជាចំនួនមួយសប្តាហ៍។
ក្រុមគណបក្សប្រឆាំង និងតំណាងអង្គការមិនមែនរដ្ឋាភិបាលទាំងនោះ បាននិងកំពុងតែត្រៀមឯកសារអវិជ្ជមានមួយចំនួនដែលរាជរដ្ឋាភិបាលខ្វះចន្លោះយកមករាយការណ៍ដោយក្រុមគេទាំងនោះបានយល់ថា លោកសុរិយាស៊ូប៊េឌី ជាអ្នកអាចជួយពួកក្រុមទាំងនោះដោយសុច្ឆន្ទៈ ដើម្បីធ្វើរបាយការណ៍ទៅទីក្រុងហ្សឺណែវប្រទេសស្វីសនៅខែកញ្ញា ឆ្នាំ២០១២ ខាងមុខ ប៉ុន្តែពួកក្រុមគណបក្សប្រឆាំង និងតំណាងអង្គការដែលមាននិន្នាការប្រឆាំងរាជរដ្ឋាភិបាលមួយក្រុមនោះ បានភ្លេចខ្លួនថាខ្លួនជាខ្មែរ គឺមានតែខ្មែរទេដែលស្គាល់ចិត្តខ្មែរ មានតែខ្មែរទេដែលចេះជួយខ្មែរ គ្មានបរទេសណាស្រលាញ់ប្រទេសខ្មែរជាងខ្មែរស្រលាញ់ប្រទេសខ្មែរនោះឡើយ។
តាមការពិតលោកសុរិយា ស៊ូប៊េឌី មកទស្សនកិច្ចនៅកម្ពុជាគ្រាន់តែមកស្នាក់នៅសណ្ឋាគារលំដាប់ថ្នាក់ផ្កាយប្រាំ ហើយពិសាអាហារតម្លៃមិនធម្មតាដូចជាថ្លើមក្ងាន ពិសាស្រាតម្លៃមិនធម្មតា ដូចជាស្រាក្រហមប៉េត្រូស មកកម្ពុជាដើម្បីឱ្យបង្គ្រប់កិច្ចតែប៉ុណ្ណោះ ។
កាលពីថ្ងៃទី៦ ធ្នូ ឆ្នាំ២០១១ តាមរយៈវិទ្យុបរទេសនិយាយខេមរភាសា លោកកឹម សុខា បាននិយាយថា «លោកសុរិយា ស៊ូប៊េឌី ក៏បានសន្យានឹងជម្រាបទៅមន្ត្រីរដ្ឋាភិបាលអំពីការ
រំលោភសិទ្ធិនយោបាយរបស់សកម្មជនសិទ្ធិមនុស្ស និងលោក កឹម សុខា បានត្អូញត្អែរអំពីសុវត្ថិភាពផ្ទាល់ខ្លួនគាត់តែប៉ុណ្ណោះ» ហើយវិទ្យុដដែលនោះបានផ្សាយបន្ថែមថា លោក សុរិយា ស៊ូប៊េឌី មកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី៥ ដល់ថ្ងៃទី១១ ខែធ្នូ ដើម្បីសិក្សាលើប្រព័ន្ធបោះឆ្នោត និងស្ថានភាពសិទ្ធិមនុស្ស ។ លោកក៏គ្រោងនឹងជួបពិភាក្សាការងារជាមួយអាជ្ញាធររដ្ឋាភិបាល អង្គការសង្គមស៊ីវិល គណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញ។
ក្រុមអ្នកវិភាគឯករាជ្យមួយចំនួនបានមើលឃើញថា សកម្មភាពគណបក្សប្រឆាំង និងអង្គការដែលមាននិន្នាការប្រឆាំងទាំងនោះ មើលទៅវាទាស់ភ្នែកណាស់ រកអ្វីមកថ្លែងពុំដូចឡើយ ហើយសង្កៀរត្រចៀកខ្លាំងណាស់ ពីព្រោះសម័យនេះទៅហើយ បែរជានៅសល់មនុស្សអគតិច្រើនអីយ៉ាងនេះ?ដើម្បីឱ្យខ្លួន និងក្រុមខ្លួនរស់មិនគិតគូរពិចារណាដល់អ្នកដទៃ ដោយបង្កើតជំនួញនយោបាយអសីលធម៌បែបនេះ។ សួរតាមត្រង់ចុះ បើក្រុមលោកជាអ្នកដឹកនាំប្រទេសវិញ នៅពេលដែលខិតខំធ្វើការអភិវឌ្ឍគ្រប់កន្លែង គ្មានពេលទំនេរខិតខំរកជំនួយមកកសាងប្រទេស ទប់ទល់ដោយជោគជ័យ និងប្រកបដោយមោទនភាពជាតិខ្ពស់ប្រឆាំងនឹងការឈ្លានពាន និងការវាយប្រហារដោយយោធាពីសំណាក់រដ្ឋាភិបាលអាប់ភីស៊ីត និងជួយប្រជាពលរដ្ឋក្នុងគ្រាទឹកជំនន់ប៉ុណ្ណឹងហើយនៅតែមិនសរសើរ ថែមទាំងតិះដៀលនិងជេរប្រមាថដល់អាយុជីវិតម្រមុខរាជរដ្ឋាភិបាលទៅទៀត តើអស់លោកមានអារម្មណ៍យ៉ាងម៉េចដែរ?អស់លោកយល់ថា អស់លោកជាមនុស្សអសីលធម៌ឬទេ? ។ ដូចពាក្យចាស់បុរាណាចារ្យបានពោលទុកមកថា «ពិបាកពន្យល់មនុស្សចេះហើយធ្វើមិនចេះ ដឹងខុសហើយមិនទទួលថាខុស សូម្បីតែព្រះសម្មាសម្ពុទ្ធក៏ព្រះអង្គប្រោសមិនបានដែរ»។ ដោយសារមហិច្ឆតាលោភលន់ចង់បានអំណាចខ្លាំងពេក លោកកឹម សុខា បានប្រឌិតរឿងថា ឱ្យលោកសុរិយា ស៊ូប៊េឌី ជួយការពារអំពីសុវត្ថិភាពផ្ទាល់ខ្លួន ត្រង់ចំណុចនេះសួរថា តើលោកកឹម សុខា បានដើរឃោសនាខុសរដូវដោយមិនគិតពីរដូវបោះឆ្នោត ឬក៏មិនបោះឆ្នោតក៏លោកកឹម សុខា មិនបានឈប់សម្រាកផង ពីព្រោះតាមតែយើងដឹង គឺលោកមានជំងឺលើសឈាមប្រចាំកាយ និងជំងឺល្អក់ខួរក្បាល ម្ល៉ោះហើយត្រូវតែចុះទៅជួបប្រជាពលរដ្ឋដើម្បីបន្ធូរអារម្មណ៍ ពីព្រោះមានប្រជាពលរដ្ឋមួយចំនួនតូចចេះបញ្ជោរ ចេះសរសើរ វាប្រសើរជាងអង្គុយនៅផ្ទះធ្វើឱ្យជំងឺរួមរឹត ។
រាជរដ្ឋាភិបាលកម្ពុជាបានប្រកាន់យកនូវគោលការណ៍ប្រជាធិបតេយ្យអាស្រ័យធម្មនុញ្ញ ដែលឈរលើមូលដ្ឋានពហុបក្ស ធ្វើនយោបាយដោយសេរី និងគាំទ្រដល់សមាគម អង្គការសង្គមស៊ីវិល ដូចជាកាលពីថ្ងៃទី៥ ខែធ្នូ ឆ្នាំ២០១១នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានលើកសរសើរដល់អង្គការសង្គមស៊ីវិលមួយចំនួនដូចជាអង្គការសេដាក អង្គការ Caritas និងអង្គ ការមួយចំនួនទៀតថា ពួកគេអត់ខ្វល់ពីអ្វីទេ ដឹងតែចុះទៅចែកជូនប្រជាពលរដ្ឋជាមួយអាជ្ញា ធរ និងកាកបាទក្រហមតាមមូលដ្ឋានផ្ទាល់ ដោយមិនខ្វាយខ្វល់ពីការអំពាវនាវរកជំនួយពីបរទេសនោះទេ ហើយសម្តេចតេជោសែន ក៏បានមានប្រសាសន៍បន្ថែមទៀតថា អង្គការទាំងនោះទើបជាអ្នកអនុវត្តសិទ្ធិប្រជាធិបតេយ្យពិតប្រាកដ ពីព្រោះពេលដែលជួយប្រជាពលរដ្ឋ ទាន់ពេលវេលានោះហើយ គឺជាការបានអនុវត្ត នូវសិទិ្ធរស់រានមានជីវិត ។
ផ្ទុយទៅវិញ មន្រ្តីអង្គការមួយចំនួនដែលជាប់សាច់ញាតិជាបងប្អូនរបស់តំណាងរាស្រ្តខេត្តកណ្តាលនៃគណបក្សសិទ្ធិមនុស្ស ខិតខំធ្វើវេទិកាជួយឃោសនានៅពីក្រោយខ្នងគណបក្ស សិទ្ធិមនុស្សដើម្បីជួយបងប្រុសរបស់ខ្លួនឯង ហើយម្យ៉ាងទៀតក្រុមនេះដើរតួជាអង្គការ ប៉ុន្តែ ពីមួយថ្ងៃទៅមួយថ្ងៃខិតខំបំភ្លៃព័ត៌មានដោយ ញុងញង់ដុតបញ្ឆេះកំហឹងប្រជាពលរដ្ឋដើម្បីទាញ យកតែប្រាក់ជំនួយពីបរទេសតែប៉ុណ្ណោះ។
សរុបសេចក្តីមក គណបក្សនយោបាយ និង អង្គការដែលមាននិន្នាការប្រឆាំងមួយចំនួនបាន និងកំពុងខំប្រឹងដើរប៉្រូដើម្បីតែការធ្វើជំនួញដូរ
បាយចិញ្ចឹមក្រុម និងបក្សពួករបស់ខ្លួន ដើម្បីតែប្រយោជន៍ឆ្នាំងតែប៉ុណ្ណោះ គឺពុំបានចូលរួមសកម្មភាពណាមួយជួយអភិវឌ្ឍប្រទេសជាតិ
ជាមួយរាជរដ្ឋាភិបាលបន្តិចសោះឡើយ ៕
ដោយលោកស្រី សិលា អ្នកស្រាវជ្រាវប្រវត្តិសាស្ត្រ
ចែករំលែកព័តមាននេះ