ខេត្តស្វាយរៀង ៖ អំណោយជាប្រាក់របស់លោកជំទាវ នាង សេដ្ឋា ជៀងអំ រួមជាមួយនឹងសប្បុរសជនចំនួន១៤០ដុល្លារ និង១០ម៉ឺនរៀល ត្រូវបាននាំយកទៅប្រគល់ជូនដល់មន្ដ្រីរាជការចំនួន២រូបដែលមានជំងឺលើសឈាម សរសៃទាញវៀចមុខ វៀចមាត់ និងកំពុងសម្រាកព្យាបាលនៅក្នុងមន្ទីរពេទ្យខេត្ដ។
មន្ដ្រីរាជការទាំងពីររូបដែលបានទទួលអំណោយពីសប្បុរសជននោះ គឺលោកសោម វណ្ណៈ អាយុ៤៥ឆាំ្ន ជាមន្ដ្រីបម្រើការនៅក្នុងមន្ទីរព័ត៌មានខេត្ដ មានជំងឺលើសឈាម ធ្វើទុក្ខបណ្ដាលឱ្យវៀចមុខវៀចមាត់ ខណៈពេលរូបលោកកំពុងតែទទួលទានអាហារជាមួយក្រុមគ្រួសារកាលពីវេលាម៉ោង៦លា្ងចថ្ងៃទី២៤ វិច្ឆិកា ហើយត្រូវក្រុមគ្រួសារនាំយកទៅសង្គ្រោះនៅមន្ទីរពេទ្យ។ ក្រោយពីទទួលបានព័ត៌មាននោះមន្ដ្រីរាជការទាំងអស់ក្នុងសា្ថប័នមន្ទីរព័ត៌មានខេត្ដបានអញ្ជើញទៅសាកសួរសុខទុក្ខដល់មន្ទីរពេទ្យ និងឧបត្ថម្ភថវិកាចំនួន៦៥ដុលា្លរ ហើយបន្ថែមលើនេះទៅទៀតលោកព្រំ រ៉ាវុធ ប្រធានក្រុមហ៊ុនព្រំ រ៉ាវុធ បានឧបត្ថម្ភចំនួន១០ម៉ឺនរៀល និងលោកជំទាវ នាង សេដ្ឋា ជៀងអំ ជួយឧបត្ថម្ភថវិកាចំនួន៧០ដុលា្លរ។
ដោយឡែកលោកនង សាផាត អាយុ៦០ឆាំ្ន ជាមន្ដ្រីសាលាខេត្ដចូលនិវត្ដន៍ មានជំងឺលើសឈាមធ្ងន់ធ្ងររហូតវៀចមុខ វៀចមាត់ រួញអណ្ដាត មិនអាចនិយាយបានរយៈពេល២ឆាំ្នមកហើយនោះលោកជំទាវ នាង សេដ្ឋា ជៀងអំ ឧបត្ថម្ភថវិកាចំនួន៧០ដុល្លារផងដែរ។ បច្ចុប្បន្នលោកកំពុងស្ថិតនៅក្រោមការព្យាបាល និងមើលថែពីកូនចៅនៅផ្ទះ។
តាមរយៈសារព័ត៌មានកោះសន្ដិភាពមន្ដ្រីរាជការអង្គភាពមន្ទីរព័ត៌មានខេត្ដអំពាវនាវដល់ ឯកឧត្ដម លោកជំទាវ និងសប្បុរសជនទាំងអស់ដែលលោកសោម វណ្ណៈ ធា្លប់ធ្វើការជាមួយក៏ដូចជាធា្លប់ផ្សព្វផ្សាយព័ត៌មានជូនកន្លងមក សូមជួយឧបត្ថម្ភដល់លោកសោម វណ្ណៈ ផងដើម្បីឱ្យលោកមានលទ្ធភាពអាចព្យាបាលជំងឺបានជាសះស្បើយ និងឆាប់បានចូលបម្រើការងារក្នុងអង្គភាពមន្ទីរព័ត៌មានវិញ៕
ចែករំលែកព័តមាននេះ