រាជធានីភ្នំពេញ ៖ ក្នុងជំនួបពិភាក្សាការងារជាមួយលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នារសៀលថ្ងៃទី១៤ ខែមីនា នៅទីស្តីការក្រសួង លោកជំទាវ Katja Christina Nordgaard ឯកអគ្គរាជទូតន័រវែស ប្រចាំនៅកម្ពុជាដែលមាននិវេសនដ្ឋាននៅទីក្រុងបាងកក មានប្រសាសន៍សម្តែងនូវការរីករាយ ដែលលោកជំទាវត្រូវបានតែងតាំងជាឯកអគ្គរាជទូតន័រវែសប្រចាំនៅព្រះរាជាណាចក្រកម្ពុជា ។
លោកជំទាវជំរាបលោកឧបនាយករដ្ឋមន្ត្រីថា ក្នុងអំឡុងពេលបំពេញបេសកកម្មការទូត លោកជំទាវនឹងខិតខំធ្វើឱ្យទំនាក់ទំនងកិច្ចសហប្រតិបត្តិការរវាងប្រទេសទាំងពីរកាន់តែមានការរីកចម្រើននិងរឹងមាំបន្ថែមទៀត ។ លោកជំទាវបានបញ្ជាក់ទៀតថា ន័រវែសនឹងបន្តកិច្ចសហប្រតិបត្តិការលើវិស័យដែលន័រវែសបានសន្យាជួយដល់កម្ពុជាកន្លងមក ជាពិសេសលើវិស័យដោះមីន ការអភិវឌ្ឍធនធានមនុស្ស ការអភិវឌ្ឍជនបទ សង្គមកិច្ច និងសុខាភិបាល ។
ជាការឆ្លើយតប លោកឧបនាយករដ្ឋមន្ត្រីហោ ណាំហុង បានស្វាគមន៍និងអបអរសាទរដែលលោកជំទាវត្រូវបានតែងតាំងជាឯកអគ្គរាជទូតប្រចាំនៅព្រះរាជាណាចក្រកម្ពុជា ហើយលោកនឹងសហការធ្វើឱ្យបេសកកម្មការទូតរបស់លោកជំទាវទទួលបានជោគជ័យនៅព្រះរាជាណាចក្រកម្ពុជា ។ ថ្វិដ្បិតតែលោកជំទាវមាននិវេសនដ្ឋាននៅក្រុងបាងកកក្តី តែលោកឧបនាយករដ្ឋមន្ត្រីសូមឱ្យលោកជំទាវឧស្សាហ៍មកប្រទេសកម្ពុជាឱ្យមើលឃើញសភាពការណ៍ជាក់ស្តែង ដើម្បីធ្វើយ៉ាងណាឱ្យប្រទេសទាំងពីរមានកិច្ចសហប្រតិបត្តិការល្អកាន់តែខ្លាំងក្លាថែមទៀត ។
ទាក់ទងទៅនឹងបញ្ហាជម្លោះរវាងកម្ពុជា-ថៃ លោកជំទាវឯកអគ្គរាជទូតន័រវែស ក៏ចង់ដឹងអំពីបញ្ហានេះដែរ ។ ក្នុងឱកាសនោះ លោកឧបនាយករដ្ឋមន្ត្រីហោ ណាំហុង បានជម្រាបជូនលោកជំទាវឯកអគ្គរាជទូតថា តាមពិតបញ្ហាព្រំដែនកម្ពុជា-ថៃ មានលក្ខណៈងាយស្រួលជាងបញ្ហាព្រំដែនជាមួយឡាវ ជាមួយវៀតណាមទៅទៀត ព្រោះព្រំដែនកម្ពុជា-ថៃមានលក្ខណៈងាយស្រួល មានឯកសារគ្រប់គ្រាន់តាំងពីអនុសញ្ញាឆ្នាំ១៩០៤ សន្ធិសញ្ញា១៩០៧ ព្រមទាំងមានផែនទីច្បាស់លាស់ ។ អ្វីដែលលំបាកគឺថៃយកផែនទីឯកតោភាគី ។
ទន្ទឹមនឹងនេះ លោកឧបនាយករដ្ឋមន្ត្រីហោ ណាំហុង បានបញ្ជាក់ទៀតថា កម្ពុជា ក្រោយពីខ្លួនទទួលបានឯករាជ្យ មួយឆ្នាំក្រោយមកគឺនៅឆ្នាំ១៩៥៤ ប្រទេសថៃបានលើកទ័ពមកឈ្លានពានកម្ពុជាតែម្តង ។ នៅពេលនោះកម្ពុជាបានដាក់ពាក្យប្តឹងទៅតុលាការអន្តរជាតិទីក្រុងឡាអេ ហើយនៅឆ្នាំ១៩៦២ តុលាការអន្តរជាតិបានកាត់ក្តីឱ្យកម្ពុជាឈ្នះដោយផ្អែកលើផែនទីបារាំង-សៀមធ្វើ ប៉ុន្តែថៃនៅតែចចេសប្រើផែនទីឯកតោភាគីរបស់ខ្លួន បញ្ហានេះមានភាពស្មុគស្មាញរហូតមកដល់បច្ចុប្បន្ននេះ ។ កម្ពុជាគឺជាជនរងគ្រោះ ដោយសារនយោបាយផ្ទៃក្នុងរបស់ថៃ ។
លោកឧបនាយករដ្ឋមន្ត្រីបានស្នើឱ្យប្រទេសន័រវែស ជួយគាំទ្របេក្ខភាពកម្ពុជា ជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ សម្រាប់អាណត្តិ ២០១៣-២០១៤ដែលនឹងធ្វើការបោះឆ្នោតនៅឆ្នាំ២០១២ ខាងមុខនេះ ។ មូលហេតុដែលសុំឱ្យមានការគាំទ្រចំពោះបេក្ខភាពកម្ពុជា ជាសមាជិកមិនអចិន្ត្រៃយ៍នោះ ដោយសារកម្ពុជាជាសមាជិកអង្គការសហប្រជាជាតិតាំងពីឆ្នាំ១៩៥៥ ប៉ុន្តែកម្ពុជាមិនដែលបានទទួលតំណែងអ្វីឡើយ ។ ហេតុដែលកម្ពុជាចង់បានជាសមាជិកមិនអចិន្ត្រៃយ៍នោះ ដោយសារកម្ពុជាឆ្លងកាត់បទពិសោធន៍កន្លងមកហើយ គឺឆ្លងកាត់នៅសម័យអ៊ុនតាក់ សម័យបោះឆ្នោត ក្រោយមក ដោយសារនយោបាយឈ្នះ=ឈ្នះរបស់រាជរដ្ឋាភិបាលកម្ពុជាបានបញ្ចប់សង្គ្រាមជាស្ថាពរនៅឆ្នាំ១៩៩៨។ ដូច្នេះកម្ពុជាចង់រំលែកបទពិសោធន៍ទាំងនោះ ហើយចូលរួមសហការជាមួយឧត្តមក្រុមប្រឹក្សាសន្តិសុខក៏ដូចជាក្របខណ្ឌសហប្រជាជាតិ ដើម្បីបញ្ចប់ទំនាស់នានានៅលើសាកលលោក ។
លោកជំទាវឯកអគ្គរាជទូតន័រវែសមានប្រសាសន៍ថា កម្ពុជាពិតជាស័ក្តិសមទៅនឹងតំណែងនេះ ដូច្នេះលោកជំទាវនឹងពាំនាំសំណើនេះទៅប្រាប់រដ្ឋាភិបាលន័រវែសដើម្បីធ្វើការពិចារណាគាំទ្រដល់ប្រទេសកម្ពុជា ។ នៅល្ងាចថ្ងៃដដែលនោះដែរ ក្រសួងការបរទេស និងសហប្រតិបត្តិការអន្តរជាតិ បានរៀបចំពិធី Cocktail ពីម៉ោង៧ដល់ម៉ោង៩ យប់នៅសណ្ឋាគារសូហ្វីតែល ក្រោមអធិបតីភាពលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Christian Connan ឯកអគ្គរដ្ឋទូតបារាំង ប្រចាំកម្ពុជា និងមានការចូលរួមពីឯកអគ្គរដ្ឋទូត និងអគ្គកុងស៊ុល នៃបណ្តាប្រទេសនិយាយភាសាបារាំង និងស្ថាប័នជាតិ និងអន្តរជាតិ មួយចំនួននៅកម្ពុជា។
ពិធីនេះ ត្រូវបានរៀបចំឡើង ដើម្បីរំលឹកខួបលើកទី៤១ នៃការបង្កើតអង្គការអន្តរជាតិ នៃបណ្តាប្រទេសនិយាយភាសាបារាំង ហៅថា ហ្វ្រង់កូហ្វូនី ដែលបច្ចុប្បន្ន មានសមាជិកទាំងអស់ចំនួន៧៥ប្រទេស ក្នុងនោះសមាជិកពេញសិទ្ធិ៥៦ប្រទេស និងសមាជិកសង្កេតការណ៍១៩ប្រទេស ។ គួររំលឹកថា អង្គការអន្តរជាតិនៃបណ្តាប្រទេសនិយាយភាសាបារាំង ត្រូវបានបង្កើតឡើងនៅឆ្នាំ១៩៧០ ក្រោមគំនិតផ្តួចផ្តើមរបស់ឥស្សរជនចំនួន៤រូប មកពីប្រទេសនិយាយភាសាបារាំង ក្នុងនោះ ក៏មានព្រះមហាវីរក្សត្រ សម្តេចព្រះនរោត្តម សីហនុ ព្រះវររាជបិតាជាតិខ្មែរផងដែរ ។
អង្គការហ្វ្រង់កូហ្វូនី ជាអង្គការអន្តររដ្ឋាភិបាល ដែលប្រើប្រាស់ភាសាបារាំង ជាឧបករណ៍ជំរុញសាមគ្គីភាពនៃបណ្តារដ្ឋជាសមាជិក លើកកម្ពស់វិស័យអប់រំ សិក្សាធិការ បច្ចេកវិទ្យា និងវិទ្យាសាស្ត្រស្រាវជ្រាវ ដោយឈរលើតម្លៃជាសាកល មានជាអាទិ៍ លទ្ធិប្រជាធិបតេយ្យ នីតិរដ្ឋ សិទ្ធិមនុស្ស ដើម្បីសន្តិភាព និងការអភិវឌ្ឍប្រកបដោយចីរភាព ។
នៅក្នុងសុន្ទរកថា លោកឧបនាយករដ្ឋមន្ត្រី បានសម្តែងនូវមោទនភាពចំពោះការវិវត្តជាវិជ្ជមាននៃភាសាបារាំងនៅក្នុងចំណោមយុវជនកម្ពុជា តាមរយៈការបង្កើតថ្នាក់ពីរភាសា និងកម្មវិធីបង្រៀនភាសាបារាំង នៅតាមអនុវិទ្យាល័យ វិទ្យាល័យ និងសាកលវិទ្យាល័យ ទោះបីជាកម្ពុជាស្ថិតនៅក្នុងស្ថានភាពតំបន់ដែលផ្តល់អំណោយផលចំពោះភាសាអង់គ្លេសក៏ដោយ ។ ភាសាបារាំងគឺជាការបំពេញបន្ថែមសម្រាប់កម្ពុជា ៕
ចែករំលែកព័តមាននេះ