រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍បញ្ជាក់ថា ទិសដៅជាយុទ្ធសាស្ត្ររបស់រាជរដ្ឋាភិបាលបានកំណត់យកឆ្នាំ២០១៥ ត្រូវផលិតស្រូវអោយបានច្រើនជាង៤លានតោន ក្នុងនោះបរិមាណអង្ករសំរាប់នាំចេញសំរេចអោយបានជាង១លានតោន និងធ្វើអោយអង្ករកម្ពុជាត្រូវបានគេទទួលស្គាល់ជាអន្តរជាតិ ។ សម្តេចតេជោនាយករដ្ឋមន្ត្រីមានប្រសាសន៍បញ្ជាក់បែបនេះកាលពីព្រឹកថ្ងៃទី១៧ សីហា ឆ្នាំ២០១០ នៅវិមានរដ្ឋាភិបាលក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងកិច្ចប្រជុំផ្សព្វផ្សាយ “ឯកសារគោលនយោបាយស្តីពីការជំរុញផលិតកម្មស្រូវ និងការនាំចេញអង្ករ” សំដៅធានាក្តាប់អោយជាប់នូវកាលានុវត្តភាពដ៏កម្រមួយទៀតសំរាប់ការអភិវឌ្ឍកម្ពុជានៅក្នុងដំណាក់កាលក្រោយវិបត្តិហិរញ្ញវត្ថុ និងសេដ្ឋកិច្ចសាកល។
សម្តេចតេជោនាយករដ្ឋមន្ត្រីមានប្រសាសន៍ថា ក្នុងការអនុវត្តគំនិតផ្តួចផ្តើមនេះ រាជរដ្ឋាភិបាលនឹងគោរពប្រតិបត្តិគោលការណ៍សំខាន់ៗមួយចំនួនដូចតទៅ៖
១-ប្រកាន់យកគោលការណ៍ទីផ្សារដោយរក្សាការប្រកួតប្រជែងក្នុងគោលដៅជំរុញការនាំចេញអោយមានប្រសិទ្ធភាពខ្ពស់ផង ធានាផលប្រយោជន៍របស់កសិករតាមរយៈការបង្កើនប្រាក់ចំណូល និងការកាត់បន្ថយភាពក្រីក្ររបស់ពួកគាត់ផង និងរក្សាបាននូវសន្តិសុខស្បៀង ។
២-លើកទឹកចិត្ត និងគាំទ្រការចូលរួមពីសំណាក់កសិករ និងសហគមន៍កសិករ និងការពារផលប្រយោជន៍របស់ពួកគាត់ តាមរយៈការបង្កើតឡើងនូវបរិស្ថានអំណោយផល និងភាពងាយស្រួលសំរាប់ការបង្កើនផលិតកម្ម និងការផ្គត់ផ្គង់ស្រូវ-អង្ករប្រកបដោយគុណភាព ។
៣-ជំរុញកិច្ចសហប្រតិបត្តិការ និងភាពជាដៃគូរវាងរាជរដ្ឋាភិបាល និងដៃគូអភិវឌ្ឍន៍សង្គមស៊ីវិល ព្រមទាំងវិស័យឯកជនដូចជាផលិតករស្រូវ-អាជីវករម៉ាស៊ីនកិនស្រូវពាណិជ្ជករ និងអ្នកដឹកជញ្ជូនក្នុងការអនុវត្តគោលនយោបានជំរុញផលិតកម្មស្រូវ និងការនាំចេញអង្ករ ។
ទន្ទឹមនេះសម្តេចតេជោនាយករដ្ឋមន្ត្រីគូសបញ្ជាក់ថា ភាពចាំបាច់ក្នុងការជំរុញអនុវត្តវិធានការរយៈពេលបន្ទាន់ និងផ្តល់ផលភ្លាមៗដោយមិនបង្អែបង្អង់សំដៅធ្វើអោយសំរេចបានជាលទ្ធផលជាក់ស្តែងនៅក្នុងឆ្នាំ២០១០-២០១១នេះ ។ ក្នុងនោះការយកចិត្តុទុកដាក់ពិសេសត្រូវប្រមូលផ្តុំលើវិធានការជាគន្លឹះមួយចំនួន ៖
-ការបង្កើនផលិតភាពក្នុងការផលិតស្រូវ ដោយប្រើប្រាស់ពូជដែលផ្តល់ទិន្នផលខ្ពស់ ហើយឆ្លើយតបទៅនឹងតំរូវការទីផ្សារ និងការធ្វើស្រែតាមក្បួនខ្នាតបច្ចេកទេសត្រឹមត្រូវ ។
-ការលើកស្ទួយការចូលរួមរបស់វិស័យឯកជន ក្នុងការវិនិយោគកែច្នៃ និងនាំចេញអង្ករតាមរយៈការជំរុញអនុវត្តច្បាប់វិនិយោគច្បាប់ស្តីពីការកែតំរូវនៃច្បាប់ហិរញ្ញវត្ថុ ។
-ការជំរុញផ្តល់ហិរញ្ញប្បទានសំរាប់ការប្រមូលទិញ និងកែច្នៃស្រូវតាមរយៈការរៀបចំ និងការងារដាក់អោយប្រើប្រាស់យន្តការហិរញ្ញប្បទានចាំបាច់នានាដោយរួមបញ្ចូលទាំងយន្តការចែករំលែកហានិភ័យ និងការផ្តល់ឥណទានកម្ចីដែលមានការធានាពីរដ្ឋផងដែរ ដើម្បីអោយសហគមន៍កសិកម្ម រោងម៉ាស៊ីនកិនស្រូវ និងក្រុមហ៊ុននាំចេញ មានលទ្ធភាពខ្ចីឥណទានពីធនាគារពាណិជ្ជ ។
-ជំរុញការងារសំរបសំរួលពាណិជ្ជកម្ម និងការកាត់បន្ថយចំណាយក្រៅផ្លូវការ រួមទាំងការលុបបំបាត់កុងត្រូវជជុះផងដែរ ។
-ការដោះស្រាយបញ្ហាស្តង់ដាចំណាត់ថ្នាក់ និងគុណភាព អោយស្របតាមស្តង់ដាអន្តរជាតិ ដោយរួមបញ្ចូលនូវការពង្រឹងសមត្ថភាពស្ថាប័នជំនាញរបស់រដ្ឋាភិបាលក្នុងការកំណត់ស្តង់ដាគុណភាពអង្ករនៅកម្ពុជា និងការបង្កើតប្រព័ន្ធវិញ្ញាបនកម្មឯករាជ្យ ឬលើកទឹកចិត្តដល់ស្ថាប័នវិញ្ញាបនកម្មឯកជនដែលមានកេរ្តិ៍ឈ្មោះជាអន្តរជាតិ ដើម្បីចេញវិញ្ញាបនបត្របញ្ជាក់គុណភាព និងចំណាត់ថ្នាក់តាមស្តង់ដាមួយដែលអនុលោមទៅតាមការតំរូវរបស់ប្រទេសនាំចូល ។
-ការបើកយុទ្ធនាការការទូត ដើម្បីស្វែងរកឱកាសនាំចេញទៅកាន់ទីផ្សារតំបន់ និងពិភពលោក ពិសេសតាមរយៈការរៀបចំដំណើរទស្សនកិច្ចនៃគណៈប្រតិភូចំរុះរវាងតំណាងស្ថាប័នរដ្ឋ និងវិស័យឯកជនទៅកាន់គោលដៅនៃទីផ្សារអង្ករសំខាន់ៗ ។
រាជរដ្ឋាភិបាលមានបំណងពង្រឹងតួនាទីរបស់សមាគមម៉ាស៊ីនកិនស្រូវ ដោយផ្តល់ប្រព្រឹត្តិកម្មពិសេសជូនដល់សមាគមនេះដូចគ្នានឹងសមាគមក្នុងវិស័យកាត់ដេរដែរ ក្នុងនោះរួមមានការលើកដម្កើងសារសំខាន់នៃតួនាទីរបស់សមាគមនេះ ក្នុងការស្វែងរកទីផ្សារ និងការការពារផលប្រយោជន៍កសិករ ព្រមទាំងការលើកកំពស់សមត្ថភាពកែច្នៃស្រូវដើម្បីបង្កើនតំលៃបន្ថែមពីលើការនាំចេញអង្ករកម្ពុជា ។ ប៉ុន្តែដើម្បីបំពេញតួនាទីនេះស្របតាមការរំពឹងចង់បាន សមាគមខ្លួនឯងក៏ត្រូវមានកាតព្វកិច្ចផ្តោតការយកចិត្តទុកដាក់ ជាពិសេសទៅលើការកសាងសមត្ថភាពរបស់ខ្លួនផងដែរ ដើម្បីអាចដើរតួជាដៃគូជាមួយរាជរដ្ឋាភិបាល និងជាតំណាងអោយសហគមន៍អ្នកនាំចេញអង្ករ ក៏ដូចជាតំណាងអោយប្រជាកសិករប្រកបដោយប្រសិទ្ធភាពខ្ពស់ ។
សម្តេចតេជោនាយករដ្ឋមន្ត្រីគូសបញ្ជាក់ថា ឯកសារគោលនយោបាយដែលរាជរដ្ឋាភិបាលបានដាក់ចេញមកនេះ មានកំណត់យ៉ាងច្បាស់លាស់រួចហើយ នូវយន្តការស្ថាប័នសំរាប់ដឹកនាំសំរបសំរួលការអនុវត្ត និងតាមដានការអនុវត្ត ។ យ៉ាងណាក៏ដោយ ការឆ្លុះបញ្ចាំងត្រឡប់មកវិញពីប្រតិបត្តិករវិស័យឯកជន ដែលជាអ្នកទទួលផលផ្ទាល់ពីការអនុវត្តគោលនយោបាយនេះពិតជាសំខាន់ខ្លាំងណាស់សំរាប់ការវាយតំលៃអំពីភាពត្រឹមត្រូវ និងជោគជ័យនៃការអនុវត្តគោលនយោបាននេះ ។
រាជរដ្ឋាភិបាលអំពាវនាវអោយដៃគូអភិវឌ្ឍន៍ដែលមានការពាក់ព័ន្ធទាំងអស់ ទាំងដៃគូសហប្រតិបត្តិការអភិវឌ្ឍន៍ ទាំងដៃគូអង្គការមិនមែនរដ្ឋាភិបាល សូមចូលរួមផ្តល់ការគាំទ្រ ចាំបាច់នានាគ្រប់ផ្នែក ទាំងផ្នែកហិរញ្ញវត្ថុ សំភារ និងបច្ចេកទេសដល់ក្រសួង ស្ថាប័ននៃរាជរដ្ឋាភិបាល ប្រតិបត្តិករវិស័យឯកជន និងប្រជាកសិករកម្ពុជា ដើម្បីធានាជោគជ័យក្នុងការអនុវត្តគោលនយោបាយដ៏មានសារសំខាន់នេះ ដែលនឹងចូលរួមផ្តល់ជាវិភាគទានមិនអាចកាត់់ថ្លៃបាន ដល់ការកាត់បន្ថយភាពក្រីក្រ ការលើកស្ទួយកំរិតជីវភាពរស់នៅរបស់ប្រជាជន និងដល់ការអភិវឌ្ឍកម្ពុជាប្រកបដោយចីរភាពនិយាយជារួម ។
ក្នុងសុន្ទរកថា លោកឧបនាយករដ្ឋមន្ត្រី គាតឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុមានប្រសាសន៍ថា “ឯកសារគោលនយោបាយស្តីពីការជំរុញផលិតកម្មស្រូវ និងការនាំចេញអង្ករ” នេះមានបំណងជំរុញការអភិវឌ្ឍវិស័យកសិកម្មក្នុងសន្ទុះ និងទំហំថ្មីមួយដើម្បីពង្រីក និងពង្រឹងមូលដ្ឋានកំណើនសេដ្ឋកិច្ចផង ព្រមទាំងបង្កើនល្បឿននៃការកាត់បន្ថយភាពក្រីក្រ និងលើកតម្កើងកំរិតជីវភាពរស់នៅរបស់ប្រជាជនផង ។
លោកឧបនាយករដ្ឋមន្ត្រីមានប្រសាសន៍បន្តថា គោលដៅចំបងនៃឯកសារគោលនយោបាយនេះ គឺសំដៅជំរុញផលិតកម្ម និងការនាំចេញអង្ករមួយមុខសិនប៉ុណ្ណោះ ។ នេះគឺជាជំហានដំបូងដ៏សំខាន់សំរាប់ជំរុញផលិតកម្ម និងការនាំចេញកសិផលដទៃទៀត ។ រាជរដ្ឋាភិបាលរំពឹងថា ជោគជ័យនៃការអនុវត្តគោលនយោបានជំរុញផលិតកម្មស្រូវ និងការនាំចេញអង្ករនេះ នឹងក្លាយជាសារនយោបាយមួយដ៏ខ្លាំងក្លាដែលលើកទឹកចិត្ត និងបើកផ្លូវសំរាប់ជំរុញការផលិត និងការនាំចេញកសិផលដទៃទៀតរួមមាន កៅស៊ូ ស្វាយចន្ទី សណ្តែកសៀង ដោយមិនទាន់រាប់បញ្ចូលនូវអនុវិស័យកសិកម្មដទៃទៀតមានវារីវប្បកម្មជាដើមផង ដែលទាំងអស់នោះគឺជាចក្ខុវិស័យវែងឆ្ងាយដ៏មុតថ្លា និងភ្លឺស្វាងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សំរាប់ការអភិវឌ្ឍសេដ្ឋកិច្ចជាតិ ។
លោកឧបនាយករដ្ឋមន្ត្រី គាត ឈន់ គូសបញ្ជាក់ថា គោលដៅជំរុញផលិតកម្មស្រូវ និងការនាំចេញអង្ករជាស្នូលនេះ ទាមទារអោយតួអង្គទាំងអស់នៃខ្សែសង្វាក់តំលៃតាំងពីការជ្រើសរើសពូជស្រូវដល់ការនាំចេញផេះអង្កាមជាដើម និងចង្កោមសកម្មភាព មានការបង្ហូរទឹកចូលស្រែ ការសាងសង់ និងថែទាំផ្លូវជនបទ និងផ្លូវជាតិ ដល់ការបំបាត់កុងត្រូលជជុះជាដើម ដូចមាននៅក្នុងតារាងឧបសម្ព័ន្ធ ទី២នៃឯកសារគោលនយោបាយស្តីពីការជំរុញផលិតកម្មស្រូវ និងការនាំចេញត្រូវតែស៊ីសង្វាក់គ្នា ៕
ចែករំលែកព័តមាននេះ