ខេត្តព្រះសីហនុ ៖ ភ្លើងសាំងបានឆាបឆេះរោលរាលលើបុរសម្នាក់ស្ទើរខ្លោចខ្នង ដោយសារត្រូវស្ត្រីម្នាក់គប់សាំងដែលដាក់ក្នុងដបទឹកបរិសុទ្ធ ។ នេះជាហេតុការណ៍ដែលបានកើតឡើងលើគូស្នេហ៍អ្នកចម្រៀងប្រុសស្រីតាមពិធីមង្គលការហើយឈានដល់ផ្លូវបំបែក ។ ជាការពិតណាស់ ពេលដែលស្រឡាញ់អ្វីក៏ស្រស់ស្រាយអ្វីក៏ផូរផង់ និងផ្អែមល្ហែមដែរ តែបើការស្អប់ចូលមកជំនួសហើយមានតែភាពប្រៃល្វីងជូរចត់ប៉ុណ្ណោះ ប៉ុន្តែការដែលមិនគប្បីនោះគឺបើបានជាសម្រេចចិត្តថាចែកផ្លូវគ្នាដើរហើយនោះ តើមានន័យអ្វីដែលបង្កនូវភ្លើងទោសៈមោហៈមិនខុសពីពាក្យថា ខឹងខុស ខឹងខូច ខឹងខាតនោះទេ។ ដូចជារឿងរ៉ាវខាងលើដែលបុរសជាប្តីបានរងគ្រោះដោយភ្លើងសាំងឆាបឆេះធ្ងន់ធ្ងរ ឯស្ត្រីជាប្រពន្ធក្លាយជាអ្នកទោស ។
តាមសេចក្តីរាយការណ៍ព័ត៌មានបានឱ្យដឹងថា ស្ត្រីជាប្រពន្ធត្រូវបានកម្លាំងប៉ូលិសស្រុកព្រៃនប់ចាប់ឃាត់ខ្លួននាំមកកាន់អធិការដ្ឋានស្រុក បន្ទាប់ពីស្ត្រីរូបនេះបានយកដែកកេះដុតសាំងក្នុងដបទឹកបរិសុទ្ធដែលខ្លួនកំពុងកាន់រួចគ្រវាសទៅលើបុរសជាប្តីពីក្រោយបណ្តាលឱ្យឆាបឆេះឡើង ។ ហេតុការណ៍នេះបានកើតឡើងកាលពីថ្ងៃទី២ ធ្នូ ២០១១ វេលាម៉ោង៧និង៤៥នាទីព្រឹក ក្នុងភូមិវាលមាស ឃុំវាលរេញ ស្រុកព្រៃនប់ ខាងក្រោយសាលាឃុំ ។
លោកវរសេនីយ៍ត្រីហ៊ឹង ចាន់រិទ្ធ អធិការនគរបាលស្រុកព្រៃនប់បានឱ្យដឹងថា ស្ត្រីដែលត្រូវឃាត់ខ្លួននេះឈ្មោះសំ សូរិញ៉ុល ហៅស្រស់ និមល អាយុ២៩ឆ្នាំ មានទីលំនៅភូមិបឹងវែង ឃុំវាលរេញ ស្រុកព្រៃនប់ បានប្រើដែកកេះដុតសាំងក្នុងដបទឹកបរិសុទ្ធដែលកាន់នៅនឹងដៃបណ្តាលឱ្យឆាបឆេះ រួចគ្រវាសទៅលើប្តីឈ្មោះអ៊ុំ សុជាតិ អាយុ២៥ឆ្នាំ ដែលកំពុងឈរក្បែរ បណ្តាលឱ្យឆេះខ្លោចខ្លួន ។
តាមស្ត្រីជាប្រពន្ធបានឆ្លើយថា នាងនិងប្តីបានរៀបការជាប្តីប្រពន្ធរហូតមកដល់ពេលនេះមានកូនប្រុសមួយអាយុបីឆ្នាំហើយ ។ ក្នុងរយៈពេលរស់នៅជាមួយគ្នាក៏មានបញ្ហាទំនាស់ក្នុងគ្រួសារនិងធ្លាប់ចែកផ្លូវគ្នាម្តងរួចមកហើយ តែបន្ទាប់មកក៏ត្រូវគ្នាវិញ តែមិនបានប៉ុន្មានផងក៏មានទំនាស់នឹងគ្នាទៀត ព្រោះតែរឿងជំពាក់ប្រាក់គេហើយនិយាយពិភាក្សាគ្នាមិនត្រូវ។ មុនពេលកើតហេតុ ខ្លួនបានទិញសាំងកន្លះលីត្រច្រកក្នុងដបទឹកបរិសុទ្ធ ក្នុងគោលបំណងទៅផ្ទះម្តាយក្មេកដើម្បីជួបប្តីនិយាយគ្នាឱ្យជួយគិតគូរសងលុយគេ ហើយបើប្តីមិនជួយសងទេគិតយកតែរួចខ្លួននាងនឹងយកសាំងដែលទិញរួចជាស្រេចនេះចាក់ដុតខ្លួនឯងនៅផ្ទះម្តាយក្មេកនោះឱ្យស្លាប់តែម្តង ។
ស្ត្រីជាប្រពន្ធនិយាយទៀតថា ការនិយាយចរចាគ្នានោះនៅតែមិនចុះសម្រុងគ្នារហូតបបួលគ្នាមកសាលាឃុំវាលរេញ ដើម្បីលែងលះឱ្យឃុំដឹងឮ ។ ពេលមកដល់សាលាឃុំមិនទាន់មានមន្ត្រីឃុំណាម្នាក់មកធ្វើការនៅឡើយទេព្រោះនៅព្រឹកពេក ហើយពេលនោះនាងនិងប្តីក៏ចាប់ផ្តើមប្រកែកគ្នាទៀតរហូតជេរប្រមាថថា នាងជាស្រីភ្លើងពណ៌និងដៀលត្មះជាច្រើនទៀត ។ ដោយសារពាក្យសម្តី «ស្រីភ្លើងពណ៌» នេះហើយទើបជំរុញឱ្យនាងកេះដែកកេះឆួលមាត់ដបសាំងបណ្តាលឱ្យឆេះរូចគ្រវាសទៅលើប្តីដែលកំពុងឈរបែរខ្នងបណ្តាលឱ្យឆាបឆេះខ្លួនតែម្តង ។ ស្ត្រីរូបនេះនិយាយទៀតថា បន្ទាប់ពីឃើញឆេះដូច្នេះនាងក៏ស្ទុះទៅអោបប្តីជួយពន្លត់ភ្លើង លុះភ្លើងរលត់ហើយក៏ដើរចេញពីប្តីសំដៅមកផ្លូវជាតិ។
លោកស្មៀនឃុំវាលរេញដែលបានទៅដល់ក្រោយពេលកើតហេតុបន្តិចប្រាប់កោះសន្តិភាពតាមទូរស័ព្ទថា ក្រោយពីកើតហេតុគាត់បានឃើញស្ត្រីជាប្រពន្ធដើរចេញពីប្តីចម្ងាយប្រហែល២០០ម៉ែត្រ ។ ពេលដែលគាត់ជិះម៉ូតូជួបគ្នានោះស្ត្រីជាប្រពន្ធប្រាប់គាត់ថា «ចាប់ខ្ញុំដាក់គុកទៅ ព្រោះខ្ញុំបានដុតប្តី» លុះពេលលោកជិះម៉ូតូមកហួសក៏ឃើញបុរសជាប្តីអង្គុយញាក់តត្រុនម្នាក់ឯង ទើបដឹកទៅកាន់មណ្ឌលសុខភាពវាលរេញ ហើយប្រាប់ទៅប៉ូលិស ក៏មានការឃាត់ខ្លួនស្ត្រីជាភរិយា ។ ដោយសារស្ថានភាពរលាកខ្នងធ្ងន់ធ្ងរ បុរសជាប្តីត្រូវបានដឹកបន្តទៅកាន់មន្ទីរពេទ្យចំការទៀត៕
ចែករំលែកព័តមាននេះ