ក្រុងប៉ោយប៉ែត ៖ រោងពិធីមួយដែលស្ថិតក្នុងភាពអាថ៌កំបាំងដែលអ្នកខ្លះសង្ស័យថា ជារោងការ និងអ្នកខ្លះថា ជាការភ្ជាប់ពាក្យរវាងនាងក្រមុំខ្មែរម្នាក់ជាមួយបុរសជនជាតិថៃ ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ដែលរោងនោះគេធ្វើឡើងនៅថ្ងៃទី៥ ធ្នូ ត្រូវបានរុះរើវិញយ៉ាងតក់ក្រហល់នៅវេលាទៀបភ្លឺព្រឹកថ្ងៃទី៦ វិច្ឆិកា ។
តាមប្រភពព័ត៌មានថា ដោយសារគ្រួសារខាងនាងក្រមុំបានក្បត់កិច្ចសន្យាភ្ជាប់ពាក្យកាលពីជាង១ឆ្នាំមុន បែរជាប៉ុនប៉ងរៀបមង្គលការជាមួយអ្នកផ្សេងហើយត្រូវបានភាគីបុរសដែលភ្ជាប់ពាក្យរួចហើយ ប្តឹងទាមទាររកយុត្តិធម៌ ទើបរោងការត្រូវបានរុះរើចេញវិញមុនព្រះអាទិត្យរះ។ គ្រួសារដែលរៀបចំពិធីមង្គលការក្នុងភាពអាថ៌កំបាំងខាងលើ ប្តីឈ្មោះចន ញ៉ា មុខងារជាអនុប្រធានភូមិ ប្រពន្ធឈ្មោះឡាច រស់ ។ កូនស្រីដែលគេចោទថា ក្បត់ប៉ុនប៉ងរៀបការជាមួយអ្នកថ្មីនេះឈ្មោះចន គន្ធន អាយុ២០ឆ្នាំ ។
តាមប្រភពព័ត៌មានបានឱ្យដឹងថា នាងក្រមុំខាងលើកាលពីឆ្នាំមុនគឺនៅចុងខែមករា ឆ្នាំ២០១០ បានភ្ជាប់ពាក្យជាមួយគ្រួសារមួយរួចហើយ ដែលភាគីខាងប្រុសឈ្មោះហ៊ន់ គីមហុង អាយុ២១ឆ្នាំ ឪពុកឈ្មោះអេង អឿន អាយុ៤៨ឆ្នាំ រស់នៅសហរដ្ឋអាមេរិក ។ ម្តាយឈ្មោះញ៉ាន ស៊ីវហ៊ាង អាយុ៤៤ឆ្នាំ ទីលំនៅបច្ចុប្បន្ននៅភូមិក្បាលស្ពាន២។ ប្រភពបន្តថា កាលពីអំឡុងភ្ជាប់ពាក្យរវាងឈ្មោះហ៊ន់ គីមហុង និងនាងក្រមុំខាងលើគឺមានធ្វើកម្មវិធីហែជំនូន និងមានការចូលរួមពីសាច់ញាតិទាំងសងខាងយ៉ាងគគ្រឹកគគ្រេង និងថែមទាំងមានពិធីជប់លៀងជាច្រើនតុ រហូតមានលោកជំទាវភរិយាឯកឧត្តមខ្លះបានចូលរួមទៀតផង។
ក្រោយពីការភ្ជាប់ពាក្យ ភាគីទាំង២បានកំណត់រៀបការក្នុងខែមិថុនា ឆ្នាំ២០១១ ព្រោះជឿតាមគ្រូទស្សន៍ទាយ លុះដល់ថ្ងៃទី៥ ធ្នូ ២០១១ បែរជាមានព័ត៌មានថា នាងក្រមុំខាងលើធ្វើពិធីមួយទៀត ដែលអ្នកស្រុកគ្រប់គ្នាសង្ស័យថា ជាការរៀបអាពាហ៍ពិពាហ៍ និងខ្លះយល់ថា ជាការភ្ជាប់ពាក្យជាមួយបុរសជនជាតិថៃ។ បើតាមការឱ្យដឹងពីអ្នកស្រីញ៉ាន ស៊ីវហ៊ាង ត្រូវជាម្តាយរបស់អនាគតកូនកំលោះហ៊ន់ គីមហុង ដែលជាតួឯកប្រុសទី១ បានភ្ជាប់ពាក្យរួចហើយនោះ បានប្រាប់តាមទូរស័ព្ទថា គ្រួសារគូដណ្តឹងកូនគាត់កំពុងរៀបចំអាពាហ៍ពិពាហ៍ថ្មីមិនមែនជាការភ្ជាប់ពាក្យអ្វីនោះទេ ដោយគាត់បន្តថា គាត់បានឱ្យបណ្តាញទៅចូលរួមក្នុងកម្មវិធីនោះ ហើយប្រាប់គាត់ថា ឃើញនាងអនាគតកូនប្រសារបស់គាត់ត្រូវគេឱ្យអង្គុយផ្ទឹមបាចផ្កាស្លាមានទាំងកួចចំណងដៃ និងមានពិធីសូត្រមន្តទៀតផង ។
ទោះបីជាបែបណា គ្រួសារដែលរៀបចំធ្វើពិធីបែបអាថ៌កំបាំងនេះត្រូវបានប៉ូលិសអធិការដ្ឋាននគរបាលក្រុងធ្វើលិខិតកោះហៅសួរនាំនៅព្រឹកថ្ងៃទី៦ វិច្ឆិកា ។
អ្នកស្រីឡាច រស់ អាយុ៤៧ឆ្នាំ ដែលជាម្តាយនាងក្រមុំខាងលើ បានប្រាប់កោះសន្តិភាពនៅអធិការដ្ឋាននគរបាលក្រុងថា គាត់ធ្វើពិធីភ្ជាប់ពាក្យកូនស្រីគាត់ជាមួយបុរសជនជាតិថៃ មិនមែនជាពិធីរៀបអាពាហ៍ពិពាហ៍ទេ។ អ្នកស្រីទទួលស្គាល់ថា កូនស្រីរបស់គាត់កន្លងមកធ្លាប់ភ្ជាប់ពាក្យជាមួយប្រុសម្នាក់ឈ្មោះហ៊ន់ គីមហុង មែន ប៉ុន្តែដោយសារក្រោយការភ្ជាប់ពាក្យ ភាគីខាងប្រុសមិនទាន់ឱ្យលុយបណ្ណាការ និងថ្លៃទឹកដោះ ។ ម្យ៉ាងភាគីកូនប្រុសនោះងក់ងចេញពីផ្ទះគាត់ទៅបាត់ ហើយគាត់សុំផ្តាច់ពាក្យវិញ ។ អ្នកស្រីជាម្តាយនាងក្រមុំបានប្រាប់ថា ការសុំផ្តាច់ពាក្យនេះគឺនិយាយតាមទូរស័ព្ទម្តងតែប៉ុណ្ណោះ ហើយត្រូវបានបុរសថៃស្រឡាញ់កូនគាត់គេចូលតាមច្បាប់ ទើបគាត់ធ្វើពិធីភ្ជាប់ពាក្យតែម្តង។
ក្នុងវិវាទដែលកម្រនឹងកើតមាននេះ មន្ត្រីប៉ូលិសបានសុំឱ្យផ្អាកពិធីនោះវិញ ព្រោះតែគ្មានច្បាប់ ម្យ៉ាងជាមួយជនបរទេសទៀតផង ។ អ្នកស្រីម្តាយនាងចន គន្ធន បានប្រាប់ថា ការរៀបចំកម្មវិធីភ្ជាប់ពាក្យនេះគាត់បានសួរមេភូមិដែរ ពីច្បាប់ទម្លាប់ ប៉ុន្តែដោយសារមេភូមិប្រាប់ថា ត្រឹមពិធីភ្ជាប់ពាក្យមិនបញ្ហាទេ ទើបពួកគាត់ហ៊ានធ្វើ។
បុរសជនជាតិថៃដែលជាតួឯកទី២ ក្នុងការភ្ជាប់ពាក្យជាមួយនាងចន គន្ធន ពុំត្រូវបានគេឱ្យស្គាល់អត្តសញ្ញាណនោះទេ ។ តាមប្រភពខ្លះប្រាប់ថា ក្រោយពេលបែកធ្លាយមានការតវ៉ាត្រូវគេឱ្យចេញទៅប្រទេសថៃវិញទាំងយប់។ អ្នកស្រីជាម្តាយតួឯកទី១ បានប្រាប់តាមទូរស័ព្ទថា ធាតុពិតកូនរបស់គាត់ និងនាងចន គន្ធន នោះនឹងត្រូវរៀបចំនៅខែមិថុនា ឆ្នាំ២០១១ ហើយ ដល់ថ្ងៃការទើបគិតគូគ្នាថ្លៃទឹកដោះមិនក្រោមពី១ម៉ឺនដុល្លារអាេមរិកនោះទេ ប៉ុន្តែបែរជាដល់ខែកំណត់រៀបការក៏ភាគីខាងស្រីប្រើវិធីដោះសារចាំថ្ងៃនេះថ្ងៃនោះរហូតទើបខកខានរហូតមកដល់ពេលនេះ រហូតគេលួចរៀបការកូនជាមួយប្រុសថៃក្បត់ការភ្ជាប់ពាក្យជាមួយកូនប្រុសគាត់ទៀត ។ ពេលនេះគាត់បានដាក់ពាក្យបណ្តឹងពីគ្រួសារខាងលើហើយ នៅអធិការដ្ឋាននគរបាលក្រុងប៉ោយប៉ែត ដើម្បីសងថ្លៃពិធីភ្ជាប់ពាក្យ លុបលាងកិត្តិយសគ្រួសាររបស់គាត់ ។
លោកអ៊ុំ សុផល អធិការនគរបាលក្រុងប៉ោយប៉ែតបានប្រាប់តាមទូរស័ព្ទនៅរសៀលថ្ងៃទី៦ ធ្នូ ថា កម្មវិធីរបស់គ្រួសារក្មេងស្រីជាពិធីរៀបអាពាហ៍ពិពាហ៍ពិតប្រាកដ មិនមែនជាពិធីភ្ជាប់ពាក្យទេ ដោយមានទាំងការក្រាបផ្ទឹមបាចផ្កាស្លាទៀតផង ។ ម្យ៉ាងពិធីមង្គលការជាមួយជនបរទេស និងគ្មានច្បាប់ទម្លាប់ ហើយលួចរៀបការជាមួយអ្នកថ្មី មិនទាន់ផ្តាច់ការភ្ជាប់ពាក្យជាមួយគូភ្ជាប់ពាក្យទី១ផង ទើបលោកឱ្យរើរោងចេញវិញយ៉ាងឆាប់នៅពេលនេះ ៕
ចែករំលែកព័តមាននេះ