សាកលវិទ្យាល័យរបស់ប្រទេសជប៉ុន និងអាមេរិកបានអភិវឌ្ឍរួមគ្នានូវបច្ចេកវិទ្យាវេជ្ជសាស្ដ្រថ្មីមួយដែលអាចរកឃើញជំងឺមហារីកយ៉ាងរហ័សដោយការធ្វើតេស្ដទឹកមាត់ ។ នេះបើយោងតាមការឱ្យដឹងពីបណ្ដាអ្នកស្រាវជ្រាវមកពីសាកលវិទ្យាល័យទាំងពីរ ។
សាកលវិទ្យាល័យ Keio University និង សាកលវិទ្យាល័យអាមេរិក University of California បានអភិវឌ្ឍរួមគ្នានូវបច្ចេកវិទ្យា ដែលនាំឱ្យពួកគេអាចរកឃើញប្រភេទជំងឺមហារីកលំពែង មហារីកសុដន់ និងមហារីកមាត់ ។ បណ្ដាអ្នកស្រាវជ្រាវបានវិភាគទឹកមាត់មនុស្សចំនួន២១៥នាក់ ដែលក្នុងនោះមានទាំងទឹកមាត់របស់អ្នកជំងឺមហារីក ផងដែរ ។
សាកលវិទ្យាល័យ Keio University ឱ្យដឹងថា នៅក្នុងទឹកមាត់គេបានរកឃើញសារធាតុ៥៤ប្រភេទដែលនាំឱ្យគេអាចរកឃើញជំងឺ ។ ការវិភាគជាបន្ដលើសារធាតុទាំងនោះ គេបានរកឃើញជំងឺមហារីកលំពែង៩៩% ជំងឺមហារីកដោះ៩៥% និងជំងឺ មហារីកមាត់៨៥%។
លោកសាស្ដ្រាចារ្យជប៉ុន តូម៉ូយ៉ូស៊ី សូហ្គា រំពឹងថា តាមរយៈបច្ចេកវិទ្យាថ្មីនេះនឹងនាំឱ្យគេរកឃើញសារធាតុដល់ទៅ៥០០មុខ បន្ថែមទៀតក្នុងពេលណាមួយលើការវិភាគទឹកមាត់ ។ បច្ចេកវិទ្យាថ្មីនេះរឹតតែធ្វើឱ្យគេមានភាពងាយស្រួល ជាពិសេសក្នុងការរកឃើញជំងឺមហារីកលំពែង និងមាត់ ។
សព្វថ្ងៃអត្រានៃការជួយសង្គ្រោះអ្នកកើតជំងឺមហារីកលំពែង និងមាត់នៅមានកំរិតទាបនៅឡើយ ព្រោះតែជំងឺទាំងពីរនេះពុំបានបង្ហាញអាការរោគច្បាស់លាស់នៅ ដំណាក់កាលដំបូងនោះឡើយ ហេតុនេះធ្វើឱ្យវីរុសមានឱកាសពង្រីកខ្លួនធ្វើឱ្យជំងឺកាន់តែធ្ងន់ធ្ងរជួយសង្គ្រោះពុំទាន់ ។ ការពិនិត្យទឹកមាត់មានភាពងាយស្រួលជាងការពិនិត្យឈាម និងលាមក ៕
ចែករំលែកព័តមាននេះ