អង្គការសហប្រជាជាតិកាលពីថ្ងៃព្រហស្បតិ៍ សប្តាហ៍មុន បានទម្លាក់ការព្យាកររបស់ខ្លួនពីការកើនឡើងសេដ្ឋកិច្ចពិភពលោកមកត្រឹម២,៦ភាគរយក្នុងឆ្នាំ២០១២ និងព្រមានពីវិបត្តិប្រាក់បំណុលតំបន់ប្រើប្រាស់ប្រាក់អឺរ៉ូ ដែលអាចនាំឱ្យអន្តរាយដល់ពិភពលោកទាំងមូល។ អង្គការសហប្រជាជាតិនិយាយថា សេដ្ឋកិច្ចពិភពលោកកំពុងដើរទៅមុខប្រៀបបីដូចជាមនុស្សស្រវឹង ក្នុងពេលប្រទេសមហាអំណាចសេដ្ឋកិច្ចពិភពលោកមួយចំនួនកំពុងឈរនៅមាត់រណ្តៅធ្លាក់ចុះទៀត។ អង្គការសហប្រជាជាតិចេញសេចក្តីព្រមានបន្ទាប់ពី IMF និយាយថាខ្លួនក៏នឹងទម្លាក់ចុះនូវអត្រានៃការព្យាករការកើនឡើងនៃសេដ្ឋកិច្ចពិភពលោកទាំងមូល។
បន្ទាប់ពីកើនឡើង៤ភាគរយក្នុងឆ្នាំ២០១០ អង្គការសហប្រជាជាតិបានព្យាករការកើនឡើងសេដ្ឋកិច្ចពិភពលោកត្រឹមតែ២,៦ភាគរយក្នុងឆ្នាំ២០១២ និងកើនឡើងដល់៣,២ភាគរយក្នុងឆ្នាំ២០១៣។ កាលពីដើមឆ្នាំនេះ អ្នកសេដ្ឋកិច្ច អង្គការសហប្រជាជាតិនិយាយថា សេដ្ឋកិច្ចពិភពលោកនឹងកើនឡើងដល់៣,៦ភាគរយនៅឆ្នាំក្រោយ។ តាមរបាយការណ៍នៃស្ថានភាពសេដ្ឋកិច្ចពិភពលោករបស់អង្គការសហប្រជាជាតិនិយាយថា ទោះជាយ៉ាងណា ការព្យាករគឺជាការដាក់ កំហិតមួយដើម្បីការពារវិបត្តិប្រាក់បំណុលក្នុងប្រទេសប្រើប្រាស់ប្រាក់អឺរ៉ូ និងបញ្ឈប់ដំណើរទៅមុខថែមទៀតនៃការរឹតបន្តឹងច្បាប់ពន្ធក្នុងប្រទេសអភិវឌ្ឍន៍។
ប្រទេសកំពុងអភិវឌ្ឍន៍ដែលដឹកនាំដោយ ប្រទេសចិន ប្រេស៊ីល និងឥណ្ឌា ត្រូវបានគេរំពឹងថា នឹងបន្តអូសសេដ្ឋកិច្ចពិភពលោកទៅមុខ ជាមួយអត្រាកំណើនជាមធ្យម៥,៤ភាគរយក្នុងឆ្នាំ២០១២ និងកើនឡើងដល់៥,៨ភាគរយក្នុងឆ្នាំ២០១៣។ អង្គការសហប្រជាជាតិបានទម្លាក់ការព្យាករនៃកំណើនសេដ្ឋកិច្ចពិភពលោកដោយសារការធ្លាក់ចុះចំពោះការព្យាកររបស់ប្រទេសធំ និងតំបន់មួយចំនួនផងដែរដូចជា សហរដ្ឋអាមេរិកទទួលបានការព្យាករមកត្រឹមតែ១,៣ភាគរយ ចំណែកប្រទេសជប៉ុនកើនឡើង១,៥ភាគរយ សហគមន៍អឺរ៉ុបដែលមានប្រទេសចំនួន២៧កើនឡើងតែ០,៥ភាគរយ ឯប្រទេសចិនកើនឡើង៨,៨ភាគរយ ប្រទេសឥណ្ឌាកើនឡើង៧,៧ភាគរយ ចំណែកប្រទេសអាហ្វ្រិកខាងត្បូងកើនឡើង៣,៧ភាគរយ។ ដោយឡែកនៅតំបន់អាមេរិកឡាទីន ដូចជាប្រទេសប្រេស៊ីលត្រូវអង្គការសហប្រជាជាតិព្យាករថា កើនឡើងត្រឹមតែ៣,៧ភាគរយ។
តាមការព្យាករក៏បានលើកឡើងដែរថា ភាពបរាជ័យក្នុងការកំណត់នយោបាយជាពិសេសសំដៅទៅលើសហរដ្ឋអាមេរិក ទ្វីបអឺរ៉ុប ក្នុងការទប់ទល់នឹងវិបត្តិការងារនិងការការពារប្រាក់បំណុល និងភាគរង្គោះរង្គើនៃវិស័យហិរញ្ញវត្ថុ បានបន្ថែមស្ថានភាពគ្រោះថ្នាក់នៃសេដ្ឋកិច្ចពិភពលោក។ វិបត្តិប្រាក់បំណុលក្នុងទ្វីបអឺរ៉ុបគឺជាកត្តាគ្រោះថ្នាក់ និងជះឥទ្ធិពលដល់ការធ្លាក់ចុះសេដ្ឋកិច្ចពិភពលោក ស្របពេលដែលសហរដ្ឋអាមេរិកក៏ត្រូវទទួលរងរបួសពីភាពអត់ការងារធ្វើក្នុងប្រទេស និងភាពរង្គោះរង្គើនៃអតិថិជននិងកិច្ចការជំនួញ។
អង្គការសហប្រជាជាតិព្រមានថា ដោយសារបញ្ហាសេដ្ឋកិច្ចអាមេរិកនិងអឺរ៉ុបនឹងអាចឆ្លងគ្នាទៅវិញទៅមកនិងអាចពង្រីកខ្លួនក្លាយជាបញ្ហានៃការដាំក្បាលចុះនៃសេដ្ឋកិច្ចពិភពលោកជាថ្មី៕
ចែករំលែកព័តមាននេះ