រាជធានីភ្នំពេញ ៖ មនុស្សយើងម្នាក់ៗតែងតែប្រាថ្នាចង់បានសម្រស់ ស្រស់ស្អាត ជាពិសេសគឺស្បែក ប៉ុន្តែបើសិនជាស្បែកមានបញ្ហា ដូចជាមានស្នាមសម្លាក នោះវាជាបញ្ហាមួយដែលធ្វើឱ្យលោក លោកស្រី អ្នកនាងកញ្ញា មានក្តីបារម្មណ៍យ៉ាងខ្លាំង។
លោកវេជ្ជបណ្ឌិតស្រេង រាសី អ្នកជំនាញផ្នែកសើស្បែកនៅមជ្ឈមណ្ឌលថែរក្សាសម្ផស្សមេហ្គាប៊ែល និងមជ្ឈមណ្ឌលថែរក្សាសម្ផស្សអាស៊ីប៊ីយូធីបានមានប្រសាសន៍ឱ្យដឹងថា សម្លាកគឺជាស្លាកស្នាមមួយ ដែលកើតឡើងដោយសារស្បែករបស់លោកអ្នកមានរបួស ហើយបង្កទៅជាសម្លាក។ សម្លាកត្រូវបានគេបែងចែកខុសគ្នា គឺសម្លាកធម្មតា សម្លាកខ្លាំង និងសម្លាកមានផ្លែ។
១-សម្លាកធម្មតា៖ គឺជាសម្លាកដែលរាបស្មើ ហើយមានពណ៌ស្រដៀងនឹងស្បែក។
២-សម្លាកខ្លាំងៈ មានលក្ខណៈប៉ោងឡើង មើលឃើញយ៉ាងច្បាស់ជាងសម្លាកធម្មតា។
៣-សម្លាកផ្លែៈ ជាសម្លាកដែលប៉ោងឡើង និងរាលដាលជាងស្នាមរបួស។ សម្លាកប្រភេទនេះច្រើនកើតនៅលើបុគ្គលមួយចំនួនដែលមានហ្សែនកំណត់ ភាគច្រើនគឺជាជនជាតិស្បែកខ្មៅ ដូចអាព្រិក ឬអាស៊ីដែលមានសម្បុរស្រអែម។
សម្លាកគឺកើតឡើងដោយសារតែរបួស ការមុតទៅលើស្បែក ឬក៏មានបញ្ហាជំងឺសើស្បែក អាប់សែ បូស ការរលាក ឬក៏កើតឡើងដោយសារជំងឺត្រអកជាដើម។ និយាយរួមសម្លាកគឺកើតឡើងដោយសារតែមានការប៉ះពាល់ជ្រៅដល់ស្រទាប់របស់ស្បែក ដែលបង្កឱ្យមានឈាម ឬក៏របួស ទើបក្លាយទៅជាសម្លាក់។
តាមធម្មតាសម្លាកមិនអាចធ្វើការព្យាបាលឱ្យបាត់ទាំងស្រុងនោះទេ តែអាចធ្វើការព្យាបាលដោយសម្រួលសម្លាក ដើម្បីឱ្យមើលទៅមានរាងតូច ឬស្រាលជាងមុន។ សម្លាកអាចសម្រួលតាមវីធីសាស្ត្រផ្សេងៗ ដូចតទៅ។
-ការវះកាត់ៈ គឺវះកាត់ដើម្បីសម្រួលសម្លាកដែលធំឱ្យទៅជាខ្សែ។
-ការខាត់ស្បែក៖ គឺដើម្បីឱ្យសម្លាកមានសភាពរាបស្មើប្រហាក់ប្រហែលនឹងស្បែកធម្មតា
-ការប្រើឡេសឺ៖ការប្រើឡេសឺសម្រាប់បាញ់ដើម្បីសម្រួលដល់សម្លាកឱ្យមានសភាពធម្មតា មិនប៉ោង។
-ការចាក់ថ្នាំៈដើម្បីឱ្យសម្លាកស្វិតរួមទៅជាតូច។
-ការប្រើម្ជុលតូចៗ ៖ គេប្រើម្ជុលតូចយកទៅចាក់នៅលើស្បែក ដែលមានស្នាម ដើម្បីឱ្យស្នាមចែកគ្នាទៅជាបំណែកតូចៗ។
លោកវេជ្ជបណ្ឌិតបានបន្ថែមទៀតថា ដើម្បីការពារកុំឱ្យមានសម្លាកគឺត្រូវការពារកុំឱ្យមានរបួស ព្រោះរបួសកាន់តែធំ ឬកាន់តែជ្រៅ អាចធ្វើឱ្យស្នាមសម្លាកកាន់តែធំផងដែរ។ លោកអ្នកត្រូវការពារមេរោគឆ្លងទៅលើរបួស ព្រោះអាចឱ្យមានស្នាមរបួសកាន់តែធំ ហើយជ្រៅដែលបន្សល់នូវស្លាកស្នាមនៅពេលដែលលោកអ្នកចង់បំបាត់ស្លាកស្នាមទាំងនោះ លោកអ្នកគួរតែទៅពិភាក្សាជាមួយអ្នកដែលមានជំនាញច្បាស់លាស់ ដើម្បីរកវិធីព្យាបាលឱ្យបានត្រឹមត្រូវ។ ដូចនេះវិធីដែលល្អ គឺការពារកុំឱ្យមានស្នាមសម្លាកធំ នៅពេលដែលមានរបួស ឬជំងឺអ្វីមួយដែលកើតនៅលើស្បែកលោកអ្នក ត្រូវរកវិធីព្យាបាលឱ្យបានសមស្រប ដើម្បីកាត់បន្ថយនូវស្នាមសម្លាក ដែលមិនល្អចំពោះស្បែករបស់លោកអ្នក៕
ចែករំលែកព័តមាននេះ