រាជធានីភ្នំពេញ ៖ កាលពីព្រឹកថ្ងៃទី៨ ធ្នូ ឆ្នាំ២០១១ នៅសាលប្រជុំអគ្គនាយកដ្ឋានគយ និងរដ្ឋាករកម្ពុជា មានប្រារព្ធកិច្ចប្រជុំបូកសរុបលទ្ធផលការងារគយ និងរដ្ឋាករខែវិច្ឆិកា ឆ្នាំ២០១១ ក្រោមអធិបតីភាពលោកបណ្ឌិតប៉ែន ស៊ីម៉ន ប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា ដោយមានការចូលរួមពីថ្នាក់ដឹកនាំគ្រប់ជាន់ថ្នាក់នៃអង្គភាពគយ និងរដ្ឋាករទូទាំងប្រទេស ។ លទ្ធផលចំណូលពន្ធអាករ ខែវិច្ឆិកា ឆ្នាំ២០១១នេះ សម្រេចបានជាង២៧២ពាន់លានរៀល មានកំណើនប្រមាណជាង១៦% ប្រៀបធៀបចំណូលពន្ធអាករគយ ខែវិច្ឆិកា ឆ្នាំ២០១០ កន្លងមក ។
អង្គប្រជុំបានលើកឡើងនូវវិធានការចំពោះមុខ៧ចំណុចសំខាន់ៗ ដែលត្រូវបន្តអនុវត្តដើម្បីពង្រឹងប្រសិទ្ធភាពការងារគយ និងរដ្ឋាកររួមមាន ៖
ទី១-ត្រូវផ្សព្វផ្សាយដល់មន្ត្រីគយគ្រប់ថ្នាក់ឱ្យបានយល់ស៊ីជម្រៅនូវខ្លឹមសារនៃបណ្តាវិធានការបន្ថែម៣ចំណុចដែលទទួលបានការឯកភាពដ៏ខ្ពង់ខ្ពស់លើគោលនយោបាយសារពើពន្ធរួចហើយពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានាថ្ងៃទី២២ វិច្ឆិកា ឆ្នាំ២០១១ នេះ ដើម្បីពង្រឹងសក្តានុពលពន្ធអាករគយរួមមាន៖
-ការពង្រីកមូលដ្ឋានពន្ធអាករគយតាមរយៈការអនុវត្តពេញលេញនូវតម្លៃគិតពន្ធគយ តាមកិច្ចព្រមព្រៀងអង្គការពាណិជ្ជកម្មពិភពលោក ។
-ការកែសម្រួលអត្រាពន្ធគយលើមុខទំនិញមួយចំនួន ក្រៅក្របខណ្ឌកិច្ចព្រមព្រៀងតំបន់ពាណិជ្ជកម្មសេរីនានា ។
-ការដំឡើងអត្រាអាករនាំចេញ និងអាករពិសេសលើមុខទំនិញមានវេទយិតភាពខ្ពស់មួយចំនួន ។
ទី២-ការពង្រឹងអនុលោមភាពច្បាប់លើមុខទំនិញយានយន្ត ៖
ការគ្រប់គ្រងយានយន្តគ្រប់ប្រភេទ(ទាំងជាប់ពន្ធអាករ ទាំងប្រភេទពន្ធអាករបន្ទុករដ្ឋ)រាប់បញ្ចូលទាំងការបិទលតាប័ត្រដោយឡែកលើ
រថយន្តអាករបន្ទុករដ្ឋ ការផ្ទៀងផ្ទាត់ទិន្នន័យរកស្លាកលេខ លតាប័ត្រក្លែងក្លាយ ការបង្ក្រាបការធ្វើអាជីវកម្មលើរថយន្តនាំចូលល្មើសច្បាប់ ការហាមឃាត់ការតាំងលក់រថយន្តពន្ធអាករបន្ទុករដ្ឋក្នុងអាជីវកម្មដ្ឋាននានា ព្រមទាំងការស្រង់ស្ថិតិរថយន្តគ្រប់ប្រភេទតាមលំនៅដ្ឋានផងដែរ។ បណ្តាទិន្នន័យពាក់ព័ន្ធនឹងយានយន្ត នឹងត្រូវបានកសាងជាប្រព័ន្ធទិន្នន័យដោយឡែកសម្រាប់បម្រើឱ្យការផ្ទៀងផ្ទាត់អនុលោមភាព និងកំណត់មុខសញ្ញាហានិភ័យ ។
ទី៣-ការពង្រឹងសក្តានុពលចំណូលបន្ថែមសម្រាប់រយៈពេលមធ្យមៈ
-ការពង្រីកភាពគ្របដណ្តប់នៃការងារគយឱ្យបានពេញលេញនៅតំបន់ត្រីកោណអភិវឌ្ឍន៍កម្ពុជា ឡាវ វៀតណាម (ខេត្តមណ្ឌលគិរី រតនគិរី ក្រចេះ និងស្ទឹងត្រែង)រួមមានៈ
-ការដាក់ឱ្យដំណើរការពេញលេញនូវសាខាគយ និងរដ្ឋាករខេត្តរតនគិរី និងខេត្តមណ្ឌលគិរី។
-ការពង្រឹងប្រសិទ្ធភាពនៃការប្រមូលចំណូលពន្ធអាករគយឱ្យស្របតាមសក្តានុពលថ្មីនៃតំបន់នេះ ជាពិសេសអាករនាំចេញកៅស៊ូកែច្នៃ និងផលិតផលពីឈើ និងពន្ធអាករនាំចូលប្រេងឥន្ធនៈ យានយន្ត និងគ្រឿងចក្រគ្រប់ប្រភេទ។
-ការពិនិត្យលទ្ធភាពពង្រីកប្រភេទ និងមូលដ្ឋានពន្ធអាករដែលត្រូវប្រឈមដោយគយតាមការអនុវត្តល្អនៅក្នុងតំបន់អាស៊ាន ដែលអាចរួមមានការគ្រប់គ្រងផលិតកម្មដ្ឋានទំនិញវេទយិត និងអាជីវកម្មដ្ឋានផ្តល់សេវាប្រណីតជាដើម ។
ទី៤-ពង្រឹងការគ្រប់គ្រងអាជីវកម្មនាំចូលសន្និធិ និងចែកចាយផលិតផលតេលសិលា ដោយបន្តសហការផ្សព្វផ្សាយនូវនីតិវិធីគ្រប់គ្រង និងត្រួតពិនិត្យការអនុវត្តគោលនយោបាយ និងការផ្ទៀងផ្ទាត់អនុលោមភាព។
ទី៥-ជំរុញការរៀបចំគ្រប់គ្រងការត្រួតពិនិត្យការនាំចូលម្ហូបអាហារ ក្នុងនាមស្ថាប័ននាំមុខតែមួយគត់ពាក់ព័ន្ធនឹងមុខទំនិញម្ហូបអាហារនៅ មាត់ច្រកអន្តរជាតិ ដោយត្រូវអនុវត្តឱ្យបានមឺុងម៉ាត់តាមបទប្បញ្ញត្តិប្រកាសអន្តរក្រសួងប្រាំមួយក្រសួងជាធរមាន ក្នុងករណីចាំបាច់ត្រូវមានក្រុមជំនាញគយដោយឡែក។
ទី៦-ការរៀបចំកម្រៃសេវាគយផ្លូវការនានា ដោយជំរុញកសាងសេចក្តីព្រាងតារាងកម្រៃសេវានេះឱ្យបានរួចរាល់តាមកាលកំណត់។
ទី៧-បញ្ហាផេ្សងៗ
-ការកសាងរបាយការណ៍បូកសរុបការងារគយ និងរដ្ឋាករឆ្នាំ២០១១ឱ្យបានទាន់ពេល។
-ការរៀបចំបញ្ជរព័ត៌មានគយតាមអង្គភាពពាក់ព័ន្ធ ដោយបិទផ្សាយជាសាធារណៈនូវបទប្បញ្ញត្តិគយសំខាន់ៗជាធរមានដែលបានណែនាំនាខែកន្លងមក ជាកម្មវត្ថុនៃការត្រួតពិនិត្យប្រសិទ្ធភាព។
-ការរៀបចំរចនាសម្ព័ន្ធរបស់បណ្តានាយកដ្ឋាន និងអង្គភាពមូលដ្ឋាននានារបស់អគ្គនាយកដ្ឋានគយ និងរដ្ឋាករកម្ពុជា និងការកែសម្រួលធនធានមនុស្ស និងរបៀបរបបធ្វើការឱ្យបានសមស្រប៕
ចែករំលែកព័តមាននេះ