រាជធានីភ្នំពេញ ៖ កាលពីរសៀលថ្ងៃទី២៥ វិច្ឆិកា ២០១១ លោកកែប ជុតិមា អភិបាលរាជធានីភ្នំពេញ បាននាំយកអំណោយជាថវិកាចំនួន៥ម៉ឺនដុល្លាររបស់សម្តេចតេជោហ៊ុន សែននិងលោកជំទាវកិត្តិព្រឹទ្ធបណ្ឌិតប៊ុន រ៉ានីហ៊ុន សែន ទៅប្រគេនដល់វត្តស្រះចក ដើម្បីជួយកសាងកុដិនៅក្នុងវត្តដែលកំពុងសាងសង់។
សម្តេចព្រះឧត្តមចរិយាឈឹង ប៊ុនឈា សមាជិកថេរសភាសង្ឃនៃព្រះរាជាណាចក្រកម្ពុជា និងជាព្រះគ្រូចៅអធិការវត្តស្រះចក បានទទួលអំណោយជាបច្ច័យចំនួន៥ម៉ឺនដុល្លារនោះផ្ទាល់ពីលោកអភិបាលរាជធានីភ្នំពេញកែប ជុតិមានិងលោកជំទាវជាភរិយា ប្រកបដោយព្រះទ័យរីករាយត្រេកអរក្រៃលែង។ សម្តេចព្រះឧត្តមចរិយាបានថ្លែងអំណរគុណយ៉ាងជ្រាលជ្រៅចំពោះសម្តេចតេជោហ៊ុន សែននិងលោកជំទាវតាមរយៈលោកកែប ជុតិមា ដែលបានផ្តល់ថវិកាសម្រាប់ជួយកសាងមហាកុដិដែលកំពុងសាងសង់និងកំពុងជួបការខ្វះខាតទៀតផង។
នៅក្នុងឱកាសនោះលោកកែប ជុតិមា បានប្រគេននិងជម្រាបជូនដល់សម្តេចព្រះឧត្តមចរិយាក៏ដូចជាគណៈកម្មការអាចារ្យវត្តថា សម្តេចតេជោហ៊ុន សែន តាមរយៈសាលារាជធានីភ្នំពេញបានផ្តល់ជាអំណោយចំនួន១០ម៉ឺនដុល្លារសម្រាប់ជួយកសាងមហាកុដិតាមការស្នើសុំ។ ប៉ុន្តែពេលនេះសាលារាជធានីភ្នំពេញតាមរយៈលោកផ្ទាល់បានយកថវិកាចំនួន៥ម៉ឺនដុល្លារមកប្រគេននិងជូនព្រះគ្រូចៅអធិការនិងគណៈកម្មការវត្តយកទៅចាត់ចែងនិងដំណើរការសាងសង់បន្តសិន នៅពេលសាងសង់អស់ថវិកានេះក្នុងអំឡុងខែធ្នូ សាលារាជធានីភ្នំពេញនឹងយក៥ម៉ឺនដុល្លារទៀតមកប្រគេនបង្ហើយតែម្តង ៕
ចែករំលែកព័តមាននេះ