រាជធានីភ្នំពេញ ៖ ស្រូវពូជអ៊ីអ៊ែរ៦៦ចំនួន៤០០គីឡូ ដែលជាអំណោយរបស់លោកអភិបាលរាជធានីភ្នំពេញ ត្រូវបានលោកឃួង ស្រេងអភិបាលខណ្ឌសែនសុខ នាំយកទៅផ្ដល់ជូនប្រជាពលរដ្ឋចំនួន២០គ្រួសារកាលពីរសៀលថ្ងៃទី៥ ធ្នូ ក្នុង១គ្រួសារទទួលបាន២០គីឡូក្រាម។ ពលរដ្ឋទាំង២០គ្រួសារ នេះ មកពីភូមិ៤ ក្នុងសង្កាត់ពញាពន់ ខណ្ឌសែនសុខ ដែលកន្លងមកបានរងគ្រោះដោយទឹកជំនន់លិចលង់ដំណាំស្រូវ ហើយការផ្ដល់ស្រូវពូជនេះធ្វើនៅក្នុងស្នាក់ការសង្កាត់ពញាពន់តែម្ដង។
លោកចៅសង្កាត់ពញាពន់ បានមានប្រសាសន៍នៅក្នុងពិធីផ្ដល់ស្រូវពូជដល់ប្រជាពលរដ្ឋខាងលើនេះថា ដំណាំស្រូវចំនួន១១៥ហិកតាត្រូវបានលិចលង់ដោយសារទឹកជំនន់កន្លងមកនៅក្នុងសង្កាត់ពញាពន់ ហើយប្រជាពលរដ្ឋចំនួន២០គ្រួសារនេះត្រូវការស្រូវពូជ ដើម្បីយកទៅបង្កបង្កើនផលធ្វើស្រែបណ្ដេញទឹក។ការស្នើរសុំរបស់ប្រជាពលរដ្ឋតាមរយៈមេភូមិ និងចៅសង្កាត់ទៅសាលាខណ្ឌសែនសុខ អំពីតម្រូវការពូជ ដើម្បីយកទៅដាំបណ្ដេញទឹកនៅរដូវសម្រក។ ថ្ងៃនេះការស្នើរសុំរបស់ប្រជាពលរដ្ឋបានដូចបំណង គឺលោកអភិបាលខណ្ឌសែនសុខ បាននាំស្រូវពូជផ្ដល់ជូនប្រជាពលរដ្ឋតាមតម្រូវការ ។ ប្រជាពលរដ្ឋមានការត្រេកអរ និងថ្លែងអំណរគុណដល់លោកអភិបាលរាជធានីភ្នំពេញ និងលោកអភិបាលខណ្ឌសែនសុខ ដែលបានឆ្លើយតបតាមតម្រូវការរបស់ពួកគាត់។
លោកឃួង ស្រេង អភិបាលខណ្ឌសែនសុខបានមានប្រសាសន៍ដែរថា លោកអភិបាលរាជធានីភ្នំពេញ បានយកចិត្ដទុកដាក់ចំពោះប្រជាពលរដ្ឋដែលរងគ្រោះទឹកជំនន់ និងបានឱ្យអាជ្ញាធរខណ្ឌសែនសុខ នាំយកស្រូវពូជផ្តល់ជូនប្រជាពលរដ្ឋតាមតម្រូវការនៅរដូវទឹកសម្រកនេះ ដើម្បីបង្កបង្កើនផល។
លោកឃួន ស្រេង បានពាំនាំការផ្តាំផ្ញើសួរសុខទុក្ខពីសម្ដេចអគ្គមហាសេនាបតីតេជោហ៊ុន សែន ចំពោះប្រជាពលរដ្ឋដែលរងគ្រោះទឹកជំនន់ ហើយសម្តេចបានផ្ដល់ជាអំណោយសម្ភារគ្រឿងឧបភោគ បរិភោគដល់ប្រជាពលរដ្ឋដោយមិនឱ្យពលរដ្ឋណាម្នាក់ ឬអត់អាហារដាច់ពោះស្លាប់នោះទេ៕
ចែករំលែកព័តមាននេះ