រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់រដ្ឋសភាពីថ្ងៃទី៣០ វិច្ឆិកា ឆ្នាំ២០១១ ដែលកោះសន្តិភាពទទួលបានឱ្យដឹងថា គណបក្សប្រជាជនកម្ពុជា នឹងរៀបចំមីទ្ទិញអបអរសាទរខួបអនុស្សាវរីយ៍លើកទី៣៣ ទិវាកំណើតរណសិរ្សសាមគ្គីអភិវឌ្ឍមាតុភូមិកម្ពុជា(២/១២/១៩៧៨-២/១២/២០១២)ក្រោមអធិបតីភាពសម្តេចហេង សំរិន ប្រធាន រដ្ឋសភា និងជាប្រធានរណសិរ្សសាមគ្គីអភិវឌ្ឍ មាតុភូមិកម្ពុជា។ ពិធីនេះនឹងប្រព្រឹត្តទៅនៅភូមិជើងឃ្លូ ឃុំ២ធ្នូ ស្រុកស្នូល ខេត្តក្រចេះដែលមានសមាជិកសមាជិកាចូលរួមប្រមាណ១៥.០០០នាក់តាមការគ្រោងទុក។
នៅក្នុងឱកាសនោះនឹងមានពិធីបញ្ចុះបឋមសិលាកសាងស្តូបអនុស្សាវរីយ៍រណសិរ្សសាមគ្គីអភិវឌ្ឍមាតុភូមិកម្ពុជា ដោយសម្តេចហេង សំរិន។ តាមកម្មវិធីគ្រោងទុកនៅក្នុងកម្មវិធីនោះនឹងមានការអញ្ជើញចូលរួមពីសំណាក់លោកហ្វីញ ដាម ប្រធានគណៈកម្មាធិការមជ្ឈិមរណសិរ្សមាតុភូមិវៀតណាមនិងជាសមាជិកការិយាល័យនយោបាយបក្សកុម្មុយនិស្តវៀតណាម។
លោកផាញ់ដូងចិត្តវង្សាប្រធានគណៈកម្មាធិការមជ្ឈិមរណសិរ្សកសាងជាតិឡាវនិងជាសមាជិកគណៈកម្មាធិការកណ្តាលបក្សប្រជាជនបដិវត្តន៍ឡាវនិងមានជូនកន្រ្តកផ្កាដល់អង្គមីទ្ទិញផង។
យោងតាមមន្រ្តីខេត្តក្រចេះបានឱ្យកោះសន្តិភាពដឹងតាមទូរស័ព្ទកាលពីថ្ងៃទី៣០ វិច្ឆិកា ឆ្នាំ២០១១ថា ការសាងសង់ស្តូបនេះគ្រោងចំណាយប្រាក់ប្រមាណជាង៣លានដុល្លារអាមេរិកនៅលើផ្ទៃដីទំហំជាង២៤ហិកតា និងប្រើរយៈពេលប្រមាណ២ឆ្នាំ។ ថវិកាសម្រាប់ការសាងសង់នេះបានមកពីការចំណាយធនធានផ្ទាល់របស់សប្បុរសជននិងសមាជិករណសិរ្សនៅទូទាំងប្រទេសចូលរួមតាមការស្ម័គ្រចិត្ត។
ឃុំស្នូលជាកន្លែងនៃការកសាងកម្លាំងរបស់រណសិរ្សសាមគ្គីជាតិកម្ពុជាកាលពីឆ្នាំ១៩៧៨ដឹកនាំដោយសម្តេចហេង សំរិន ដើម្បីរំដោះឲប្រទេសជាតិពីរបបប៉ុលពត ៕
ចែករំលែកព័តមាននេះ