រាជធានីភ្នំពេញ ៖ គណៈកម្មាធិការអនុសាខាកាកបាទក្រហមកម្ពុជាខណ្ឌប្ញស្សីកែវ កាលពីព្រឹកថ្ងៃទី៧ ធ្នូ បាននាំអំណោយជាគ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួនធំ ឧបត្ថម្ភដល់គ្រួសារក្រីក្រ ចាស់ជរា ផ្ទុកមេរោគអេដស៍ចំនួន១០គ្រួសារនៅក្នុងភូមិនានាក្នុងសង្កាត់ គីឡូម៉ែត្រលេខ៦ ខណ្ឌប្ញស្សីកែវ ។
រាជធានីភ្នំពេញ ៖ គណៈកម្មាធិការអនុសាខាកាកបាទក្រហមកម្ពុជាខណ្ឌប្ញស្សីកែវ កាលពីព្រឹកថ្ងៃទី៧ ធ្នូ បាននាំអំណោយជាគ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួនធំ ឧបត្ថម្ភដល់គ្រួសារក្រីក្រ ចាស់ជរា ផ្ទុកមេរោគអេដស៍ចំនួន១០គ្រួសារនៅក្នុងភូមិនានាក្នុងសង្កាត់គីឡូម៉ែត្រលេខ៦ ខណ្ឌប្ញស្សីកែវ ។
ពិធីប្រគល់អំណោយនេះបានរៀបចំឡើងក្រោមអធិបតីភាពលោកនុត ពុធដារ៉ា ប្រធានគណៈកម្មាធិការអនុសាខាកាកបាទក្រហមកម្ពុជាខណ្ឌប្ញស្សីកែវ និងលោកស្រីកែវ ស៊ុនច័ន្ទណារី អនុប្រធាន ព្រមទាំងមានការនិមន្តចូលរួមពីភិក្ខុកន្តវីរោ ចាន់ រឿន ចៅអធិការស្តីទីវត្តទួលសន្តិវ័ន ហៅវត្តទួលអស់លោក និងសមាជិក សមាជិកាសាខាកាកបាទក្រហមកម្ពុជាខណ្ឌ-សង្កាត់យ៉ាងច្រើនកុះករ។
អំណោយដែលនាំយកទៅឧបត្ថម្ភក្នុងឱកាសនោះ ក្នុងមួយគ្រួសារទទួលបានអង្ករ២៥គីឡូក្រាម គ្រឿងឧបភោគបរិភោគ សម្ភារប្រើប្រាស់ចំនួន១៦មុខទៀត និងថវិកាចំនួន១០ម៉ឺនរៀល ។ ដោយឡែក ចៅអធិការស្តីទីវត្តទួលសន្តិវ័នឧបត្ថម្ភ១ម៉ឺនរៀល និងលោកស្រីសុខ ដេម៉ា ក្រុមប្រឹក្សាសង្កាត់គីឡូម៉ែត្រលេខ៦ ជួួយឧបត្ថម្ភបន្ថែមចំនួន១ម៉ឺនរៀលទៀត ។
លោកនុត ពុធដារ៉ា ប្រធានគណៈកម្មាធិការអនុសាខាកាកបាទក្រហមកម្ពុជាខណ្ឌប្ញស្សីកែវ បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុុន សែន ប្រធានកាកបាទក្រហមកម្ពុជា ដែលជានិច្ចកាលលោកជំទាវតែងយកចិត្តទុកដាក់ចំពោះប្រជាពលរដ្ឋក្រីក្រ ចាស់ជរា អ្នកផ្ទុកមេរោគ អេដស៍ និងអ្នករងគ្រោះផ្សេងៗ និងចាត់ឱ្យមន្ត្រីគ្រប់ជាន់ថ្នាក់ចុះជួយដល់មូលដ្ឋាន ។
លោកនុត ពុធដារ៉ា បានបន្តទៀតថា ដោយមានការណែនាំពីលោកជំទាវកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា និងសាខាកាកបាទក្រហមកម្ពុជារាជធានីភ្នំពេញ អនុសាខាកាកបាទក្រហមកម្ពុជាខណ្ឌប្ញស្សីកែវបានយកចិត្តទុកដាក់យ៉ាងខ្លាំង ហើយបានណែនាំដល់មន្ត្រីកាកបាទក្រហមសង្កាត់ចុះស្រាវជ្រាវរកប្រជាពលរដ្ឋក្រីក្រ ចាស់ជរា គ្មានទីពឹងក្នុងមូលដ្ឋាននាំអំណោយយកទៅជួយឧបត្ថម្ភជាបន្តបន្ទាប់ដោយមានការចូលរួមពីព្រះចៅអធិការតាមបណ្តាវត្តនានា។
លោកនុត ពុធដារ៉ា បានណែនាំដល់បងប្អូនប្រជាពលរដ្ឋក្រីក្រ ចាស់ជរា និងផ្ទុកមេរោគអេដស៍ទាំងអស់សូមកុំអស់សង្ឃឹម ព្រោះបងប្អូន នៅមានកាកបាទក្រហមកម្ពុជាដែលមានលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន តែងតែយកចិត្តទុកដាក់ និងនាំអំណោយឧបត្ថម្ភដល់បងប្អូន ដើម្បីជួយសម្រួលដល់ការលំបាកជានិច្ច ។ ម្យ៉ាងទៀត សុំបងប្អូនដែលមានផ្ទុកមេរោគអេដស៍ត្រូវយកចិត្តទុកដាក់ពីសុខភាព និងទៅបើកថ្នាំពន្យារឱ្យបានទៀងទាត់ ។ លោកបានថ្លែងអំណរគុណផងដែរដល់ព្រះសង្ឃ ពុទ្ធបរិស័ទ និងសប្បុរសជននានាដែលតែងតែ
ចូលរួមឧបត្ថម្ភតាមរយៈកាកបាទក្រហមកម្ពុជា ដើម្បីនាំអំណោយយកទៅចែកជូនដល់ប្រជាពលរដ្ឋក្រីក្រ និងរងគ្រោះផ្សេងៗ៕
ចែករំលែកព័តមាននេះ